3
1 Su ngngaai ua, nih Pa Pangsiim noh ahin kba onga jah mhlä kphya nak kti ni. Ah saea ah jah khü vai onga jah mhlä kphya nak kti ni. Aksanga ta nih nih Pangsiima sa ksange ni. Kho mdek kkhyaange noh Jeishüh u ati sun am kshing ulü nih nih-e phi u ati am jah kshing u.
2 Kah püieo, Pangsiima sa-a tuh nih thoon hnüh ktie. Ngooia i hok kba nih lup leei naak lo vai u ta am ngte ham. Booi Jeishüh ah lo be üng ah lup leei ksang nih hmuh ua kba nih nih-e noh phi nih lup leei nak kkhaie ati ta nih kshing u ni.
3 Asun kba Jeishüh hmuhlü kti naküt kkhyaang noh ta Booi Jeishüh ah ngsiim ngsaih-a kba ah ngsiim ngsaih vaia mseei kti ni.
4 Akkhye poh naküt kti noh Pangsiima thuum kpet mjak kti. Mkhye ti hin Pangsiima thuum kpet mjak ni.
5 Nih mkhye mshoh üng jah shuut phyam be kkhaia Jeishüh kho mdeka ah lo nah nih kshing u ni. Ah nih noh ta akkhye am poh laang kyo.
6 Booi Jeishüh üng nglooi ei kti noh anghläia akkhye am poh. Anghläia akkhye poh kti noh Booi Jeishüh am hmungtu kuung. Am kshing kuung.
7 Kah ning jah sa mhläe sun u noh phi hleei hlak lü lam käh ah nih ning hmü shak vaia mseei ei ua. Pangsiima hlü ei poh naküt kti hin Booi Jeishüh-a ngpyuuna kba ngpyuun kti ni.
8 Anghläia akkhye poh kti naküt hin Shatan yaai pa üng shääng ei kti ni. I hok kba ni ti ta Shatan yaai pa noh aksüka kkhyüh anghläia akkhye poh ei kuung kti. Shatan yaai pa-a khuut ksim kpyak kkhaia Pangsiima Sa kho mdeka lok kti ni.
9 Pangsiima sa-a thoon lo naküt kti noh akkhye anghläia am poh. Pangsiim hin ah nih-a Pa-a thoon lü Pangsiima mlung ngnei ah nih üng ve kyet kti. Asuna thoon lü ah nih noh anghläia akkhye am poh khoh.
10 Shatan yaai pa-a sa mä, Pangsiima sa mä, ati sun ahin kba ngshing ngte lok kti ni. Akdo am poh kti naküt, ah püi po am mhlä kphya naküt kti Pangsiima jah sa am ni.
11 Ahin hin Booi Jeishüh nah nih jum ei loa kkhyüh Pangsiima kkhyü sun nah nih ngjaak pääng ni. Nih püi mat jah mat nah nih mhlä kphya naak vai hlü kti.
12 Khaain ngming nak kti kpa mi ahlaan üng vekhoi kti. Khaain ta Shatan yaai pa üng ngpüi ei lü ah hnuun püi ah na ah hnim ni. Asuna Khaain üng ta am nih täng yah u. Ah na i lü ah hnim nah nih kshing mä. Khaain ta kkhyaang klääng ni. Ah na ta pyuun kti.
13 Kah püieo, ngthiim khoa ka Pangsiim am kshing kti kkhyaange noh ah nih ning sok ei üng käh sat ei ubä.
14 Nih Khritjaan püi poe naküt nih jah mhlä kphya nak ktiea thoon lüta thih naak nih phyään ulü xün naak ksanga nih vaang vaai pääng ktie ati nih kshing ktie ni. Ah püi po am mhlä kphya nak kti noh ta thih naak am phyään ham.
15 Ah püi sok ei kti naküt hin kkhyaang k'hnim ni. Kkhyaang k'hnim üng shak ngshääi am ve ati nah nih kshing ktie ni.
16 Booi Jeishüh noh ah shak jah pelü ah jah thoong be üng mhlä kphya naak ksang i ati sun nih kshing u ni. Asuna thoon lü nih nih-e noh phi nih püi poe üng nih shak jah pelü nih jah hlai vai hlü kti.
17 Kkhyaang mat booi ei kti kyo. Ah püia mpyeen sheet hmu-mah mah lü ei shelü am pe. Asuna kkhyaang üng Pangsiima mhlä kphya naak i am vengtu.
18 Kah saeo, mpyong ktui däk üng nih püi po nih mhlä kphya naak am khäk. Ku ei ksang lü poh ksang lü nih püi nih mhlä kphya na-vai u.
19-20 Asun kba nih ve u ta Pangsiima kkhyü nih läk ktie ati nih kshing u ni. “Kah mkhye vek kti” tilü nih pät noh nih pät nih kbäü ei vai am hlü. Pangsiim noh abäng kshing päih kti ni. Pangsiima kkhyü nih läk u sun phi Pangsiim noh kshing kti ni. Asun üng ta Pangsiima ma-a nih mlung phi hnip kkhai.
21 Kah püieo, asun kba “Kah mkhye vek kti” tilü nih mlung noh am ah jah kbäü ei ta Pangsiima ma-a am nih kyüh ei u, am nih ngke ei u.
22 Pangsiima kkhyü nih ksang nalü Pangsiima hlü ei nih poh-a phäh nih tong naküt ah jah peet ni.
23 Pangsiim noh ta “Kah Sa Booi Jeishüh Khrito jum ei ua. Mat jah mat noh nah nih püi mhlä kphya na-ua” tilü ah pyen. Booi Jeishüh noh phi asun kba ah pyen ni.
24 Pangsiima kkhyü ksang nak kti naküt Pangsiim üng nglooi ei kti ni. Asuna kkhyaang sun Pangsiim noh phi nglooi ei püi kti. I hok kba ni ti ta Pangsiim nih nih-e üng ah nglooi ei sun Pangsiima jah peet Mkhyangsiim üng nih kshing lo u ni.