3
1 Kalatih kkhyaang nghmoongeo, lam ksang nah nih hoih vai ua i a ksoh noh ah nih ning poh ei u ni. Booi Jeishüh baan lam ktung üng ah thih sun mik üng hmuh-a kba kuunga nah nih ngngaih kya vai ua kah nih ning mtheh pääng u va am nishü.
2 Kei üng mat sa däk nah mtheh be ma ua. Nang nih-e hin noh thuum läk lam naak üng Pangsiima Mkhyangsiim nah nih yah ei lok ktie mä. Asun kba am ani üng thang kdo kkya ngjalü jum ei naak üng Mkhyangsiim nah nih yah ei lok ktie mä.
3 I lü ahin kba pi pia ta nah nih nghmoong kkhaie ja. Mkhyangsiima kpüi kpak üng jum ei naak seh lam nah nih sut ei ktie. Tuh ta nah nih päta ngjung ktha üng akpäih naak säp seh vaia nah nih mkhüh nak ktie ve-mä.
4 Khui kha mpyeen sheet nah nih khaam ei hin alapa thoon to kti mä. Am ni ham. Alapa ta am thoon ham.
5 Pangsiim noh Mkhyangsiim ning jah buih peet lü nah nih veeia mün sam kshe ah poh hin nang nih-e noh thuum nah nih läka phäh mä. Thang kdo kkya ngjalü nah nih jum ei lo ua phäh to mä.
6 Sangsiim üng Apyahama mong ng'yuk kti ta “Apyaham noh Pangsiim ah jum eia phäh Pangsiim noh ah ng'ye püi be päänga ah ngngaih ni” tilü vek kti.
7 Asuna thoon lü Pangsiim jum ei naküt kti Apyahama koon shaang aksanga thoon kti ni.
8 Pangsiim noh kkhyaang mjü kse-e sun jum ei naak üng jah ng'ye püi be kkhai ati sun Sangsiim üng malam pyen vek kti. Asuna thoon lü Pangsiim noh Apyaham üng thang kdo kkya ah namtheh ei Sangsiim üng ng'yuk kti. “Hina kho mdeka vek kti kkhyaang mjü naküt noh nang üng do kya naak yah kkhai” tilü Pangsiim noh Apyaham üng malam pyen ah mtheh.
9 Apyaham noh Pangsiim jum ei lü Pangsiim noh do kya naak ah peet. Asun kba Pangsiim jum ei naküt kti noh do kya naak phi yah kti.
10 Thuum läk lam naak üng Pangsiim üng ng'ye naak yah vaia mtun ei kti naküt Pangsiima mtaam üng am lät khoh. I lüni ti ta kkhyaang naküt noh Pangsiima thuum nih lüüm kkaan pääng ktie ni. Sangsiim üng “Pangsiima jah yuk shak thuume naküt sun aläa mshing mte lü am läk kti ta Pangsiima peet mtaam khaam ei yah kkhai” tilü vek kti.
11 Asun kba ani ta thuum läka phäh u phi Pangsiim üng am ng'ye be khoh kti atia ngte lok kti ni. I a thoon lüni ti ta Sangsiim üng ng'yuk kti ta “Pangsiim üng ng'ye be ktia kkhyaang jum ei naak üng xüng kkhai ni” tilü vek kti.
12 Asuna thoon lü thuum läk naak hin jum ei naak üng am shääng ei. Sangsiim üng ng'yuk kti ta “Kkhyaang mat noh thuum naküt ah läk lam ta thuum sun üng xüng kkhai” tilü ni.
13 Nikyo lüphi thuum naküt am nih läk khoh ua phäh Pangsiima mtaam jah peet vai sun Khritoa kkhaana phavaai kti. Asun üng ni Khrito noh nih nih-e ah jah shuh phyam be. Sangsiim üng ng'yuk kti ta “Baan lam ktung üng nghneen ei naküt kti hin Pangsiima mtaam jah peet ni” tilü vek kti.
14 Pangsiim noh Apyaham üng ah ng'aan eia do kya naak sun Khritoa thih naak üng kkhyaang mjü kse-e noh phi yah ei kkhaie. Asuna kba jum ei naak üng Pangsiim noh ah jah peet vai ah ng'aan ei Mkhyangsiim sun nih yah ei vaia thoon kti.
15 Kah püieo, kkhui shui üng kah msäp ma kkhai. Kkhyaang nghngih noh be khüt poh nih lü ngshing shun kkhai xooi. Asun üng be khüt sun u noh phi am phyeet be khoh ti. Mshap lüphi am ng'yah.
