1 Nang nih-e üng kah ning jah mtheh hlü aktung bok ta ahin ni. Ak'hlüng taai bok shang phuhlanga thoon kti Pangsiima booi ngoh naaka kkheet da ngshut kti khotu ngsiim kdäm bok nih ta-ei ktie ni. 2 Ah nih noh Pangsiima hmaai ma-a angsiim ngsaih naak boka khotu ngsiim kdäma khuut poh kti. Ah nih sun kkhyaanga shaka jih shung müüpa am nilü Pangsiima shak ngsiim ngsaih kti müüp ksang üng Pangsiima khuut poh kti. 3 Khotu ngsiim kdäm bok naküt hin ah nih külak jah khah naake sun khah kkhaia ah nih jah msoon ni. Asun kba nih nih-ea khotu ngsiim kdäm bok noh phi ah khah naak vai mat mat veyah kkhai ni. 4 Avai shüa ah nih sun kho mdeka ah ve vaia athoon üng khotu ngsiim kdäma thoon khoh laang kkhai am ni. I lüni ti ta Jüdah-ea thuuma kba hjok khah naak khah kkhaia khotu ngsiime vek ktie ni. 5 Asuna khotu ngsiime noh ta kkhaan khoa vek kti Pangsiima ngsiim ngsaih kti ve naaka joong pan mdan naaka ni khuut ah nih poh u. Moshei phi asun kba thoon kti ni. Moshei phi Pangsiima jih shung müüp shak kkhaia Pangsiim noh “Nang hin msuunga nah hmuh-a nüt yaana kba abäng angseeia nah poh vai ni” tilü ah mtheh. 6 Khrito noh ta Pangsiim jah kkhyaang jah kphye ma lü sha lü do ktia be khüt jah poh peet kti ni. Asuna be khüt hin sha lü do kti hlüng taai bok kti kkhyü taam üng ngphun ei kti ni. Asun kba Khritoa khuut poh phi ahlaan üng Levih mjü khotu ngsiimea khuut poh-a kthaka hlüng taai bok kti ni. 7 Pangsiim noh aksüka kkhyaange mah mah ah nih poh-a be khüt sun ahlü naak am avea ta hleh lü be khüt ah poh be tü vai am hlü kkhai shü. 8 Pangsiim noh ah nih mkhye mshoh naak hmulüta “Booi Pa noh ‘Mhnüüp mat üng ta kei noh Isare kkhyaange jah Jüdah mjü üng be khüt akthaai kah poh kkhai ni. 9 Kei noh ah nih mah püi mah pooke Ekip pea kkhyüh ah nih kut üng jah kaih lü kah jah seh püi üng ah nih-e mah mah be khüt kah poh kti. Tuh-a kah poh vaia be khüt ta asun üng am täng ti. I lüni ti ta ah nih nih-e noh be khüt kphyüm sun am läk lam u. Asuna thoon lü kei noh phi am jah suh lih ei ti ngü. 10 Kei noh Isare-e üng kah poh vai be khüt i hok kba velok kkhai ni ti ta phalok kkhaia ksüün üng kah thuum ah nih su ngngaih k'uma thaan ngüshe ah nih mlung kko k'uma kah yuk kkhai. Kei hin ah nih Pangsiima kah thoon kkhai, ah nih nih-e phi keia kkhyaanga thoon kkhaie. 11 Ah nih püi üng mat noh mat msuh mtheh vai am hlü ti. Ah be noh ah na sun “Pangsiim nah kshing vai hlü kti ni” ah ti vai am ve ti. I lüni ti ta ah nih-e noh akdiik sa-a kkhyüh akdäm bok säpa kei nah kshing päih kkhaie ni. 12 Kei noh ah nih bäü hma naak kah jah mpyeen ei kkhai ni. Ah nih mkhye mshoh naake phi am shüüm ti ngü’” tilü Sangsiim üng ng'yuk kti. 13 Pangsiim noh be khüt akthaai tilü ah pyen hin ah jah peet ksük be khüt sun akphyüma ah mkhyah ni. Phyüm pääng ktie ta am shum ei phyati ulü i vei am lo khyük päih kkhaie ni.