HEPYE
Hepye shaang üng kbia sa
1
1 Ahlaan üng Pangsiim noh nih mah püi mah pooke ning amjü mjü üng shahma ngsiime jah shum ei lü anghläia jah ngsi ngjaang püi kti.
2 Tuh akpäih naaka kha üng ta Pangsiim noh nih nih-e ah sa kpa üng jah ngsi ngjaang püi kti. Ah sa kpa üng va Pangsiim noh kho mdek mhnün mseng kti. Pangsiim noh ah sa kpa sun akve naküt jah ka nak kkhaia phi ah msoon ni.
3 Pangsiima jou taai sun ah sa kpa üng jaaü jaaüa vaai kti. Ah mlung kkyoong ngnei shak hin Pangsiim üng abänga täng kti. Hiit mah ktia ah kkhyü üng kho mdek, kho mik, mah khya, aai shi hin ah shääm kyet ni. Ah nih noh kkhyaange sun ah nih mkhye mshoh naaka kkhyüh jah mthi kpyo ma lü kkhaan khoa hiit mah bok kti Pangsiima kkheet da ngshut vaai kti ni.
4 Pangsiim noh ah sa kpa ngming ah shui hin kkhaan kho ngshäea ngminga kthaka adäm duh-a kba ah sa kpa phi kkhaan kho ngshäa kthaka däm duh lok kti.
5 Pangsiim noh “Nang hin kah ning sa kpa ni, tuh ngooi kei hin nanga pa-a kah thoon lok kti ni” tilü kkhaan kho ngshä mat laang üng phi am pyen khoi. Pangsiim noh “Kei hin ah nih-a pa-a kah thoon lok kkhai. Ah nih ta keia sa-a thoon kkhai ni” tilü kkhaan kho ngshä mat laang üng phi am ti.
6 Pangsiim noh ah sa kpa ksük kho mdeka ah tüih lo üng hin kba ah pyen ni. “Pangsiima kkhaan kho ngshä naküt noh ah nih sun hjok khah yah kkhaie” ah ti.
7 Sangsiim üng Pangsiim noh “Kkhaan kho ngshäe kho khia kba ah jah thoon shak. Ah xüh shoh-e mei kdääia kba ah jah thoon shak” tilü kkhaan kho ngshäea mong ah pyen ni.
8 Pangsiim noh ah sa kpa-a mong ta “O Pangsiimo, nah Booi ngoh naak hin ngshääi ei ktia vek kkhai ni. Nah pe sän pyuun naak üng nah up kkhai ni.
9 Nang noh pyuun naak nah mlung hlü nak kti ni. Thuum lüüm kkaan naak nah thi nak kti ni. Asuna thoon lü nah Pangsiim noh ning msoon lü nah püiea kthaka je kyai naak ah ning peet bok ni” tilü ah pyen.
10 Pangsiim noh phi “Nang Booi Pa noh ahlaana kkhyüh ahina kho mdek nah mhnün mseng ni. Nah päta kut üng kkhaan kho phi nah tüüi doon ni.
11 Asune ta sim pyak khyük leih kkhaie. Nang ta anghläia nah ve-ei lä kkhai ni. Kho mdek jah kkhaan kho ta shui shaka kba phyüm lok kkhaie.
12 Kho mdek jah kkhaan kho ta jih ngvaih-a kba nah khep kkhai ni. Shui shak thu hlaia kba ngthu nghlai kkhai ni. Nang ta i tüh-a phi am nghlai kti. I tüh-a phi am ü lok kti. Nah ksüün am päih” ah ti ni.
13 Pangsiim noh “Nah ye nah kho pha kkea kah taak veia kah kkheet da ngshuta” tilü kkhaan kho ngshä mat üng phi am mtheh khoi.
14 Asun kba ani ta kkhaan kho ngshäe ta i ni. Ah nih nih-e ta ah nih bänga Pangsiima xüh shoh-e ni. Ah nih nih-e sun kuum kyan naak yah ktie jah ku ei kkhaia ah jah tüih lo ni.