4
Nang nih-e üng mat jah mat nghai ngbak ei lü ngtuun ngvook sän i hok kba som lok kti ni. Nang nih-e üng am do kya kti hlü ei, kpaam ei naaka mlung kko avea phäh ni. Nah nih puum sha-a am do kti hlü ko kpaam ktah ei jah akdo vai nah nih poh mshah hlü sun ngdäh ngkaih lok kti xooi. I mä kpaam ei u kti lü am nah nih yah ei khoh üng kkhyaang hnim kkhaia nah nih ngpyaih xat ktie. Nah nih hlü ei tong am nah nih yah eia phäh nghai ngbak ei lü nah nih ngtuun ngvok ktie. Nang nih-e noh Pangsiima veei am nah nih tä sham ei ua phäh nah nih hlü ei am nah nih yah ei u ni. Tä sham u kti lüphi Pangsiim noh am ning jah pe. I lüni ti ta khye ktia ngnei shak üng am do kya kti sun nah nih tä ei ua phäh ni.
Kkhyü shing üng am vek kti kkhyaangeo, Pangsiim am jum ei ktie üng nah nih nglooi ei ua phäh Pangsiima yea nah nih thoon ktie atia am nah nih kshing ei ktie mä. Kho mdek üng nglooi ei hlük kti sun Pangsiima ngshun püia thoon kti ni. Sangsiim üng “Pangsiima jah peet Mkhyangsiim noh ngkeei nghnaih ktia mlung üng jah mshü mseei kti” tilü vek kti. Ahin kba Sangsiim üng ng'yuk kti hin amdang am ni. Pangsiima jah peet bä naak hin däm bok kti ni. Sangsiim üng ng'yuk ktia kba “Pangsiim noh sam sah ktia kkhyaange jah kpet mjak kti. Ah mlung mhneem ktia phäh ta Pangsiima bä naak vek kti ni.”
Asuna thoon lü mlung mhneem lü nah nih pät Pangsiim üng ng'ap ei ua. Shatan yaai pa-a ning jah hlo kdäk naak sun üng käh ngsum ngbooi-in lü shung khaam lü ve ua. Asun üng va Shatan yaai pa sun nang nih-ea kkhyüh lü sen kkhai. Pangsiim üng säh seng ua. Asun üng ni nang nih üng Pangsiim phi ah säh lo kom. Mkhye mshoh kti kkhyaangeo, mkhye mshoh nah nih poh naak khoi nah nih kut ngsiim ngsaih shak hnüh ua. Ah mlung kko nghngih kthum ktia kkhyaangeo, kho mdek kpaam ei naak hoih lü nah nih mlung kko Pangsiim üng ap ua. Nah nih mkhye mshoh hüt ua phäh pyang ma kyap yün ua. Nah nih yaih-a kthai sun kyah kthaia hlai phyak kti. Je je kyai kyaia nah nih ve vaia ksah-a nah nih mkhyea phäh puk she ua. 10 Pangsiima ma-a nah nih pät noh nah nih pät buuk mhneem ua. Asun üng ni Pangsiim noh ah nih ning mhlün mtaai kom.
11 Kah be naeo, mat jah mat käh sok sek beleh ua. Nah nih püi sok sek püi lü nah nih si jaang ta Pangsiima thuum sun am do kti tia nah nih si jaang üng täng kti ni. Thuum sun nah nih si jaang ta asuna thuum sun käh ksang nalü thuuma kthaka däm duh ktia ah pät noh ah pät ngngaai ei ktia kyah kti. 12 Asuna thoon lü Pangsiim ah pät däk noh ni thuum sun ah mkhyah ta. Ah pät noh ni ah si jaang khoh kom. Ah nih noh ni ah jah kuum kyan khoh, ah jah sim pyak shak khoh. Asuna thoon lü nang nih-e noh nah nih püi nah nih si jaang u ta nah nih pät noh nah nih pät sun i a nah nih ngngaih ei u ni.
13 Ngngaai ua, nang nih-e hin noh “Tuh ngooi am ani üng kho ngooia suna mlüh-a kah sit kkhai. Asua kum mat velü ong poh lü ngui kho hah yah ei lü kah vek kkhai” tilü nah nih pyen khoi ktie. 14 Lüphi kho ngooi i hok kba ve vai ati sun am kshing ei u kti. Nanga shak hin i üng täng kti ati sun nah kshing ei kti mä. Tui kkhua kba noong vei sa pou lolü khyük be kti üng täng kti ni. 15 Asuna thoon lü ahin kba pyen vaia do kti. “Axüna phi nih xüng ham lü Pangsiima hlü eia phi athoon ta hin kba poh vai, sun kba ve vai” tilü nah nih pyen vai. 16 Tuh ta nah nih pa kkhyap sam sah ktie. Ahin kba sam sah lü vek kti naküt abäng khye kti ni. 17 Asuna thoon lü akdo vai kshing mah mah lü am ve soh ngbi nglou ktia kkhyaang hin mkhye kti ni.