16 Pangsiim noh Apyaham jah ah kshoon üng ka üng asuna kkhyü taam ah jah peet. Sangsiim üng “Nah pät jah nah mjü mjoonga phäh ni” tilü ng'yuk kti am ni. Asun kba ang'yuk vai shüa ta akshoon kho hah ti naak hlü mä atia ngngaih vai shü. Asuna kyakyo lüphi aksanga ta Apyahama sa kshoon üng ka mat, Khrito sun, ah ti hlü ni.
17 Keia pyen hlü ta Pangsiim noh Apyaham üng be khüt poh püi lü asuna kba bi lou kkhaia kkhyü ah taam ei. Kona kho kum phya kphyü jah kthum kip lolü Moshei üng thuum ah jah peet. Asuna thuum noh aksük ksüka Pangsiima jah peet be khüt sun am not khoh. Pangsiima kkhyü taam phi i a käh kyah kkhaia am thoon shak khoh.
18 Avai shüa kuum kyan naak hin thuum läk lam üng yah ei khoh ta kuum kyan naak sun Pangsiima ng'aan ei üng am shääng ei. Lüphi Pangsiim noh ah ng'aan eia phäh Apyaham üng bä naak ah peeta kyak kti.
19 Asun kba athoon ta thuum hin i a ngkho ni. Kkhyaangea mkhye mshoh ngshing ngte shak kkhaia thoon kti. Asuna thuum sun Apyahama sa kshoon üng ka thoong khyah booia pha lo vei säpa däk ni. Pangsiim noh Apyaham üng ah ng'aan eia kkhyü taam sun aksanga ta ah nih-a phäh ni. Pangsiim noh kkhaan kho ngshä üng Pangsiim jah kkhyaanga kkeh-a jah kphye be kti Moshei üng thuum ah jah peet be tü ni.
20 Kkhyaang mat shoxat ani ta kphye be kkhai am hlü. Pangsiim ta mat däk kuung ni.
21 Asun kba athoon ta thuum jah Pangsiima ng'aan ei hin ngtü kaih kti xooi ti naaka joong mä. Am nilaang kuung. Kkhyaange üng shak jah pe-khoh ktia thuuma Pangsiim noh ah mkhyah-a athoon ta kkhyaang noh thuum läk naak üng Pangsiim mah mah ng'ye naak poh ei khoh kkhai ni.
22 Lüphi Sangsiim üng ng'yuk ktia kba hina kho mdek üng ka kkhyaang naküt sun mkhyea mpya-a nih thoon kti. Asuna kyalü Pangsiima ng'aan ei kuum kyan naak sun Booi Jeishüh Khrito jum ei ktie noh va yah ei kkhaie.
23 Booi Jeishüh jum ei naaka kha am apha ham üng thuum noh kkhyaange sun jah shuk kyet kti. Thuuma jah shuk kyeta kha sun Booi Jeishüh-a mong jum ei naak angshing lo üng päih be kti.
24 Booi Jeishüh ah pha lo vei säpa thuum noh nih nih-e jah up lü jah msing mkhang mshui mtääm ktia thoon kti. I a thoon lüni ti ta Khrito jum eia phäh Pangsiim mah mah nih ng'ye lo be vai ua phäh ni.
25 Tuh-a ta Booi Jeishüh phalo pääng ktia thoon lü jum ei naaka kha phalo hnüh kti. Asuna thoon lü thuum noh jah up lü ah jah mshui mtääm vai am hlü ti.
26 I lüni ti ta jum ei naak üng nang nih abänge hin Booi Jeishüh üng nglooi ei lü Pangsiima sa naea nah nih thoon lok ktie.
27 Nang nih-e hin Booi Jeishüh üng nglooi ei lü patiso nah nih khaam ei ktie. Asun üng Booi Jeishüh-a ve soh ngnei shak nah nih yah ei lok kti.
28 Asuna thoon lü Jüdah mjü, Kärih mjü, mshih mpya, aläta vek kti kkhyaang, nghnu mi, kpa mi ngkhoi ngkhya naak am veti. Booi Jeishüh mah mah nglooi ei üng nih nih-e abäng hin amata kba nih thoon lok ktie ni.
29 Nang nih-e hin Khrito üng nah nih shääng ei u ta Apyahama sa kshoona nah nih thoon ktie ni. Pangsiim noh Apyaham üng ah peet kkhyü taama kba bä naak phi nah nih yah ei kkhaiea thoon kti.