1 Kah be naeo, nah nih veeia kah nih lo u hin alapa am ve atia nah nih pät kuung noh nah nih kshing ktie ni. 2 Kei nih-e Teshah Lonih mlüh-a kah nih lo hlaana Philipih mlüh-a mkhuh mhlih jah hnep kyem naak kah nih khaam ei kti atia nah nih kshing ktie ni. Ngnü ngsheng naak shoong kyo u ngü she phi thang kdo kkya nah nih veeia kpyaü lok kkhaia Pangsiim noh nääng kyan naak jah pek kti ni. 3 Kei nih-e hin noh nang nih-e lam ning jah hmü hlü shak lü am ngsiim ktia mhnüt msak lü ning jah mhleei ei hlü lü kah ning jah msuuk mtheh ktie am ni laang. 4 I lüni ti ta Pangsiim noh kei nih-e ah jah msuh mtheh-a kba ni kah nih pyen u. Pangsiim noh kei nih-e jah saam pääng lü thang kdo kkya kpyaü kkhaia ah jah mtaat ni. Asuna thoon lü kei nih-e noh kkhyaangea hlü ei vaia am mtun ei u ngü. Kah nih mlung ngnei jah bük kti Pangsiima mkhüh hnip naak vaia ni kah nih poh pyen u. 5 Nah nih veeia kah nih lo üng ning jah mküüi mkhyah ei ktia hana som lü am pyen u ngü. Ngui xüi khoh kkhyam hlü ei lü thang kdo kkya kah nih kpyaü ktie phi am ni. Asun nah nih pät noh phi nah nih kshing ktie. Pangsiim phi kei nih-ea shak shi ni. 6 Nang nih-e noh nah nih jah mküüi ei vaia ni, akse-e noh ah nih jah mküüi ei vaia phi am mtun ei u ngü. 7 Kei nih-e hin Khritoa ngshäa thoon u ngüshe nah nih jah mbei mbook büh ten vaia kah nih looi ngkäih kyo ktie. Lüphi nah nih veeia kah nih ve k'um üng ah nu noh ah sa ah sih khäh-a kba ahnip hnooia kah nih ning ve püi u ni. 8 Kei nih-e noh nang nih-e kah ning jah kphya nak kkhüt ktia thoon lü Pangsiima thang kdo kkya ning jah ngjaak hlü shak däk käh nik ktia, nah nih phäh-a kah nih shak ton vaia phi kah nih ngshääm ei kyet ktie. I a thoon lüni ti ta kah nih ning jah kdü naak kkhüt u ni. 9 Kah be naeo, kei nih-e noh ngnoi ngsai lü khuut kah nih poh nah nih shüüm ham ktie, am ni bä. Nah nih veeia Pangsiima thang kdo kkya kah nih kpyaü k'um üng jah tu msah lü käh nah nih jah ngnü ngsheng naak vaia amhnüüp mthan nghläia kah nih khüüi khoom ktie ni.

10 Kei nih-e hin Pangsiima hlü eia ngpyuun lü kbäü ei naak käh ve laang kkhaia nang nih jum ei ktiea veeia kah nih vek ktie ni. Asuna mong üng nang nih-e jah Pangsiim hin kei nih-ea shak shi ni. 11 Ah pa noh ah sa nae khäh sih msuuk mtheh lü ktha ah jah peeta kba kei nih-e noh mat siim mat siim kah nih ning jah büh ten hin nah nih kshing ei ktie ni. 12 Pangsiima jou taai mah kti ah pea nah nih ngpüi vaia ah ning jah xü ni. Pangsiima khü naak üng looi ngkäih lü nah nih ve soh vaia kah nih ning jah hlo phok ktie.

13 Nah nih veeia Pangsiima kkhyü kah nih kpyaü lo hin kkhyaanga mhmüüi mpyonga kba käh nik tia, Pangsiima mhmüüi mpyonga kba nah nih dou daang ktie. Aksanga ta Pangsiima kkhyü kuung ni. Asuna Pangsiima kkhyü sun noh nang nih jum ei ktiea mlung kkyoong ning jah piit pyaang kti ni. Asuna phäh üng phi Pangsiim kah nih je ei ktie. 14 Kah be naeo, Jüdah hnea Booi Jeishüh Khrito üng shääng ei kti Pangsiima shaang üng kae nah nih jah hju mtääm ktie ni. I lüni ti ta Jüdah be nae sun ah nih mjü üng kae noh ah nih jah mkhuh mhlih-a kba nang nih-e phi nah nih mjü üng kae noh ning jah mkhuh mhlih hnga ktie ni. 15 Jüdah mjü üng kae noh Booi Jeishüh jah ah nih shahma ngsiime jah hnim ktie. Kei nih-e phi jah mkhuh mhlih ktie. Ah nih nih-e noh Pangsiima mlung hlüa phi am poh u. Kkhyaang naküta yea phi thoon lok ktie ni. 16 Kkhyaang mjü kse noh kuum kyan naak ah nih yah vaia thang kdo kkya kah nih kpyaü vai phi jah ngya hlük ktie ni. Asun sun ah nih mkhyea küm mseei naak ni. Akpäih naaka ta Pangsiim noh akshe hleena mtaam jah pek kkhai ni.

17 Kah be naeo, nang nih-e jah kei nih-e hin noong vei nih ngkya ktie. Puum sha üng akthuuka nih ve kyo ulüphi kah nih mlung ta nang nih-ea veei siima ve-ei lä lü nih nghmuh ei be vai ua kah nih mtun ei kkhüt ktie ni. 18 Nah nih veeia kah nih lo hlü be tü ktie ni. Kei, Polüh hin nah nih veeia lo vaia kah ngpyaih xat lä kti. Lüphi Shatan yaai pa noh jah ngya kti ni. 19 I lüni ti ta nih Booi Jeishüh Khrito ah pha lo be üng kei nih-ea ääp ei, je kyai naak, hmaai mah naak vai hin i ni nih ti lo ta nang nih-e kuung hin va, am ni bä. 20 Aksanga ta kei nih-ea hmaai mah naak vai je kyai naak vai ta nang nih-e kuung ve ni.