6
Asuna thoon lü Khritjaan msuh mtheh naak ksük ta-hüt lü nih nglään vai u. Mkhye naaka kkhyüh vuuk lü Pangsiim jum ei naak ksük ta käh nih ngthei be ti xa vai u. Patisoa mong, kut mtaana mong, thipääng ktiea thoh naak bea mong, Pangsiima angshääia si jaang naaka mong phi am nih ngthei ti u. Pangsiim noh mkot ah jah mboon ta jum ei naaka ngkhääng naak vaia mong nih ngthei hnüh kom u. Pangsiima kvaai ahun hmulü nglat be ktia kkhyaang ta ah mkhye üng vuuk be kkhaia am ku ei khoh ti. Asuna kkhyaange sun Pangsiima peet bä naak mdep pääng lü Mkhyangsiim yah ei pääng ktie ni. Pangsiima kkhyü do kti atia angtea ngja-kya ktie. Ngooia lok kkhaia kha-a hiit phi mdep pääng ktie ni. Kona ah nih nih-e sun Pangsiima kkhyüh ah nih nglat be ta ah nih vuuk lo be vai am thoon khoh ti. I lüni ti ta ah nih nih-e noh Pangsiima sa kpa sun kkhyaangea hmaai ma-a mkeei mshong ulü baan lam ktunga ah nih hneen ngbeh be tüa mäi ni. Mdek noh aläa a-lok ktia yoh tui dou lü kkhyaang noh ah ei ook vaia ah sho nglin ah ngtheih paai lo shak ta Pangsiim noh asuna mdek sun do kya naak ah peet ni. Lüphi asuna mdek sun noh nghling thing, mphyo, ei o lü käh ng'yah kti ah pong lo shak ta asuna mdek sun Pangsiima mküüma thoon to kkhai ni. Akpäih naaka ta ah nih nih-e noh mei üng shi kkhaie ni. Kah püieo, kei nih-e noh asun kba pyen kyo u ngüshe phi nang nih-e noh kuum kyan naak üng shääng ei kti Pangsiima do kya naak nah nih yah kkhaie ni atia kah nih mkhüh üp kti ni. 10 Pangsiim ta ngpyuun kti ni. Nang nih-e noh mhlä kphya naak üng khuut poh u kti lü Pangsiima xüh shoh-e Pangsiima phäh-a nah nih jah mshü mseei, tuh vei säpa nah nih poh mshah sun Pangsiim noh shüüm kkhai ni. 11 Mat siim mat siim noh akpäih naak säpa nah nih mtun ei kyet vai kah nih hmaaü ei u ni. Asun kba nah nih thoon ta nah nih ääp ei küm seei lok kkhai. 12 Nang nih-e am ning jah dam hlü shak u-ngü. Jum ei naak jah mlung mshaaü naak üng Pangsiima kkhyü taam küm seei ktia yah ei ktie nah nih jah hju tuih vai kah nih hlü ei ni.
13 Pangsiim noh Apyaham üng kkhyü taam ah peet üng “Kah kkhyü taama kba kah poh ngshaai kkhai” atia ng'yün kti ni. Ah päta kthaka däm kti am ve ti ktia thoon lü ah päta ngming üng ng'yün kti ni. 14 Pangsiim noh “Nang hin angshaaia do kya naak ning pe-ngüshe kah ning pung pyah shak kkhai ni” tilü ah pyen. 15 Apyaham noh mlung mshaaü naak üng yüng ei lü Pangsiima kkhyü taam yah ei kti ni. 16 Kkhyaang noh ah nih ng'yün üng ta ah päta kthaka hiit mah kti üng ng'yün ktie ni. Mat jah mat ah nih ngvook üng phi ng'yün üng ah nih hjaüh ni. 17 Asun kba ni Pangsiim noh ah nüt yaan pääng i tüh-a phi am ngthu nghlai ti laang kkhai ati sun ah khoh shäänge üng angshing ngtea jah kshing ei hlü shak kti ni. Asuna thoon lü kkhyü ah jah taam peet üng ng'yün sheih yü kti ni. 18 Asun kba ni i hok kba phi käh ngthu nghlai thei kti Pangsiima kkhyü taam jah ah ng'yün nghngih vek kti. Pangsiim hin asu xooi üng am hleei khoh. Asuna thoon lü nih Pangsiima veei ngtung ngjiin ei kti naküt ta ngjung ktha kho hah nih yah ei ktia thoon lü Pangsiim noh nih nih-e üng ah jah mdana ääp ei naak ngkhääng ktia nih man khoh kti. 19 Asuna ääp ei naak hin nih mlung kkyoonga lung tong ni. Asuna ääp ei naak sun jih kda-a hnua angsiim ngsaih naak bok Pangsiima hmaai ma kuunga ngkhääng lü k'üp eia ngo kyet kti lung tong üng täng kti ni. 20 Booi Jeishüh Khrito hin nih nih-ea phäh-a Pangsiima hmaai ma-a ah nasit kti ni. Ah nih ta Meilik Sedeka kba angshääia khotu ngsiim kdäm boka thoon lok kti ni.