JOHAANA SA AKSÜK
Johaan noh jum ei ktie üng ah jah kbia sa aksük
1
1 Shak ngshääia thoon kti Jeishüh Khritoa mong nah nih veeia kah yuk lok kti. Shak ngshääia thoon ktia kkhyü hin kho mdeka som sah hlaana kkhyüh vek kti. Asun Jeishüh sun ah ngthuh ei kah nih ngjaak khoi ni. Kah nih mik üng kah nih hmuh khoi u ni. Ngbük ei ksang lü kah nih kut üng kah nih hneh khoi u ni.
2 Asuna shak ngshääi Pa Pangsiima hlonga vekhoi kti. Asuna shak ngshääi Khrito hin hmuh yah-a velo khoi kti. Asun kei nih-e noh phi kah nih hmuh u. Ah nih-a mong kah nih pyen ktie. Kah nih hmuh yah-a kei nih-ea veei phi ve-lolü asun nah nih veeia kah nih kpyaü lo u ni.
3 Pa Pangsiim jah ah Sa Jeishüh Khrito mah mah kah nih nglooi ei ktie. Kei nih-e üng phi nglooi ei lü Pangsiim üng phi nah nih nglooi ei vai ua, kah nih hmuh khoi u, kah nih ngjaak khoi u, kah nih ning kpyaü lo ni.
4 Nih mlunga nih je pi pi vai ua ahin kah nih yuk lo u ni.
5 Ahina thang Khritoa veei ngja-u ngüshe kah ning jah kpyaü lo ni. Asuna thang ta “Pangsiim akvaai ni. Anghmüp üng Pangsiim am shääng ei laang ngtu.”
6 Anghmüp üng shääng kti akkhye poh mah mah lü “Pangsiim üng kah nglooi ei kti ni” tilü nih pyen tuhan u hin ta nih hleei hlak kuung ktie ni. Aksang käh pyen lü Pangsiima hlü eia am nih vekuung u.
7 Pangsiim akvaai üng anghläia ah vea kba akvaai üng Pangsiima hlü eia nih ve hnga u ta mat jah mat nih nglooi ei kkhaie ni. Nih mkhye u naküt phi ah sa Jeishüh-a thi noh ah jah mthih mkaaü peet päih ni.
8 “Kah mkhye am ve” tilü nih ngngaih u ta lam nih hmü ktie ni. Aksang am nih ngngaai kuung u.
9 “Kah mkhye vebeh kti ni” tilü Pangsiima ma-a nih mkhye-e nih jah phyeh u ta Pangsiim ngpyuun lü ah pyena kba poh ktia thoon lü nih mkhye-e jah hlät kkhai ni. Am do kya kti naküt phi ah jah mkhyüh peet ni.
10 “I tuh üng phi akkhye am poh khoi laang ngü” nih ti u ta “Pangsiim hleei kti ni” nih ti üng atäng ni. Pangsiima pyen phi nih mlung k'uma am vekuung.