2
1 Kah be naeo, nang nih-e noh jou taai mah kti nih Booi Jeishüh Khrito sun nah nih jum ei ktie, am ni bä. Asuna thoon lü kkhyaang käh mkhoi mkhya ua.
2 Avai shüa hjok khah ngkhääm naaka ngui, xüi, khoh kkhyam talü shui shak kdo shui shak kti kkhyaang mat phalok kkhai. Shui shak kpyoih kshe nu shui shak kti mpyeen kshe kkhyaang mat phi phalok kkhai.
3 Nang nih-e noh akdo shui shak ktia kkhyaang sun ah nadou daang üm hlaam lü “Hia ado naak hin üng ngshuta” tilü nah nih pyen u ni. Mpyeen shek kti üng ta “Säa ngdüüia. Am ani üng kah kho peia mä ngshut loa” tilü nah nih pyen ktie.
4 Asun kba nah nih poh u ta kkhyaang mkhoi mkhya u kti lü am do ktia nah nih su ngngaih üng kkhyaang nah nih si jaang ktie ni.
5 Kah mhlä kphya naak kah be naeo, ngngaai ma ua. Hina kho mdeka mpyeen shek ktie hin jum ei naak üng ah nih booi beei vaia Pangsiim noh jah xü kti ni. Pangsiim mhlä kphya nak ktiea phäh-a ah upa pe ka nak kkhaia Pangsiim noh ah ng'aan ei vek kti.
6 Nang nih-e noh ta mpyeen shek ktie sun am jah lei shong u kti. Nang nih-e ning jah hnep ei lü si jaang naak luuma ning kaih ktie ta ue ja. Booi beei ktie va am ni bä.
7 Nang nih-e hin Khritoa ngminga nah ning ngshui ktie. Booi Jeishüh Khritoa däm duh kti ngming sun ahine noh thang mseh ktie ni.
8 Pangsiim noh Sangsiim üng ah jah yuk shak thuuma kba nah nih poh u üng do kkhai. Asuna thuum sun i ni ti ta “Pät noh pät kphya naaka kba nih püi po phi kphya naak vai ni” tilü vek kti.
9 Asuna thoon lü kkhyaang nah nih mkhoi mkhya üng mkhye poh u kti lü Pangsiima thuum nah nih lüüm kkaan ktie ni.
10 Pangsiima thuum abäng nih läk lam kyo lüphi thuum mat nih mkhye ta thuum abäng sun nih lüüm kkaan üng täng kti ni.
11 Pangsiim noh “Kkhyaanga nghnu mi käh bäü naak vai” ah ti. “Kkhyaanga shak käh hnim vai” tilü phi ah pyen. Nang nih-e hin kkhyaanga nghnu mi üng am mkhye mshoh kyo u kti lüphi kkhyaanga shak nah nih hnim ta Pangsiima thuum nah nih lüüm kkaan kti ni.
12 Pangsiim noh mkhye naak üng ah jah mhlät naak thuuma kba jah si jaang be kkhai atia ngngaai ei lü pyen kshalü ve soh poh mshah ua.
13 Kkhyaang mat hin ah püi poea kkhaana mpyeen ei naak am ah ve ta Pangsiim noh phi ah nih am mpyeen ei be. Püi po mpyeen ei naak hin noh Pangsiima jah si jaang naak ah nääng ni.
14 Kah be naeo, kkhyaang mat noh “Booi Jeishüh kah jum ei kti ni” tikyo lüphi ah ve soh poh mshah üng am angshing ngte ta alapa thoon kti ni. Asuna jum ei naak noh ah nih sun kuum kyan khoh kkhai mä.
15 Avai shüa Khritjaan be na mat sun ah shui shak ei ook vai am ve.
16 Nang noh asuna be na sun üng “Mya lü sit be bä. Akdoa nah shui shak vai ning peshe. Nah phüa nah ei vai ning peshe” tikyo kti lüphi hlü ko kkhai sun am nah peet ta nanga pyen hin alapa thoon kti.
17 Asun kba jum ei naak sun phi vek kti. Jum ei naak üng ve soh poh mshah am ah ngpüi ta asuna jum ei sun akthi ni.
18 Avai shüa mat mat noh “Nang ta nah jum ei kti, kei ta kah ve soh bi loh do kti” ah ti vai. Kei noh phi “Ve soh poh mshah käh ngpüi ktia jum ei naak sun nah mhnüh shüma. Kei noh ta kah ve soh poh mshah üng kah jum ei sun kah ning mhnüh kkhai ni” tilü kah pyen be kkhai.
19 Pangsiim mat däk vek kti atia nah jum ei kti am ni mä. Do kti ni. Kho yaaie noh phi asun kba jum ei ulü kyüh ulü ngak ngak thak ktie ni.
20 Nang hin nah nghmoong kti ni. Ve soh poh mshah am ngpüi kti jum ei naak alapa thoon kti atia ning mhnüh ham vai mä.
21 Nih nih-ea mah pook Apyaham sän Pangsiima ma-a i hok kba pyuun lok kti ati sun nang noh nah kshing kti mä. Ah sa Isak sun khah naak lung päma kkhaana mshoon lü Pangsiima phäh-a hnim vaia ngpyaih xat kti. Asun kba ah poh mshah-a phäh üng Pangsiim noh Apyaham sun pyuun ktia ah ngngaih.
22 Nah ngngaih lo kya hnüh mä. Apyaham phi ah jum ei jah ah ve soh poh mshah sun mat lok kti am ni bä. Ah jum ei sun ah ve soh poh mshah üng küm seei kti ni.
23 Sangsiim üng ng'yuk kti ta, “Apyaham noh ah Pangsiim sun jum ei kti. Asuna thoon lü ah jum ei naak sun üng Pangsiim noh pyuun ktia ah mkhyah” tilü vek kti. Asun üng ta Apyaham sun Pangsiima looi püia ngshui kti.
24 Kkhyaang hin jum ei naak däk üng käh nik ktia, ah ve soh poh mshah ngpüi lolü pyuun lok kti atia nah kshing hnüh kti mä.
25 Kpa mie jah ve püi ma lü kheen dou ei kti nghnu mi Rahap phi asun kba ni. Rahap sun noh ampyua jah mshok kbäüih lok kti Jüdah kkhyaang xooi sun jah dou daang lü kkhyaangea am kshing naak lam üng mlüh-a kkhyüh ah nih seh naak be vai jah mhnüh lü ah jah mhlät. Asuna phäh ah poh mshah üng Pangsiim noh pyuun ktia ah ngngaih.
26 Asun kba ni. Ngmüi mkhya am vek kti nih puum sha hin phi akthi ni. Asun kba ve soh poh mshah am ngpüi ktia jum ei hin phi akthi ni.