JOHAAN
Johaan-a yuk Thang Kdo Kkya
1
1 Kho mdek am ah mhnün mseng hama kkhyüh Pangsiima kkhyü anavek kti. Asuna ah kkhyü sun Pangsiima dä ayüma vek kti. Asuna kkhyü sun Pangsiima ng'yüi ni.
2 Aksüka Pangsiima dä ayüma vek kti.
3 Pangsiim noh asuna kkhyü üng abäng ah mhnün mseng ni. Ah mhnün mseng üng ah kkhyü am ngpüi ktia i phi am som daai lo.
4 Asuna kkhyü üng xün naak velok kti. Asuna xün naak sun kkhyaangea phäh akvaai ni.
5 Akvaai sun anghmüp naaka vaai lü anghmüp noh akvaai sun am nääng khoh.
6 Pangsiim noh ah tüih lo mat vek kti. Asun ta Johaan ngming nak kti.
7 Ah nih hin akvaaia mong sun kkhyaange üng shak shi kkhaia lok kti. Kkhyaange noh ngja-ulü ah nih jum ei lo vai ua Johaan noh jah mtheh kti.
8 Ah pät hin akvaai am ni. Akvaaia mong sun shak shi kkhaia ni ah lo ta.
9 Hin ta akvaai ksang ni. Ahina kho mdeka kkhaana lolü kkhyaang abänga phäh-a vaai ktia akvaai ni.
10 Ah nih hin mdeka kkhaana vek kti. Pangsiim noh ah nih üng ahina kho mdek ah mhnün mseng ni. Asuna kyalüphi kho mdek kkhyaange noh ah nih u ati sun am kshing kuung u.
11 Ah nih hin ah khyong hnea lokyo lüphi ah kkhyaang mjüe noh am dou daang u.
12 Lüphi ah nih dou daang naküt ktie, jah kuum kyan ei kti Booi Pa üm na-naküt ktie sun ah nih noh Pangsiima sa-a jah thoon shak kti.
13 Asuna sae ta kkhyaang mjüa kkhyüh kyum kyalolü hmi kti am ni. Mti sha ngso ngkhyääi lü hmi lok kti phi am ni. Kkhyaanga mlung hlü üng hmi lok kti phi am ni. Pangsiim noh ah jah thoon shak ah sae ni.
14 Pangsiima kkhyü sun nghngi siima ngtüüi lok kti. Bä naak jah aksang üng küm kooi lü kei nih-ea hlonga vek kti. Pa Pangsiim noh ah sa mat däk üng ah peeta jou taai sun kah nih hmuh u ni.
15 Patiso Johaan noh ah nih-a mong shak shi kti. “Kei noh kah pyen khoi hin ah nih-a mong ni. ‘Kah hnua ah nih hin lok kkhai. Asuna kyalüphi keia kthaka ah nih hin däm duh kti ni. I a thoon lüni ti ta am kah ngtüüi hama kkhyüh ah nave pääng kti’ tia kah pyen khoi ni” tilü akthai kdäma ah jah mtheh.
16 Ah küm kooi naak üng bä naak nih nih-e üng mshap mshap lü Booi Jeishüh noh ah jah peet ni.
17 I lüni ti ta Pangsiima bä naak jah aksang sun Jeishüh Khrito üng lok kti. Ah thuum ta Moshei üng ah peet ni.
18 Pangsiim sun u noh am hmukhoi kyo. Pa Pangsiim noh ngkhot ngsheng naak üng ah ve püi, ah päta ng'yüi ah sa mat däk noh Pangsiim sun angshing ngtea jah kshing shak kti.
(Mate 3.1-12; Marküh 1.1-18; Lükah 3.1-18)
19 Jeirüh Shalem mlüh üng ka Jüdah khong mange noh khotu ngsiim akhäk jah Levih kkhyaang akhäk Johaana veei jah tüüi ulü “Nang u ni” tilü ah nih jah kthäh vaai shak u.
20 Asun üng Johaan shak shi be kti. Johaan noh ta “Kei hin Khrito am ni” tilü käh thup lü angkyaaia ah jah mtheh.
21 Asun kba khom ta “Nang u ni. Nang Eilijah mä” tilü ah nih kthäh be tü u. Johaan noh “Am ni” ah ti be. “Am ani üng asuna shahma ngsiim mä” tilü ah nih kthäh be tü u. “Am ni” ah ti be tü.
22 Asune noh ta “Nang u ni ati sun jah mtheh-a. Jah tüüi lok ktiea veei kah nih mtheh vaai be vai ua nah pät noh nah pät i a nah ngshui ei sun jah mtheh-a” tilü ah nih kthäh u.
23 Johaan noh “Shahma ngsiim Hei Shajah-a malam pyena kba ‘Booi Pa-a lo naak vai lam ngpyuun shak ua’ tilü mkyaanga akthai kdäma ngpyaang ktia kei ngshä ni” ah ti.
24-25 Pharishe-ea ah nih jah tüih lo u noh ta “Nang hin Khrito am ni. Eilijah phi am ni. Asuna shahma ngsiima phi am nah thoon kti ta i a kyalü patiso nah jah pek kti ni” tilü ah nih kthäh be tü u.
26 Johaan noh “Kei noh ta tui üng ni patiso kah ning peet u. Asuna kyalüphi nang nih-ea kshuunga am nah nih kshing u kkhyaang mat vek kti ni.
