5
1 Kah be naeo, Booi Pa ah kyum lo vai i tüh-a ksüün, i a kha atia yuk vai am hlü.
2 Booi Jeishüh-a lo naak vaia mhnüüp hin mthana mpyuk eia kba ah lai lo vai sun angtea nah nih kshing ei pääng ktie ni.
3 “Ye dip lü diim deih lü ve-ei na-phya pyei kti ni” tilü kkhyaange noh ah nih pyen hü um üng ahunat nua sim pyak naak shoong ei kkhaie ni. Sa mah hlü ktia nghnu mi asho xata ah kkhyüng ksooi ah mshoh ei loa kba ah nih nih phi am lät ei laang u.
4 Nang nih be nae ta nghmüp mthan üng am shääng ei u kti. Asuna thoon lü Booi Jeishüh-a kyum lo be vaia mhnüüp hin nang nih-ea phäh-a ta am ngshü ngseei ham u kti lü mpyuk eia kba am thoon lo.
5 Nah nih bänge hin akvaai üng nah nih shääng ei ktie ni. Mhnüüp üng nah nih shääng ei ktie ni. Nih nih-e hin nghmüp mthan üng am nih shääng ei u.
6 Asuna thoon lü nih nih-e ta am jum ei ktiea kba am nih ip ei yah u. Asiim kyaaia nih mtät yah kkhaie ni.
7 Kkhyaange ta mthana ip ktie. Mthana mpyüi mhmah khoi ktie.
8 Nih nih-e ta mhnüüp üng nih shääng ei ktiea thoon lü angthiima nih ve vai u. Jum ei naak jah mhlä kphya naak ngkyaang hjoop naaka kba shui sha ua. Kuum kyan naak yah vaia ääp ei naak sun ngtuk lu khüma kba khuh ei ua.
9 Pangsiim noh mtaam ah peet vaia ah jah xü am ni. Nih Booi Pa Jeishüh Khrito üng kuum kyan naak nih yah kkhaia ah jah xü ni.
10 Khrito ah lo be üng nih xüng ham ulü phi nishe, nih thipääng lü phi nishe ah nih-a hlonga nih ve yah vaia nih phäh-a ah shak ton kti.
11 Asuna thoon lü tuh vei säpa nah nih poh-a kba tuh kkhyüh lüphi mat noh mat ktha pelü jum ei naak angkhääng lo vaia nah nih püi kpüi kpak ua.
12 Kah be naeo, nah nih veeia Pangsiima khuut poh ktie jah lei shong ubä tilü kah nih ning jah sük hlük ktie ni. Ah nih nih-e sun tui lam ning jah mhnüh mtheh kkhaia Pangsiima kkhyü ning jah msuuk mtheh kkhaia Booi Pa noh ah jah xü ni.
13 Ah nih khuuta phäh-a akdoa jah lei shong lü jah kphya na-ubä. Nah nih päte käh ngtuun ngvolü akdiima ve-ei ubä.
14 Kah be naeo, dam ktie jah msääi ua. Ktha she kti üng ktha jah pe-ua. Hlo hleep naak üng akjäa ngpüi hlü ktie jah kpüi kpak ua. Nah nih püie naküt üng nah nih mlung mshaaü ua.
15 Nah nih kkhaana mkhye kti käh nah nih thung ei be vaia mseei kyet ubä. Khritjaan be nae jah kkhyaang naküt üng anghläia akdo nah nih poh vaia mtun ei ua.
16 Anghläia je kyai ua.
17 Ngshääi ei ktia tä sham ua.
18 I a nah nih thoon ve üng phi Pangsiim je ei ubä. Booi Jeishüh Khrito üng nglooi ei kti nang nih-ea phäh-a Pangsiim noh asun kba hlü ei kti ni.
19 Mkhyangsiima kthai käh diim shak ua.
20 Mkhyangsiim noh ah shahma shak sun käh nah nih mdih mshuui vai.
21 Msuh mtheh naak abäng jah saam lü ngbüh ktia ngkho nah nih dou vai.
22 Khye kti abäng naküt nah nih mphen vai u.
23 Nih nih-e diim deih naak jah pek kti Pangsiim noh nang nih-e küm seei ktia ning jah ngsiim ngsaih shak she. Pangsiim noh nah nih ngmüi mkhya jah mlung kkyoong jah puum sha ning jah mtät mshou lü Booi Jeishüh Khritoa lo be veia bäü naak käh vek kkhaia ning jah mtät she.
24 Ning jah khü kti Pangsiim hin kkhyü shing üng vek ktia thoon lü asun kba poh kkhai ni.
25 Kah be naeo, kei nih-ea phäh phi tä sham ubä.
26 Khritjaan be nae abäng ngsiim ngsaih kti uut naak üng jah dou dang ubä.
27 Ahina sa hin Khritjaan be na naküt üng nah nih jah büh ngjaak shak vaia Booi Pa-a ksah-a angseeia kah ning jah sük kti.
28 Nih Booi Pa Jeishüh Khritoa bä naak nang nih üng veshe.