EPHETE
Polüh noh Ephet mlüh shaang üng ah kbia sa
1
Kei Polüh hin Pangsiima hlü eia kba Khritoa ngshäa kah thoon kti. Ephet mlüh-a Booi Jeishüh Khrito üng kkhyü shing lü vek kti jum ei ktiea veei sa kah yuk lok kti. Nih Pa Pangsiim jah Booi Jeishüh Khrito noh bä naak jah diim deih naak ning jah pe-ushe.
Nih Booi Jeishüh Khritoa Pa Pangsiim nih mküüi mtou vai u. I lüni ti ta Pangsiim noh ah kkhaan kho pea Mkhyangsiim üng shääng kti do kya naak abäng sun Khrito mah mah nih nglooi ei üng ah jah peet ni. Pangsiim noh hina kho mdek am ah tüüi hama kkhyüh Khrito üng nih nih-e sun ah jah ka naak vaia ah jah xü ei ni. Asun ta nih nih-e hin Pangsiima hmaai ma-a nih ngsiim ngsaih lü kbäü ei naak käh ave vaia phäh ni. Pangsiim noh jah kphya nalü Booi Jeishüh Khrito üng sa na-a kba ah jah dou daang vaia ah hlü ei jah ah mkhüh sun ah namkhyah ei pääng ni. Pangsiim noh ah mhlä kphya naak ah sa kpa Booi Jeishüh üng däm duh kti bä naak sun ah jah yet ni. Asuna thoon lü ah nih sun nih mküüi mtou vai u. Pangsiima bä naak küm seei ktia thoon lü ah nih noh nih nih-e sun Booi Jeishüh üng jah shuh be kti. Ah nih-a thi üng nih mkhye mshoh bäü hma u sun Pangsiim noh ah jah mhlät ni. Pangsiim noh küm seei kti ah theem ngvaai naak jah ah pum ngyam üng ah bä naak sun ahin kba onga ah jah yet ni. Asuna thoon lü Pangsiim noh ngthuh kti ah nüt yaan sun jah kshing shak kti. Asuna nüt yaan sun Booi Jeishüh üng ah küm seei shak vaia Pangsiim noh ah namkhyah ei pääng kuung ni. 10 Pangsiima nüt yaan i ni ti ta ah mkhyah-a ksüün üng kkhaan kho jah kho mdek üng ve naküt kti sun ng'yäp naak üng ngkhääm be kkhaie. Asune abäng sun Khritoa mkha kkea veyah kkhaie.
11 Booi Jeishüh Khrito üng nih nglooi eia phäh khoh shäänga nih thoon pääng ktie. Asun kba vaia Pangsiim noh ah nüt yaana kba nih nih-e ah jah xü kse ni. Pangsiim noh aksüka kkhyüh vek kti ah mkhüh jah ah mkhyah mtaanga kba kuunga abäng naküt sun ah poh mshah ni. 12 Asuna thoon lü Booi Jeishüh Khrito sun ääp ei lü jum ei lo ma ksük kti nih nih-e noh Pangsiima jou taai nih mküüi mtou vai u. 13 Nang nih-e phi kkhyü ksang, thoong khyah naak ning jah pek kti thang kdo kkya sun nah nih ngjaak üng Booi Jeishüh nah nih üm na-lok ktie. Nah nih jum ei lo u jah ta Pangsiim noh ah ning jah ka naak ni tia ning jah mshing mte ktie. Asuna mshing mte naak ta ah ng'aan eia kba ah ning jah peet u Mkhyangsiim ni. 14 Mkhyangsiim hin Pangsiim noh ah jah peet vai khoh-a phäh ashang khaama kyak kti. Pangsiim noh ah jah shääng van kkhyaang abäng ah jah shuh phyam kona nih nih-e noh khoh sun küm ktia nih yah ei kkhaie. Asun phi Pangsiima jou taai mküüi mtou naaka thoon kkhai ni.
15-16 Asuna thoon lü Booi Jeishüh üm na-u kti lü jum ei ktie abäng nah nih jah kphya naak u kah ngjaaka kkhyüh nah nih phäh-a Pangsiim anghläia kah je ei lo ni. Kah tä sham tä lü kah ning jah shüüm ktie. 17 Nih Booi Pa Jeishüh Khritoa Pangsiim, jou taai mah kti Pa Pangsiim noh Mkhyangsiim üng theem naak jah lu nglang naak ah ning jah peet vai kah tä sham kti. Asun üng Pangsiim sun nah nih kshing hmat lo ksang kkhaie. 18 Nah nih lu nglang lolü Pangsiima kvaai nah nih hmuh vaia kah nih ning tä sham peet ktie. Asun üng va Pangsiim noh nang nih-e ah nih ning khü üng i nah ääp ei khoh kti ati sun nah nih kshing kkhaie. Pangsiim noh ah kkhyaange abänga phäh ah mshääma khoh sun i hlooka nung mja lü jou taai kti ati sun nih hmat lok kkhaie. 19-20 Nih nih jum ei ktiea phäh-a Pangsiim noh ah shum ei ah hiit sun i hlooka käh mshuui msäp khoh-a däm duh kti ati sun nih ngngaih kya vai hlü kti. Asuna däm duh kti ah hiit üng va Booi Jeishüh sun thih naaka kkhyüh thoh shak be lü kkhaan khoa ah kkheet lama ah ngshut shak ni. 21 Asun üng kkhaan kho ngshäe, kho yaaiea shang phuhlange jah ah nih phun kame, ah nih khong mange abäng sun Booi Jeishüh-a mkha kkea vepäih ktie. Tuh hia phi, lok kkhaia ksüün üng phi angming mah abängea kthaka Booi Jeishüh-a ngming nglou ngthang bok kti ni. 22 Pangsiim noh abäng naküt sun Booi Jeishüh-a kho pha kkea ah taak päih. Booi Jeishüh sun shaang ngsiima hlüng taai ktia lua ah msoon ni. 23 Shaang ngsiim hin Booi Jeishüh-a puum sha-a thoon kti. Booi Jeishüh Khrito sun shaang üng küm seei naak velok kti. Ah pät kuung noh abäng naküt sun küm seei be baang shak kti ni.