6
1 Hnasheneo, nah nih nu pa-a pyen ksang na-ua. Asun bang sun akdo ni.
2 “Nu pa lei shonga” tilü Pangsiim noh thuum ah jah peet. Asun ta ah ng'aan ei üng püi kti thuum aksük ni.
3 Asuna ng'aan ei ta “Asun kba nah thoon ta nah do nak kkhai ni. Hina kho mdeka nah shak shaaü kkhai” tilü vek kti.
4 Ah nih paeo, nah nih sa na-a mlung käh ah kshou vaia käh jah tot hlook ua. Booi Pa-a shing khän msuh mtheh naak üng jah bük teng mshü mseei ubä.
5 Mpyaeo, hina kho mdeka nah nih mah pa sun let let thak kyüh lü ksang na-ua. Khritoa phäh nah nih poh peeta kba kkhyü shing üng khüüi khoom ua.
6 Nah nih mah pa-a mkhüh-a hnip vaia ah ning jah büh k'um däk üng mtun ei lü käh nik ktia nang nih-e hin Khritoa mpya-a nah nih thoona kba Pangsiima mkhüh-a hnip vaia nah nih mlung üng ksep lü poh mshah ua.
7 Nah nih mah pa kkhyaang nghngi siima khuut poh peeta käh ngngaai lü Booi Pa Jeishüh-a khuut poh ktia kba mlung mkhüh nalü ngbi nglou ua.
8 Mpya phi aläta vek kti kkhyaang phi hina kho mdeka akdo poh naküt kti üng Pangsiim noh kheen pe-be kkhai ati sun shüüm ei ubä.
9 Amah paeo, nang nih-e noh phi nah nih mpya sun akdoa shube kom u kti. Käh jah mkyüh mkyook ubä. Nang nih-e phi kkhaan khoa nah nih mah pa vek kti atia shüüm ei ubä. Ah nih noh kkhyaang am jah mkhoi mhnga.
10 Kah püieo, Booi Pa Jeishüh üng nglooi ei lü jum ei naak ngkhääng lolü ah hiit üng nah nih ktha mah lo vaia akpäih naaka kah ning jah sük hlük ktie ni.
11 Pangsiim noh ah ning jah peeta li ksim abänga jah shui ooi ei ua. Asun üng va Shatana mhleei mhlak tuui ten sun nah nih shung khaam ei khoh kkhaie.
12 Nih nih-e hin nghngi siimea thoon kti ye-e käh nik ktia, kkhaan kho loa vek kti tuui yaaiea khonge nih jah tuk ktie ni. Anghmüp pea shang phuhlange, hina kho mdeka Shatan yaai pa-a phun kam üng jah up ktie, Shatana ngtuk kpoh shou shat kti ngtuk pä abänge phi nih jah täk ktie ni.
13 Asuna thoon lü Pangsiima jah peeta li ksim abänga jah shui ooi ua. Asun üng va ngshun loa mhnüüp üng nah nih ye sun nah nih jah shung khaam khoh kkhaie. Ngtuk pooia ngpääng kona phi angkhäänga nah nih ngdüüi khoh ham kkhaie.
14 Ngdüüi lü ngpyaai xat ua. Kkhyü shing üng ve-ua. Asun nah nih phäh-a ngkhääp naaka kba thoon kti. Pyuun ktia ve-ua. Asun nah nih phäh-a ngkyaang shung naaka kba thoon kti.
15 Diim deih naak thang kdo kkya kpyaü kkhaia ngpyaih xat ua. Asun kdunga seh üng kho dok akdo ngsuma kba ktung bok kti ni.
16 Aktung bok ta anghläia Pangsiim üm na-ua. Asun hin kshooi bia kba thoon kti. Asuna kshooi sun üng Shatan yaai pa-a shun kah lo mei kdääi mlae sun nah nih jah shung mthih khoh kkhai.
17 Thoong khyah naak nah yah sun ngbüng ei ua. Asun noh ngtuk lu khüma kba ning jah shung khaam kkhai. Pangsiima kkhyü shum ei ua. Asun Mkhyangsiima jah peet ksim kshaaüa kba thoon kti.
18 Mkhyangsiima kpüi kpak naak üng tä sham jah nghui naak üng Pangsiim üng ngthu ei ua. Mlung üng ngngaai kyet lü käh ktha jai lü Pangsiima kkhyaang abänga phäh jah tä sham peet ua.
19 Kah pyen tä lü käh kyüh kyook ngke kkhyak ei lü kah jah msuh mtheh khoh vai thang kdo kkya üng shääng ei kti angthuh-e sun kah kpyaü khoh vaia keia phäh phi nah tä sham peet ua.
20 Kei hin thang kdo kkya-a ngshäa thoon ngüshe khup üng kah kyum kti. Pangsiima nah xüh-a kba käh ngke kkhyak ei lü kah kpyaü khoh vaia nah tä sham peet ubä.
21 Kah thoon ve nah nih kshing vai ua Tiki Küh noh kah thang naküt ning mtheh kkhaie ni. Ah nih hin kah nih mhlä kphya naak kah nih na-a thoon kti. Kkhyü shing üng Pangsiima khuut phi poh kti ni.
22 Asuna thoon lü kah nih mong abäng sun ning mtheh ulü nah nih xe naak vaia nah nih veeia kah tüih lo ni.
23 Pa Pangsiim jah Booi Jeishüh Khrito noh Khritjaan be na abäng üng jum ei naak jah diim deih naak, mhlä kphya naak ning pe-ushe.
24 Nih Booi Pa Jeishüh Khrito sun mlung kkyoong ksang üng kphya nak ktie abänga kkhaana Pangsiima bä naak veshe. Amen.