3
1 Kah be naeo, jah mthei ktia abäng nah nih thoon vaia käh ktha na-ua. I lüni ti ta Pangsiim noh kkhyaang jah mthei kti nih nih-e sun ashih deena jah si jaang kkhai ati sun noh nih kshing ktie am ni bä.
2 Nih bäng hin alä kuunga nih mkhye mshoh ktie ni. Pyen kshak ngthuh ngmin ei naküt üng mkhye mshoh naak am ngpüi ktia kkhyaang ta küm seei kti ni. Ah nih noh ah mlung kko puum sha phi mbüüp khoh kti.
3 Ngshe üng mpyong kbaai nih yüüi shui peeta phäh ngshe noh jah ksang nak kti. Asuna mpyong kbaai nih yüüi shui peeta phäh üng nih seh naak hlü shak da sit kti.
4 Mhlüüi kdäm nu sun akdäm nua thoon kyo lüphi kho khi noh joon seh ei kyo lüphi mhlüüi mpheei naak akdiik sa üng mhlüüi pyaih khong noh ah ti naak da seh shak khoh kti ni.
5 Kkhyaanga nih mlei hin phi asun kba ni. Mlei hin akdiik sa-a thoon kyolüphi “Kei aktung bok ni” tilü sam sah khoi kti. Ngngaai shüm ua, mei paai sa noh mo nu phi uui päih khoh kti.
6 Kkhyaanga nih mlei hin mei üng täng kti ni. Nih ti pyen naak üng mkhye mshoh naak mjü kküma phung pya-a phi thoon kti. Mlei noh mkhye ah poh-a phäh nih puum sha abäng üng kop pek kti. Mleia phäh hi mlung kko ngnei shak abäng hin meia uih päih-a kba jah pyo se shak kti. I lüni ti ta Shatan yaai pa hin noh nih pyo se vaia nih mlei hin ah shum ei ni.
7 Kkhyüng kshei naküt kphyu kkha, tui nga, aknung bok sun kkhyaang noh shääm shuui mthei mkhoong lü ng'yah kti. Shääm lü mhnep khoh ni.
8 Kkhyaanga mlei ta u noh phi am shääm shuui mhnü mhnep khoh. Nih mlei hin angima käh velü kkhyaang mthih khoh kti kphyu kphyaai ha shik mah-a mäi ni.
9 Nih nih-e noh nih mlei üng nih Booi Pa jah Pa Pangsiim sun nih mküüi mtou ktie. Asun kona Pangsiim noh ah päta ng'yüia ah jah mhnün msenga kkhyaange sun nih mlei üng nih jah ngshe ngsham ei khoi ktie.
10 Mpyong mata kkhyüh mküüi mtou naak jah she sham lut lok kti va nik kba. Kah be naeo, asun kba käh thoon yah vai.
11 Puut lok kti tui ksaai mat üng tui sun akthu jah akdo ngtoih lü am puut lokhoi.
12 Kah be naeo, kthei thing dung hin kshi dunga ktheih-a am ngthei khoi. Ngbom dung phi ktheia am ngthei khoi. Asun kba ni tui kthu buui sun üng phi tui kdo am puut lo.
13 Nah nih kshuunga theem kti ngyam mah kti vek kti mä. Ah nih noh do ktia ah ve soh poh mshah jah ah mlung ah buh mhneem üng ah theem naak jah ah ngyam sun jah mhnüh she.
14 Asuna kyalüphi ngkeei ngku, püi mlung kko naak, päta phäh däk nghnga naaka koong hin nang nih-e üng ave ta “Kah ngyam mah kti” tilü käh sam sah ua. Nah thoon ve ksang sän ta thuh vih lü käh hleei hlak hüa.
15 Asuna theem naak sun Pangsiima kkhyüh lok kti am ni kuung. Asun sun ta ahina kho mdek üng shääng ei kti, mlung lo üng ka, Shatan yaai pa-a kkhyüh lok kti ngyama thoon kti ni.
16 I lüni ti ta ngkeei ngku jah päta phäh däk nghnga naak hin ave ta am ngkhot ngsheng naak jah am do kya kti ve soh ngnei shak amjü mjüa thoon lok kkhai ni.
17 Pangsiima kkhyüh lok kti theem naak ta aksüka ngsiim ngsaih kti. Asun kona jah ng'ye ngpai shak kti. Hnip hnooi kti. Kkhyaange jah nglooi ei shak kti. Jah mpyeen ei shak kti. Akdoa ve soh ngbi ngloh vai ngdang lo shak kti. Kkhyaang am mkhoi mkhya. Am jah ngthuh ngvih shak.
18 Jah ng'ye shak be kti ta msi ui kphuh-a kba diim deih naaka msi nglin sho kti ni. Aktheih paai aat be ktia kba do kya naak sun yah be kkhai.