27 Ah nih sun kah hnua lolüphi keia thea däm duh kti ni. Ah nih-a kho pha dok hngoh ngmüm ngüshe shuh peet kkhaia kei am ngkäih ngü” tilü ah pyen.
28 Ahin kba athoon ve hin Johaan noh patiso ah jah peet naak Jotan mlik tui sa yea Pet Tanih ngnam peia ni.
29 Angooi üng ah veeia Jeishüh ah lo sun Johaan noh ah hmuh. “Bük ua. Ahin kho mdek kkhyaangea mkhye seh püi kti Pangsiima To Sa ni.
30 ‘Keia hnua lokyo lüphi am kah ngtüüi hama kkhyüh ah nave pääng ktia kyalü keia kthaka däm duh bok kti’ tilü kah ning jah mtheh khoi u sän ah san kah pyen ni.
31 Aksüka ah nih hin u atia am kshing ngü. Asuna kyalüphi Isare-ea veei ah nglou ngthang vaia lolü tui üng patiso kah peet ni.
32 Kona Mkhyangsiim sun kkhaan khoa kkhyüh müüma mäia Jeishüh-a k'uma kyum lok kti kah hmuh ni.
33 Kei noh ah nih sun u atia am kshing ngü. Tui üng patiso kah jah peet vaia nah tüüi lok kti Pangsiim noh ta ‘Nang hin mat mata kkhaana Mkhyangsiim akyum lo nah hmuk kkhai. Ah nih noh Mkhyangsiim üng patiso jah pek kkhai ni’ ah ti.
34 Asun kba athoon ve kah hmuh ni. Ah nih hin Pangsiima sa ni tia nang nih-e üng kah ning jah mhnüh mtheh ni” tilü Johaan shak shi kti.
35 Angooi üng Johaan sun akläk xooia dä vek kti.
36 Jeishüh noh ah jah khe lo üng hmuh lüta “Bük nih-a. Pangsiima To Sa ni” tilü ah pyen.
37 Akläk xooi noh asun kba ah pyen sun ngja-nih lüta Jeishüh-a hnua ah nih läk.
38 Jeishüh ah hnu da va nglat lü asun xooi noh ah nih läk lo jah hmulüta “I nah nih shui hlük kti ni” tilü ah jah kthäh. Asun xooi noh “Angvaaio, hoa nah vek kti ni” tilü ah nih kthäh.
39 Jeishüh noh phi “Lolü bük lo nih-a” ah ti. Asuna ksüün ta ngsheng shoon ei ksüün ni, mülam naji kphyü. Jeishüh läk nih lü ah ve naak phi ah nih hmuh. Mthan veia ah hlonga vek kti xooi.
40 Johaana pyen ngja-nih lü Jeishüh-a hnu läk kti xooi üng ka mat Shimon Peta-a na Antere ni.
41 Asun noh ah be Shimon sun angshenga shui vaai lü ah hmuh jah “Khrito kah nih hmuh ni” tilü ah mtheh vaai hnaam.
42 Asun üng Shimon sun Jeishüh-a veei ah seh püi. Jeishüh noh bük lü “Nang hin Johaana sa Shimon ni. Asuna kyalüphi nang hin Khe Pa nah ngming nah be kkhai. (Aramik läk üng Khe Pa, Kärih läka Peta ti hlü ta lung nu ni)” tilü Jeishüh noh ah pyen.
43 Angooi üng Jeishüh noh Kalile hne da sit kkhai ah tääng. Philip sun hmulü “Nah läk loa” ah ti.
44 Philip ta Pet Shai Ta mlüh-a kkhyüh lok kti. Peta jah Antere phi asuna mlüh-a ka xooi ni.
45 Philip noh Nata Nei sun hmulü “Mosheia thuum jah shahma ngsiimea malam pyen üng ah nih-a mong ah nih nayuk u sän kah nih hmuh u ni. Ah nih hin Nasaret mlüh-a ka Joshepa sa Jeishüh ni” ah ti.
46 Nata Nei noh ta “Nasaret mlüh hia akdo vai ngtüüi lok kkhai mä” tilü ah kthäh. Philip noh “Bük lo tua” ah ti be.
47 Jeishüh noh Nata Nei sun ah veeia ah lo hmu-lüta “Bük nih-a. Isare kkhyaang ksang ni. Am ngtüüi ngten laang kuung” tilü Jeishüh noh ah nih-a mong ah pyen.
48 Nata Nei noh “I hok kba nah nah kshing ni” tilü ah kthäh. Jeishüh noh “Philip noh am ah ning khü lo ham üng Kthei dunga kkea nah ve üng kah ning hmuh ni” ah ti be.
49 Nata Nei noh “Angvaaio, nang hin Pangsiima ning sa ni. Isare-ea shang phuhlanga phi nah thoon kti ni” ah ti.
50 Jeishüh noh “Kthei dunga kkea nah ve üng kah ning hmuh ni kah tia phäh däk üng nah nah jum mä. Ahina thea däm duh kti nah hmuham kkhai ni.
51 Ngngaai ua, kei kah pyen ma kkhai ni. Kkhaan kho nghmong lolü Pangsiima kkhaan kho ngshäe kkhaan khoa kkhyüh Kei, Kkhyaang Sa-a kkhaana ah nih kyum lo, ah nih kaai be u nah nih jah hmuk kkhaie ni” tilü ah mtheh.