7
Meilik Shedek hin Shalem pea shang phuhlanga thoon lü hlüng taai bok kti Pangsiima khotu ngsiim kdäma phi thoon kti. Apyaham noh shang phuhlange jah hnim lü ngtuk naaka kkhyüh ah lo be üng Meilik Shedek noh dou lolü Pangsiim noh Apyaham üng do kya naak ah peet vai tä sham peet kti. Apyaham noh shang phuhlange jah hnim lü ah yah loa khoh kkhyame üng xa üng mat sun Meilik Shedek üng ah peet ni. Meilik Shedeka ngming ta “Ngpyuun naak üng jah up kti shang phuhlang” ti hlü ni. Ah nih sun Shalema shang phuhlanga thoon lü ah ngming sun “Diim deih naak jah pek kti shang phuhlang” phi ti naak hlü ni. Ah nih hin ah nu jah pa phi am ve. Ah tui kyum ding kyaak naak lo phi am ve. Ah kho mhnüüp ah sut ei naak jah ah päih naak phi am ve. Asuna thoon lü ah nih hin Pangsiima sa kpa üng täng kti. Ah nih hin angshääia khotu ngsiima thoon kti. Asun kba ani ta ah nih hin i hok kba onga däm duh kti ati sun nah nih dang yah hnüh kkhaie ni. Nih mah pook Apyaham noh ngshun poh lü ah yah loa külak xa üng mat ah peet ni. Levih-a mjü üng kyum kya lo ktie noh va khotu ngsiima khuut poh vaia thuum vek kti. Ah nih nih-e sun noh Pangsiima thuuma kba Isare-ea veei xa üng mat lou ei khoh ktie. Ah nih nih-e noh Apyahama kkhyüh kyum kyalo hnga kti ah nih mjü püiea veia xa üng mat lak ktie ni. Meilik Shedek ta Levih-a kkhyüh kyum kya lok kti am ni. Lüphi ah nih noh Apyahama veeia kkhyüh xa üng ka mat lak kti. Pangsiim noh kkhyü taam ah peet. Apyaham üng phi Meilik Shedek noh do kya naak pek kti ni. Do kya naak pek kti hin do kya naak dou ei ktia kthaka däm duh kti atia ngshing ngte kti ni. Xa üng mat dou ei kti khotu ngsiime phi thi-khoh kti kkhyaange ni. Xa üng mat dou kti Meilik Shedek ta Sangsiim noh ah pyena kba anghläia xüng kti ni. Levih-a kkhyüh kyum kya lok kti khotu ngsiime noh xa üng mat dou kyo ulüphi Apyaham noh xa üng mat ah peet üng Levih phi ngpüi hnga kti ni. I lüni ti ta Levih phi Apyahama kkhyüh tui kyum lok kti ni. 10 Apyaham noh Meilik Sedek ah hmuh üng Levih hin Apyahama k'uma veham kti ni.
