12
1 Jum ei naak üng shak shi kti kho hah pa noh nih nih-e jah leng suum lü ngmei ngvuuka kba jah ngvai ktie ni. Asuna thoon lü nih jum ei naak lam jah kyoh kti phüih k'yüh jah nih nih üng kop kti nih mkhye naak nih jah hoih kom u. Pangsiim noh ah jah don shaka ngsaam ei naaka nih mlung mshaaü lü nih dong kom u.
2 Nih jum ei naak sut ei shak lü küm seei shak ktia Booi Jeishüh nih bük kyet vai. Booi Jeishüh sun Pangsiim noh ngooia ah peet vai je kyai naaka phäh baan lam ktunga khui kha khaam ei kti ni. Ngke ei na-phya kti thih naak ia phi am ngngaai. Pangsiim noh ah Booi ngoh naaka kkheet da ah ngshut shak ni.
3 Mkhye kti kkhyaange noh ah nih sun i hok kba onga kpet mjak khüt ktie ati sun nih su ngngaai vai u. Asun üng nang nih-e boong kha lü nah nih ktha käh ah jai lo vaia phäh ni.
4 Nang nih-e noh mkhye naak ngshun püi kyo u kti lüphi nah nih thi lut lo onga kshü kset naak am khaam ei ham u kti.
5 Pangsiim noh ah sa-a kba ning jah ngngaai lü ktha ah ning jah peeta kkhyü nah nih mhnih hnüh u mä. “Kah sao, Booi Pa noh ah ning him mseei ei bä. Ah nih noh ah nih msing üng phi käh ktha she bä.
6 I lüni ti ta Booi Pa noh ah kphya naak naküt jah msing kti. Ah sa vaia ah jah dou daan naküt msääi msing kti ni” tilü ah pyen.
7 Pangsiim noh ah jah te üng ah päta sa-a jah ngngaai kti ni. Ah pa noh am ah te ah sa ve khoi ktio.
8 Sa naküta kba msing am nah nih khaam ei ta ah ning jah sa ksanga käh thoon lü ngsoona sa-a ni nah nih thoon kom.
9 Kho mdeka nih pa noh ah jah him pheeka phäh üng nih lei shong ni. Asun kba ani ta Mkhyangsiim jah shak jah pek kti nih Pa-a thoon kti Pa Pangsiim sun sha lü ksang naak vaia looi ngkäih kti ni.
10 Mti sha üng nih pa noh ah päta tüüma noong vei ni ah jah him. Pa Pangsiim noh ta nih do naak vaia ah nih-a kba nih ngsiim ngsaih lo vaia ah jah msing ni.
11 Nih nih noh te naak nih khaam ei üng ah do naak käh nih hmulü ah jah mshoh ei va nih kshing kti. Hnua ta asun kba msing nih khaam eia phäh üng diim deih lü pyuun lü nih ve thei kti.
12 Asuna thoon lü nah nih baan kha kti säm shak be ua. Let let kti nah nih mkhuuk ngkhääng shak ua.
13 Pyuun ktia lam üng sit ei lä ua. Asun üng ah kho kthi phi käh ngshuk ei lü ah kho do lobe kkhai ni.
14 Kkhyaang naküt ng'ye ngpüi vai mtun ei ua. Ngsiim ngsaih ktia shak üng velü mtun ei ua. Am ngsiim ngsaih kti noh ta u noh phi Pangsiim am hmu yah.
15 Pangsiim noh ah ning jah peet hlüa bä naak nah nih bäng noh nah nih yah ngshaai vai ua mtun ei ua. Thing dung akha ah pya ah ngshui eia kba nah nih kshuunga püi mlung kko naak ah pya käh angshui ei vaia mseei ei u bä. Asun kba am ani ta sok sek beleh nah nih kshuunga nung lolü kkhyaang kho hah mtuih shelok kkhaie ni.
16 Esaaua kba boh bah lü Pangsiim üng shääng kti üng am suh lih ei ktia u phi käh nah nih thoon lo vaia mseei u bä. Esaau ta sa kpa mkhonga thoon lü Pangsiim noh ah peet vaia do kya naak sun ei na-pat sa däk üng ah joih ei ni.
