1 Asuna thoon lü kei Polüh hin Khritoa phäh khup kkyuma thoon ngüshe nang nih amjü kse-ea phäh kah tä sham kti. 2 Pangsiim noh ah bä naak üng nang nih-ea do naak vaia asuna khuut kpoh kkhaia ah nah xüh atia nah nih hmat pääng to kkhaie ni. 3 Pangsiim noh ngthup kti ah mkhüh sun kpou lü nah kshing shak kti. Asuna mong alääm ta kah yuk pääng ni. 4 Asun nah nih büh üng Pangsiim noh Khritoa mong ngthup ktie sun ah nah kshing shak atia nah nih ngngaai lokya kkhaie. 5 Ahlaan üng asun angthupe sun Pangsiim noh kkhyaange üng am jah kshing hmat shak laang. Tuh ta Pangsiim noh ah nih-a ngsiim ngsaih kti ngshäe jah shahma ngsiime sun üng Mkhyangsiim üng ah jah ngshing ngte shak ni. 6 Angthupe sun i ni ti ta kkhyaang mjü kse-e sun Jüdah kkhyaange mah mah khoh shäänga thoon lok ktie. Khritoa puum sha thoon kti shaang ngsiim üng ngpüi lok ktie. Thang kdo kkya üng Booi Jeishüh Khrito mah mah ah nih nglooi eia phäh-a Pangsiima ng'aan ei sun ah nih nih-e noh phi shääng nak ktie.

7 Pangsiima bä naak üng thang kdo kkya kpyaü hü kti xüh shoh-a kah thoon kti. Asuna khuut poh naak vai Pangsiim noh ah hiit jah ngjung ktha nah pek kti. 8 Kei hin Pangsiima kkhyaang ngsiime üng akneem boka kah thoon kti. Lüphi Pangsiim noh ah bä naaka phäh thang kdo kkya sun kkhyaang mjü kse-ea veeia nah kpyaü shak kti. Am kshing päih khoh Khritoa be baang naak ah nah jah msuh mtheh shak ni. 9 Kkhyaang naküt noh Pangsiima ngthup kti ah mkhüh ktüüm sun ah nih kshing lo hü vai ua ah nah xüh ni. Booi Jeishüh Khrito üng akve naküt mhnün mseng kti Pangsiim noh kho mdeka angtüüi loa kkhyüh asuna ah mkhüh ktüüm sun ah thup kyet ni. 10 I lüni ti ta tuh hi küm kooi kti Pangsiima pum ngyam sun kkhaan khoa vek kti kkhaan kho ngshäe jah kho yaaiea khong mange noh shaang ngsiim üng hmat ei lok kkhaie ni. 11 Pangsiim noh angshääia vek kti ah mkhüh ktüüma kba nih Booi Jeishüh Khrito üng asun sun poh mshah kti. 12 Nih nih-e hin Khrito üng nglooi ei lü käh kyüh ngke ei lü Pangsiima hmaai ma-a nih vaang vaai khoh ktie. Booi Jeishüh nih jum ei ua phäh üng asun kba nih thoon hlok khoh ktie atia nih mlung üp kti. 13 Asuna thoon lü nah nih phäh-a khui kha kah khaam ei yah sun käh ktha she-ua. Asun üng nah nih hmaai mah khoh ktie ni.

14 Asuna thoon lü nih Booi Pa Jeishüh Khritoa Pa Pangsiima hmaai ma-a mkhuuk üng kah ngdääng kti. 15 Kkhaan kho jah kho mdek üng vek kti koon shaang naküt sun Pangsiima kkhyüh kyum kyalok ktie ni. 16 Pangsiima jou taai mah kti be baang naak üng ka ngjung ktha sun ah ning jah peet vai ua kah tä sham kti. Hmi naak kthaai üng nang nih-e üng thoon velok kti kkhyaang kthaai sun Mkhyangsiima hiit üng angkhääng lo bok bok vaia phäh ni. 17 Khrito sun jum ei naak üng nah nih mlung kkyoonga ah ve lo vai ni. Nang nih-e sun Pangsiima mhlä kphya naak üng nah nih pya ngshui ei lü ngkhääng lok kkhai. 18 Asun üng va nang nih-e sun Pangsiima kkhyaange abäng üng ayüma Booi Pa Khritoa mhlä kphya naak i hlooka jaü kti, shaaü kti, thuuk kti, hlüng kti atia nah nih lu nglang lok kkhai. 19 Kkhyaanga ngyam üng am kshing hmat khoh laang Khritoa mhlä kphya naak sun ngngaai lokya u kti lü Pangsiima be baang naak abäng üng nah nih küm seei vai ua kah tä sham kti.

20 Pangsiima hiit noh nih mlung kkyoonga khuut ah poh-a phäh üng nih nih-e noh nih tong khoh, nih su ngngaih khoh-a kthaka be baang ktia phi Pangsiim noh khyaih khoh kti. 21 Shaang ngsiim üng ni, Booi Jeishüh Khrito üng ni, aksüün vaai tä lü ngshääi ei ktia Pangsiima bung ngming ngshing ngte vaai lä she.