TESHAH LONIH-EA SA ANGHNGIH NAAK
Polüh noh Teshah Lonih mlüh shaang üng ah kbia sa anghngih naak
1
1 Kei nih Polüh, Shi Vanuh jah Timotih noh Teshah Lonih mlüh-a vek kti, nih Pa Pangsiim jah Booi Jeishüh Khrito üng shääng ei ktia shaang üng sa kah nih ning jah kbi lok kti ni.
2 Pa Pangsiim jah Booi Jeishüh Khrito noh bä naak jah diim deih naak ning jah peshe.
3 Kah be naeo, nah nih phäh-a Pangsiim anghläia kah nih je kyai ei naak vai vek kti. I lüni ti ta nah nih jum ei naak däm lokhüt kti ni. Mat jah mat noh nah nih mhlä kphya naak phi nung lok kti. Asuna thoon lü Pangsiim asun kba kah nih je ei vaia looi ngkäih kti ni.
4 Asuna thoon lü kei nih-e noh Pangsiima shaange üng nang nih-ea mong kah nih pyen hü hlü pyei ktie ni. Mkhuh mhlih mpyeen sheet kho hah shoong u kti lüphi ngkhääng kyet lü nah nih jum ei ktie ati sun kah nih pyen hü ktie ni.
5 Pangsiima si jaang hin ngpyuun kti atia ahina phäh üng ngshing ngte lok kti ni. I lüni ti ta nang nih-e hin Pangsiima pea phäh khui kha nah nih khaam ktie ni. Asuna khui kha naak üng nang nih-e Pangsiima pe üng sha lü nah nih looi ngkäih lok ktie.
6 Pangsiim pyuun ktia thoon lü ning jah mkhuh mhlih ktie jah mkhui mkha be kkhai ni.
7 Nang nih mkhuh mhlih suun ei ktie phi kei nih-e phi Pangsiim noh mlung ye naak jah pek kkhai ni. Booi Jeishüh mei kdääi üng kkhaan khoa kkhyüh lü hiit mah kti ah kkhaan kho ngshäe mah mah ah nih pou lo üng asun kba thoon lok kkhai.
8 Pangsiim am kshing hlü ktie jah nih Booi Jeishüh-a mong thang kdo kkya am ksang na-hlük ktie mtaam jah pek kkhai ni.
9 Ah nih nih-e sun angshääia sim pyak naak khaam ei kkhaie. Jou taai mah kti jah hiit mah kti Booi Pa-a mik hmaai üng angshääia ngkya hnüh kkhaie ni.
10 Ah lai lo bea mhnüüp üng asun kba thoon lok kkhai. Asuna mhnüüp üng Booi Jeishüh-a ngsiim ngsaih kti kkhyaange, ah nih jum ei kti abäng noh mün na-ulü mküüi mkhyah kkhaie. Nang nih-e noh kah ning jah mtheh thang kdo kkya nah nih jum ei ktiea thoon lü nang nih-e phi nah nih ngpüi hnga kkhaie ni.
11 Asun kba ngngaai lü anghläia kah nih ning tä sham peet ktie. Pangsiim noh ah ning jah xü üng looi ngkäih kkhaia ah ning jah piit pyaan vaia kah ning jah tä sham peet ktie ni. Do kti nah nih mlung ktüüm jah jum ei naak üng khuut nah nih poh naak sun Pangsiim noh ah hiit üng küm seei shak she.
12 Asuna ning üng nang nih-e üng nih Booi Pa Jeishüh Khritoa jou taai ngshing ngte lok kkhai. Nih Pangsiim jah nih Booi Jeishüh Khritoa bä naak üng Booi Jeishüh noh phi nang nih-ea jou taai ngshing ngte shak kkhai.