3
1 Nang nih-e hin Khritoa dä nah nih thou lobe pääng ktie ni. Kkhaan khoa Pangsiima kkheet da Booi ngoh naak üng Khritoa dä nah nih ngshut ktie. Asuna thoon lü kkhaan khoa ka sun nah nih mlung üng ksep kyet ua.
2 Kho mdeka vek ktia ngkho am ni, kkhaan khoa ka sun hlü ei lü nah nih su ngngaih vai.
3 Thih pääng u kti lüta nah nih shak ksang sun Pangsiim noh Khrito üng nah nih vek ktia ah hmuh ni.
4 Nih nih-ea shak ksang ta Khrito ni. Khrito ah pou lo üng ta nih nih-e phi ah nih-a kba ah jou taai üng nih ngpüi kkhaie.
5 Kho mdek üng shääng ei kti ve soh ngnei shake jah mkhyüh ua. Asune ta ngla shui, kkhyaanga nghnu mi, kpa mi üng ve soh, mtuih shek kti pyen kshak su ngngaih, suk shou am mbüüp khoh, bäü hma hlüa mlung kkyoong jah kpaam ei lü khyoh kaih eie ni. Kpaam ei hin mhnama lup hjok khah üng täng kti ni.
6 Asun kba vesoh lü Pangsiima pyen am ksang nak ktiea kkhaana Pangsiim thüi shei kkhüt kkhai.
7 Nang nih-e kuung phi ahlaan üng ta am do ktia kpaam ei läk lü nah nih vesoh khoi ktie.
8 Tuh-a ta thüi shei, suk shou, lim ma naake sun jah hoih ua. Kkhyaang thang msheet naak ni, mtuih mleh kti kkhyüa ngkho nah nih mpyong üng käh mhluh lolaang ubä.
9 Nah nih ve soh kphyüm nah nih jah nong pääng ktia thoon lü nah nih püi käh mhleei mhlak ubä.
10 Kkhyaang kthaaia nah nih nghlaia kba ve-ua. Kkhyaang kthaaia ning jah mhnün kti Pangsiim noh ah joong shaang üng täng kkhaia anghläia ning jah piit pyaang ktie ni. Asun üng Pangsiim sun aksanga nah nih kshing hmat naak vaia ni.
11 Asuna thoon lü Kärih mjü, Jüdah mjü, vun moih khaam ktie, vun moih käh khaam ktie, kkhyaang mjü kse, Shaküh mjü, mpyae, aläta vek ktie jah mkhoi mhnga naak am ve ti. Khrito va aktung boka thoon kti. Kkhyaang naküta mlung kkyoonga ah xün vai sun hlü bok kti ni.
12 Pangsiim noh ning jah kphya nalü ah shääng van vai ngsiim saih kti kkhyaangea ning jah xü kti ni. Asuna thoon lü mpyeen ei lü, jen je lü, mlung mhneem lü, mlung hnip hnooi lü mlung mshaaü lü nah nih ve vai hlü kti.
13 Nah nih püi po non ei lü mat noh mat kbäü ei naak vai ave ta mhlät ua. Booi Jeishüh noh nah nih mkhye ah ning jah mhläta kba nah nih püia mkhye phi mhlät ua.
14 Aktung bok ta mat noh mat nah nih kphya naak vaia mtun ei ubä. Asun üng va be baang kti ngi toom naak nang nih üng vek kkhai ni.
15 Khritoa ning jah peet diim deih naak noh nah nih mlung kkyoong up she. Asuna diim deih naak nang nih üng ave vaia Pangsiim noh Khritoa puum sha-a thoon kti shaang sun üng ning jah xü kse khü kou kti ni. Aläa Pangsiim je ei ua.
16 Khritoa kkhyü nah nih mlung kkyoonga be baang ktia ta-ei kyet ubä. Theem ngvaai naak üng mat noh mat msuuk mtheh lü ktha pe-ua. Shalaan ng'äi, Pangsiim mküüi mtou ng'äi sun, asing linga ng'äia msuuk ubä. Nah nih mlung kkyoonga Pangsiim je nalü ah nih-a phäh ng'äi msuuk ubä.
17 Nah nih poh mshah pyen kshak naküt hin Booi Jeishüh-a ksah-a poh ua. Booi Jeishüh üng nglooi ei lü ah nih mah mah Pa Pangsiima veei lolü je na-ua.
18 Nghnu mieo, nah nih khong pa-a pyen ksang na-ua. Asun va Khritjaan nghnu miea phäh ngkäih kti.
19 Kpa mieo, nah nih kkhyu jah kphya na-ua, käh jah hnep ei ubä.
20 Hnasheneo, nah nih nu pa-a pyen naküt ksang na-ua. Asun sun Pangsiim noh hlü ei kti ni.
21 Nu paeo, nah nih sa nae anghläia käh jah kbäü ei ua. Yüih maih lü ah nih ktha jai kkhaia käh jah poh ubä.
22 Mpyaeo, hina kho mdek üng ka nah nih mah pa-a pyen anghläia ksang na-ua. Nah nih mah pa-a mkhüh-a hnip vaia ah ning jah büh um däk üng mtun ei lü käh nik ktia, Booi Jeishüh lei shong lü kkhyü shing üng poh mshah ua.
23 A i nah nih poh üng phi kkhyaanga khuut poh ktia käh ngngaai lü Booi Jeishüh-a khuut poh ktia kba nah nih mlung üng ksep lü mtun ei kshi lü khüüi ua.
24 Pangsiim noh kheen ning jah pek kkhai atia shüüm ua. Pangsiim noh ah kkhyaangea phäh ah taaka khoh nah nih yah kkhaie ni. I lüni ti ta nah nih mah pa ksang ta Khrito ni. Khuut phi ah nih-a phäh nah nih poh ktie ni.
25 Mkhye naak poh ktia kkhyaang ta a u phi Pangsiim noh mkhye naaka kheen pek kkhai. I lüni ti ta Pangsiim noh kkhyaang am jah mkhoi mhnga.