4
1 Kah be naeo, Pangsiim noh ah hlü ei vaia i hok kba ve soh vai ati sun kah nih veeia nah nih ngsuuk pääng ktie ni. Asun kba avea ta nah nih ve kyo ktie. Lüphi kei nih-e noh Booi Jeishüh-a ksah-a sha lü küm seei ktia nah nih ve vaia kah nih ning jah nghui na-hlü ktie ni.
2 Booi Jeishüh-a hiit üng i hok kba kah ning jah msuuk mtheh nah nih kshing ktie ni.
3 Nang nih-e ngsiim ngsaih lü ngla käh nah nih shui vai jah kkhyaanga nghnu mi, kpa mi käh nah nih ve püi vaia nah nih phäh-a Pangsiim noh mkhüh nak kti.
4 Nang nih kpa mie hin nah nih kkhyu lou ei lü Pangsiima hlü eia kba kkhyaangea hmuh-a phi looi ngkäih ktia nah nih kkhyua dä ve soh ua.
5 Pangsiim am kshing kti kkhyaang mjü kse-e ah ui joong vea ah nih ve soh-a kba käh thoon ubä.
6 Nih püi po käh jah mhleei mhlak lü ah nih kkhyu käh nah nih bäü naak laang vai. I lüni ti ta asu banga ngkho sun Booi Pa noh kyüh shek ktia mtaam jah pek kkhai ni ati sun angseeia kah ning jah mtheh pääng ktie.
7 Pangsiim noh nih nih-e boh bah kkhaia ah jah xü am ni. Ngsiim ngsaih ktia ve soh kkhaia ah jah xü ni.
8 Asuna thoon lü ahina msuh mtheh naak not ktia kkhyaang ta msuuk mtheh kti kpet mjak kti am nilü Mkhyangsiim ning jah pek kti Pangsiim kuung kpet mjak kti ni.
9 Khritjaan be nae nah nih jah kphya naak vai kei noh kah yuk vai am hlü ti. I lüni ti ta Pangsiim kuung noh mat jah mat kphya naak vai ah ning jah mthei pääng ni.
10 Nang nih-e noh Make Tonih hne naküta ka Khritjaan be nae nah nih jah kphya naak ngshing ngte lok kti. Lüphi asuna kthaka nah nih jah kphya naak bok bok vai kah nih ning jah msääi hlü ham ktie.
11 Kei nih-e noh ahlaan üng kah nih ning jah mtheh khoia kba büh büh-a velü kkhyaanga sok sek üng käh vaang ngpüi lü päta lo pät noh kbe ei vaia khüüi khoom lü nah nih mtun ei vai u.
12 Asun kba nah nih ve ta Booi Jeishüh Khrito am jum ei ktie noh phi ning jah lei shong kkhaie ni. Kona nang nih üng hlü ktia phäh kkhyaang üm naak vai phi am hlü.
13 Kah be naeo, thi pääng ktiea mong angtea kah ning jah kshing hlü shak kti ni. Asun üng ta ah nih ääp ei vai am vek ktiea kba am puk she u kti.
14 Booi Jeishüh thi ma lü thou be kti ati sun nih jum ei ktie ni. Kona Booi Jeishüh jum ei lü thik ktie sun Pangsiim noh Booi Jeishüh mah mah jah la-lo be kkhai atia phi nih jum ei ktie.
15 Tuh-a kah ning jah msuh mtheh hlü ta Booi Pa-a kkhyü ni. Booi Pa-a lo bea mhnüüp üng ta nih nih xüng ham ktie hin noh thipääng ktie jah ta-hüt lü nih nahma kkhaie am ni.
16 Booi Pa kuung ah kyum lo be üng ta mkhyah kthai kpok lü, kkhaan kho ngshä kdäm boka kthai jah Pangsiima kpung tum kthai üng lok kkhai ni. Asun üng Khrito jum ei lü thi pääng ktie aksüka thou be ma kkhaie.
17 Kona nih nih xüng ham ktie Pangsiim noh kho ngmeia jah jäk lü thipääng ktie mah mah Booi Jeishüh üng kho liva-a nih ngkhyum kkhaie. Asun üng ta Booi Pa-a hlonga anghläia nih ve-ei kkhaie.
18 Asuna thoon lü ahina kkhyü hin üng mat noh mat ktha pe-ua.