11 Levih-a kkhyüh tui kyum lok kti khotu ngsiimea kha üng Pangsiim noh Isare kkhyaange üng thuum jah pek kti. Lüphi asuna khotu ngsiimea khuut jah ah nih nih üng shääng ei ktia thuum üng kkhyaange am küm seei khoh u. Asuna thoon lü Pangsiim noh Meilik Shedeka mäi khotu ngsiim kdäm akse ah pou lo shak ni. Ah nih sun Arona kkhyüh tui kyum lok kti khotu ngsiime üng am shääng ei. 12 Khotu ngsiimea mjü jah ning sho angthu nghlai ta thuume phi jah thu hlai vai hlü kti ni. 13-14 Nih nih-e noh nih Booi Pa Khritoa mong nih pyen ktie ni. Ah nih hin Levih-a mjüa kkhyüh tui kyum lok kti am ni. Ah nih sun Jüdah mjüa kkhyüh tui kyum lok kti ni. Jüdah mjüa kkhyüh mat phi khotu ngsiima khuut poh kkhaia am msoon khoi u. Jüdah mjü üng ka noh khotu ngsiima khuut poh kkhaia Moshei noh phi am pyen khoi. 15 Asun kba ani ta Meilik Sedeka kba khotu ngsiim kdäm akthaai Khrito pou lok kti atia ngseei kti ni. 16 Ah nih hin Levih-a kkhyüh tui kyum lolü Mosheia thuuma kba khotu ngsiima thoon lok kti am ni. Käh sim pyak khoh kti angshääia xün naaka hiit üng ah nih sun khotu ngsiima thoon lok kti ni. 17 Sangsiim üng ng'yuk kti ta “Nang hin Meilik Shedeka kba angshääi kuunga khotu ngsiima nah thoon kti ni” tilü ni. 18 Pangsiim noh thuum kphyüm ah hoih ni. I lüni ti ta asuna thuum sun am küm seei lüta shum ei vaia am do. 19 Pangsiim noh Moshei üng ah peeta thuum üng kkhyaange hin am küm seei lo khoh u. Tuh-a ta nih nih-e hin Pangsiim üng sha lü nih säh seng lo vaia ah nih noh do bok kti ääp ei naak jah pek kti. 20 Kona Pangsiima ah ng'yün phi veham kti ni. Ahlaan üng Levih-a mjüa kkhyüh khotu ngsiima khuut ah nih poh lo ksük üng Pangsiim noh ah ng'yün am ve khoi. 21 Booi Jeishüh khotu ngsiima ah thoon loa mong Sangsiim üng ng'yuk kti ta “Booi Pa noh ng'yün ma lü ah mlung thu hlai kkhai am ni. Nang hin angshääia khotu ngsiima nah thoon kkhai” tilü Pangsiim noh ah pyen. 22 Asuna thoon lü Booi Jeishüh Khrito üng Pangsiim noh tuh-a ah poh-a be khüt hin do bok kti ni atia Booi Jeishüh Khrito üng nih mkhüh üp khoh kti. 23 Levih-a kkhyüh tui kyum lok kti khotu ngsiim kho hah vek ktie. I lüni ti ta ah nih nih-e sun thi khoh kti kkhyaangea thoon ulü anghläia ah nih khuut am poh khoh u. 24 Booi Jeishüh Khrito ta angshääia xüng lü anghläia khotu ngsiim khuut poh ei lä kti. 25 Asuna thoon lü ah nih noh tuh-a ksüün jah anghläia ksüün üng ah nih üng Pangsiima veei lok ktie sun jah kuum kyan khoh kti. I lüni ti ta ah nih sun nih kkhyaangea phäh Pangsiima veeia jah tä sham peet khoh kkhaia anghläia xüng kti ni. 26 Booi Jeishüh Khrito hin nih hlü ei küm shak kti khotu ngsiim kdäm bok ni. Ah nih sun ngsiim ngsaih lü mkhye naak, bäü naak üng ngsiim kti ni. Mkhye mshoh kti kkhyaange üng hnga lang kti ni. Pangsiim noh ah nih sun kkhaan khoa kthaka hlüng taai kti üng ah taak ni. 27 Ah nih hin akse khotu ngsiim kdäm boke üng am täng. Ah nih noh amhnüüp tä lü ah päta mkhye mshoh-a phäh khah ma lü kkhyaangea mkhye mshoh naaka phäh khah vai am hlü ti. Ah nih noh kkhyaang abänga phäh ahunata ngpääng kkhaia ah shak üng ah khah ni. 28 Mosheia thuum noh ah nih hlü naak vek kti kkhyaange sun khotu ngsiim kdäm boka ah jah msoon ni. Asuna thuuma kona Pangsiim noh ah kkhyü taam jah ng'yün naak üng ah sa kpa sun khotu ngsiim kdäm boka ah msoon ni. Ah sa kpa sun angshääia phäh ah küm seei shak pääng ni.