1 “Jeishüh hin Pangsiima tüih lo Khrito ni” tilü jum ei naküt ktie ta Pangsiima jah sa ni. Nih Pa Pangsiim kphya nak kti naküt noh ta nih Pa Pangsiima sae phi nih jah kphya nak kkhai ni. 2 Pangsiima kkhyü nih läk jah Pangsiim nih kphya naak üng Pangsiima sae nih jah kphya naak sun nih kshing khoh u ni. 3 Pangsiim kphya naak sun i hok kba ni ti ta Pangsiima kkhyü läk lam jah Pangsiima kkhyü läk naak hlüa mlung sun pyen ni. 4 Pangsiima sa naküt noh ngthiim kho nääng kti ni. Nih jum ei u üng ahina ngthiim kho nih nääng pääng u ni. 5 Kho mdek u noh nääng khoh kkhai ja. “Jeishüh hin Pangsiima Sa ni” tilü jum ei kti bä noh va kho mdek nääng khoh kti.

6 Tui jah thi üng kho mdeka lok kti hin Booi Jeishüh ni. Booi Jeishüh hin tui däk üng lok kti am ni. Tui jah thi üng lok kti ni. 7 Mkhyangsiim noh “Asun hman kti ni” tilü shak shi kti. Mkhyangsiim ta am hleei laang. 8 Shak shi kthum vek ktie. Asuna kthume ta Mkhyangsiim, tui jah thi ni. Kthumea shak shi sun ngsäp päih ktie. 9 Kkhyaangea shak shi hngoh nih jum ei ktie ni. Pangsiima shak shi ta jum ei bok vai hlü kti. Ah Sa kpa-a phäh Pangsiima shak shi ta asune ni. 10 Pangsiima shak shi sun Pangsiima Sa jum ei naküt ktiea mlung k'uma vek kti ni. Pangsiima pyen am jum ei naküt kti noh ta “Pangsiim hleei kti ni” ah ti üng atäng ni. I lüni ti ta ah Sa-a phäh Pangsiima shak shi sun am ah jum eia phäh üng ni. 11 Pangsiima shak shi ta “Shak ngshääi kah ning jah peet ni. Shak ngshääi sun kah Sa kpa üng ni nah nih yah khoh” tilü ah pyen. 12 Pangsiima Sa Khrito ah mlung kset üng kshing kti noh shak ngshääi yah pääng kti. Pangsiima Sa Khrito ah mlung kset üng am kshing kti noh ta shak ngshääi am yah.

13 Pangsiima Sa Khrito üm nak kti nang nih-e noh shak ngshääi nah nih yah pääng angshing ngtea nah nih hmat ei vaia ahina sa kah yuk lo ni. 14 Ah hlü eia nih tong naküt Pangsiim noh jah ksang nak kti ni. Asuna thoon lü Pangsiima ma-a nih kyüh ei vai nih ngke ei vai am hlü. 15 Anghläia Pangsiim noh ah jah ksang naak sun nih kshing ei u ta nih tä sham naküt nih yah pääng u phi nih kshing ei u ni. 16 Akkhye poh kti sun ah püi po mat mat noh ah hmuh. Asun sun thih naak ngkäih ktia mkhye am ani ta tä sham peet she. Asun üng va Pangsiim noh xün shak ham kkhai. Thih naaka ngkäih ktia mkhye poh ktia phäh-a tä sham vai kah pyen am ni. 17 Am do kti poh naküt hin mkhye ni. Mkhye mshoh naküt hin thih naak kking ta am ni.

18 Pangsiima sa-a thoon lok kti naküt akkhye anghläia am poh atia nih kshing u ni. Pangsiima Sa Khrito noh jah shung khaam lü käh thou be khoh onga Shatan yaai pa noh am jah kyuk shak khoh. 19 Nih nih-e ta Pangsiim üng nih shääng ei nih kshing u ni. Ngthiim kho üng shääng kti kkhyaang naküta Shatan yaai pa-a mkha kkea vek ktie ni. 20 Pangsiima Sa kpa kyum lolü Pangsiim ksang nih kshing vai ua jah ngvaai lo shak kti ni ati sun nih kshing u ni. Pangsiim ksang üng nih shääng ei ulü ah Sa Khrito üng phi nih shääng ei ktie ni. Asun sun Pangsiim ksang apät däk ni. Pangsiim ksang ah pät däk üng ni shak ngshääi phi ave. 21 Kah saeo, Pangsiima ksah-a akse käh hjok khah ubä.