5
Nang nih-e hin jah mhlä kphya nak kti Pangsiima sa na-a nah nih thoon ktiea kyalü Pangsiima kba nah nih vesoh poh mshah yah kkhaie. Booi Pa Jeishüh noh jah kphya kkhyok nalü nih nih-ea phäh-a ah shak sun khah naak kkhyünga msoon lü Pangsiim üng ah peet ni. Ah nih hin Pangsiima hlü eia ng'uui kti khah naaka thoon kti. Asuna thoon lü nah nih püi po sun Khritoa kba aksang kuunga mhlä kphya na-ua. Nang nih-e hin Pangsiima ngsiim ngsaih kti kkhyaanga nah nih thoon ktie. Asuna kyalü ngla shui jah kkhyaangea nghnu mi, kpa mi üng mkhye mkaih, mtuih mleh düih jaih jah ashili shan taka kpaam ei sun nang nih üng vek kti tia pyen naak vaia mkot käh vek yah kkhai. Mtuih mleh ktia kkhyü, am shum ei vai pyen, aloon laapa yaih yün pyen kshak naküt hoih ua. Asun bang am looi ngkäih na-u kti. Asuna ksah-a Pangsiim je ei ua. Ngla shui jah kkhyaangea nghnu mi, kpa mi üng mkhye mkaih kti naküt, mtuih mleh ktia su ngngaih jah am do ktia kpaam ei naküt kti sun Khrito jah Pangsiima upa pe üng ka khoh am shääng nah laang. Kpaam ei ktia kkhyaang ta mhnama lup hjok khah kti üng alang lang ni. I a am kyah ktia msuh mtheh ah nih pyen kshak üng nah nih jum ei naak lam käh hmü shak ubä. Pangsiima kkhyü am ksang nak kti ta asuna mkhye mshoh-ea phäh Pangsiim noh mtaam pek kkhai ni. Asuna thoon lü asun kba mkhye mshoh ktiea dä käh nglooi ei ua. Ahlaan üng anghmüp naaka nah nih vekhoi ktie. Tuh ta Booi Jeishüh Khrito üng nglooi ei lolü akvaai naaka nah nih vehnüh ktie. Asuna thoon lü akvaai üng shääng ktia kkhyaanga kba vesoh poh mshah ua. I a thoon lüni ti ta akvaai noh do naak, pyuun naak, kkhyü shing naküt som daai shak kti. 10 Pangsiima hlü ei sun nah nih kshing vaia mtun ei ua. 11 Anghmüp naaka vek kti kkhyaangea i a am kyah ktia ve soh poh mshah üng käh ngpüi ubä. Asun kba ve soh poh mshah-a am ado kya sun pou dang shak ua. 12 Angthupa ah nih thoon hlok ve soh-a mong pyen vai hngoh phi ngke ei phya-pyei kti ni. 13 Lüphi a i phi akvaai üng nghmuh khoh lü i a koong atia ngte lok kti. 14 Asuna thoon lü ahin kba ng'yuk hüt kti. “Ip ei ktieo, ngshüüm lo ua. Thih naaka kkhyüh thou lo be ua. Khrito noh akvaai üng ning jah kshü kkhai” tia ng'yuk kti. 15 Asuna thoon lü i hok kba nah nih ve soh mseei ei ua. Lam ksang sun am hmat ktia mäi käh nik ktia, aktheema mäia ve-ua. 16 Tuh k'um hin shexu ktia ksüüna thoon lü amdanga kho mhnüüp käh kpya ua. 17 Asuna kyalü anghmoonga käh velü Pangsiima hlü ei sun nah kshing hmat lo vaia mtun eia. 18 Mpyüi onga ju käh ei o-ubä. Nah nih mpyüi mhmah üng käh mbüüp khoh u tilü mkhye amjü mjü nah nih poh lok ktie. Nang nih-e ta Mkhyangsiim üng be bang ei ubä. 19 Mat jah mat nah nih ngsi ngjaang üng shalaan ng'äi, mküüi mtou naak ng'äi, ngsiim ngsaih ktia ng'äie üng ka kkhyü nglung shum ei ubä. Nah nih mlung kkyoonga Pangsiim mküüi mtou naak ng'äi msuuk ua. 20 Aläa amjü kküma phäh nih Booi Pa Jeishüh Khritoa ngming shum ei lü Pa Pangsiim je na-ua.
21 Khrito nah nih lei shonga phäh jum ei kti nah nih püi ksang na-ua. 22 Nghnu mieo, Khrito nah nih ksang naaka kba nah nih kpa mi phi ksang na-ua. 23 Khrito sun shaang ngsiima lua ah thoona kba kpa mi phi ah nghnu mia lua thoon kti ni. Khrito sun ah puum sha-a thoon kti shaang sun kuum kyan ktia phi kyak kti. 24 Asuna thoon lü shaang ngsiim noh Khrito ah ksang naaka kba nghnu mi noh phi ah kpa mia ti pyen naküt ah ksang naak vai hlü kti. 25 Kpa mieo, Khrito noh shaang ngsiim ah kphya naaka kba nang nih-e noh phi nah nih nghnu mi mhlä kphya na-ua. Khrito noh ta shaang ngsiim sun mhlä kphya nalü thih khaam ei lü ah kuum kyan ni. 26 I vai ah kuum kyan ni ti ta shaang ngsiima mkhye sun tuia ng'yüia ah kkhyü üng mthi kpyo lü ah msiim msaih vaia phäh ni. 27 Asun üng shaang ngsiim sun mtuih mleh kti akbek jah vuna ngkhon naaka ngkho käh vek kkhaia jou taai lü kbäü ei naak vai käh vek ktia ah ka naak vai shaang sun Khrito noh piit pyaang kti. 28 Kpa mi noh ah puum sha ah mseh naaka kba ah nghnu mi phi ah mhlä kphya naak vai hlü kti. Ah nghnu mi mhlä kphya nak kti ta ah pät noh ah pät ah mseh naak üng täng kti ni. 29 U noh phi ah päta puum sha am thi na. Kkhyaang naküt noh nih puum sha nih tu mbei mshü mseei kti. Asun kba Khrito noh shaang ngsiim sun tu mbei mshü mseei kti ni. 30 I lüni ti ta nih nih-e hin Khritoa puum sha thing yoa nih thoon ktie. 31 Asuna thoon lü kpa mi mat hin noh ah nu pa ah jah kphya naaka thea ah kkhyu kphya na-bok lü ve ei püi she. Ngkhyu ngla xooi sun puum sha mata kba thoon lok kti xooi ni. Asuna thoon lü nghngih xooi sun Pangsiima hmuh-a kkhyaang mata kba thoon lok kti. 32 Ahin hin angthuh ngvih kuung kuung ni. Lüphi kei noh Khrito jah shaang ngsiim sun mata thoon kti xooi atia kah pyen hlü ni. 33 Asuna kyalü phi nang nih-e üng phi shääng kti. Nang nih kpa mi abäng hin noh pät noh pät mhlä mseh naaka kba nah nih kkhyu phi nah nih mhlä kphya na-yah kkhaie ni. Nghnu mi naküt noh phi ah khong pa lei shong she.