17 Hnua ta sa kpa mkhong üng ah pa noh ah peet vai do kya naak sun Esaau noh hlü ei kyo lüphi ah pa noh ah not ni atia nah nih kshing ktie ni. Ah kphyü tui bolo kyo lüphi aksanga ah vuuk naak be vaia lam am ve ti.
18 Nang nih-e hin Isarea kkhyaangea kba mik üng hmuh yah kut üng hneh yah-a msuunga nah nih lok ktie am ni. Isare kkhyaange ta Shi Naai msuunga lo-ulü dääi ktia mei amthan nu jah anghmüp, mong üa khi kti phi hmu-yah ktie ni.
19 Ah nih nih-e noh kpuung tuma kthai ngjak ktie. Kona kyüh shek kkhüt kti kkhyü pyen kti kthai phi ngjak ktie. Kyüh ei tong ulü asuna kthai noh ah nih nih-e käh ah jah ngsi ngjaang püi ti vaia nghui ktie.
20 I lüni ti ta asuna kthaia mkhyah noh “Ahina msuung hin kkhyüng kshei hngoh noh phi ah hneh ta lung üng nah nih khoong tong vai u” tilü ah pyen sun am suun ei khoh u.
21 Ah nih hmuh u sun kyüh she kolaih lü Moshei noh “Kyüh ei ngüshe kah let let ei kti ni” tilü ah pyen.
22 Nang nih-e ta Shion msuunga xüng sheei kti Pangsiima mlüh nua thoon kti kkhaan khoa ka Jeirüh Shalema nah nih lok ktie. Käh jah kkheh kdät thoong kho hah kkhaan kho ngshäea je kyai lü ah nih ngkhääm naaka nah nih lok ktie.
23 Ah nih ngming kkhaan khoa ng'yuk kti Pa Pangsiima ah sa ksükea ngkhääm naaka nah nih lok ktie. Kkhyaang naküta si jaang Booia thoon kti Pangsiima veei nah nih lok ktie. Pangsiima jah pyuun shak kkhyaangea ngmüi mkhyaea veei nah nih lok kti.
24 Pangsiim jah kkhyaange jah kphye lü be khüt akthaai jah poh peet kti Booi Jeishüh-a veei ni, ah nih noh ah kshaih-a thia veei ni nah nih lok ktie. Asuna thi noh Apela thia kthaka do bok ktia kkhyü pyen kti.
25 Asuna thoon lü nang nih-e ning jah ngsi ngjaang püi kti käh not lü nah nih su ngngaih vaia mseei ua. Ahina kho mdeka Pangsiima kkhyü ngjalü am ksang nak ktie ta Pangsiima thüi shei naak üng am lät u. Asuna thoon lü kkhaan khoa kkhyüh Booi Pa msääi msiing ngjalü am nih ksang naak u ta Pangsiima thüi shei naak üng sha lü am nih lät khoh u.
26 Ahlaan üng Pangsiima kthai noh kho mdek kshüün kti. Tuh-a ta Pangsiim noh “Kei noh ahun kah kshüün be tü üng ta kho mdek däk am nilü kkhaan kho phi kah kshüün peh be tü kkhai ni” tilü kkhyü ah taam.
27 Pangsiim noh “Ahun kah kshüün be tü kkhai” tilü ah pyen üng ah mhnün mseng naküt ngshüün lü khyük leih hü kkhaie ati sun ngshing ngte lok kti. Käh ngshüün ngkhyet thei ktie däk ngseih kkhaie.
28 Asuna thoon lü nih nih-e noh käh ngshüün khoh ktia pe Pangsiim noh jah pek kkhaia thoon lü je ei lü Pangsiim nih hjok khah vai u. Lei shoong lü ah nih-a mlung hlüa nih ve vai u.
29 I lüni ti ta nih nih-ea Pangsiim hin angshääia abäng uui khoh ktia mei ni.