2
1 Kei noh nang nih-ea phäh phi Lotih Ke mlüh-a kae jah am nah hmukhoi kti akse püi po abängea phäh phi mtun ei kkhüt lü khuut kah poh kti atia kah ning jah kshing hlüshak kti ni.
2 I a thoon lüni ti ta ah nih nih-e sun ngjung ktha yah ei lo-ulü mhlä kphya naak üng ah nih ngkhot ngsheng lo vaia ni. Ah nih nih-e noh Pangsiima kkhyü aksanga kshing ulü mlung üp kko om naak be baang ktia yah ei kkhaie. Asun üng va Khritoa thoon kti Pangsiima thup sun kshing lok kkhaie.
3 Khrito üng va Pangsiima theem ngvaai naak jah ah pum ngyama khoh kkhyam nih hmukhoh ni.
4 Kkhyü kdo pyen ktia hana ngsom lü u noh phi lam käh ah ning jah hmü shak vaia kei noh ahin kba kah pyen ni.
5 Kah puum sha üng thuuk kyo u kti lüphi kah mlung ta nah nih veeia ve-ei kti ni. Khrito jum ei naak üng mlung mat lü ngkhääng ktia nah nih ve u kah ngjaaka phäh üng kah je kti.
6 Booi Jeishüh sun nah nih Booi Pa-a nah nih dou daana kba ah nih üng nglooi ei lü ve-ubä.
7 Thing dung ah pya üng angphun eia kba Booi Jeishüh üng nah nih pya ngshui ei lü ve-ubä. Nah nih ngthei khoia kba ah nih üng nah nih shak ngman ei lü nah nih jum ei naak ngkhääng lo bok bok ktia ve-ubä. Anghläia Pangsiim je na-ua.
8 Mat mat noh kkhyaanga su ngngaih jah i a am kyah kti hlo hleep naak üng nah nih jum ei naak käh ah kpyak vaia mseei ei ubä. Akhäke noh ah nih jah msuh mtheh ta Khritoa kkhyüh lok kti am ni. Kkhui shui thuum seen jah hina kho mdek up kti lung kho tuui yaaia kkhyüh lok kti ni.
9 Booi Jeishüh-a puum sha üng Pangsiim akküma vek kti.
10 Ah nih üng nah nih nglooi eia phäh küm seei ktia shak ning jah pek ktie ni. Khrito hin kkhaan kho ngshäe jah lung kho tuui yaaie ni, ah nih khong mangea kthaka phi hiit mah bok kti.
11 Ah nih üng nah nih nglooi eia phäh nang nih-e hin vun moih nah nih khaam ei ktie ni. Lüphi kkhyaanga kut üng poh-a vun moih ta am ni. Khritoa vun moih hin i ni ti ta nah nih puum sha hin mkhye naaka hiita kkhyüh lü lät naak hnüh ni.
12 Patiso nah nih khaam ei u hin ta Khritoa dä msüm nah nih khaam ei üng täng kti. Asun kba patiso khaam ei lü nah nih jum eia phäh üng ah thoh bea kba phi nah nih thou lobe pääng ktie. Asun sun Pangsiim noh Khrito thih naak üng ah mthoh naak bea hiit üng ah poh ni.
13 Nang nih-e hin ahlaan üng ta mkhye naak üng ve u kti lü vun moih am nah nih khaam ei khoi ktia thoon lü akthia kba nah nih vek ktie ni. Asuna thoon lüphi Pangsiim noh nah nih mkhye naküt ning jah mhlät lü Khritoa dä ning jah xün shak be kti ni.
14 Pangsiima thuum jah asuna thuum am läk ktia phäh mtaam khaam ei vaie ng'yuk ktia sa phi Pangsiim noh kphyaih lü baan lam ktunga ah hneen kbeh ni.
15 Booi Jeishüh noh baan lam ktunga ah nih hneen kbeh üng Shatan yaai pa jah lung kho tuui yaaia hiit ah kpyak ni. Booi Jeishüh-a ngnääng naak jah Shatan yaai pa jah lung kho tuui yaaia shuum naak sun kkhyaangea ma-a ngshing ngte shak kti.
16 Nang nih-e hin ei ook üng shääng ei ktia Jüdah thuum ning am nah nih läk üng phi Jüdah-ea kum pooi, khya pooi jah jeih ei mhnüüp am nah nih läk lam üng phi u noh am ning jah kbäü ei yah u.
17 Asue sun ngooia thoon velok kkhai Khritoa nghu ni. Ashü kyü ksang ta Khrito ni.
18 Akhäke noh ta mlung mhneem lü ve vai, kkhaan kho ngshä jah hjok khah yah vai tilü jah mthei hü ktie. Asune sun noh “Mhnüh mdan kah nih yah ktie ni” ti-ulü ah nih pät noh phi am ah nih kshing ngtu jah msuuk mtheh ktie. Kkhyaanga mlung loa phäh-a i a am kyah kti üng sam sah ktie. Asune sun noh Pangsiima ning jah peet hlü kheen käh nah nih yah ei vaia jum ei naak lam ning jah hmü hlü shak ktie ni. Mseei ei ubä.
19 Ah nih nih-e hin shaang ngsiima lua thoon kti Khrito üng am ngman ei u. Khritoa up naak üng velü ah puuma thoon ktia shaang noh ta ei ook yah ei kti. Ah puum sha abäng amata vek kkhaia ah yuh ngkhyü jah ah kthang noh ah man ni. Asun kba athoon ta shaang ngsiim sun Pangsiima mlung hlüa däm duh lok kti.
20 Nang nih-e hin Khritoa dä nah nih thipääng ktiea thoon lü kho mdek up kti Shatan yaai pa jah lung kho tuui yaai üng nah nih ngkyak ktie. Asun kba ani ta i a thoon lü kho mdek üng shääng ei ham ktia mäi nah nih vehlük ktie ja.
21 “Ahin hin käh hne data, käh mdep data, käh bi data” tia ngkho thuume i a thoon lü nah nih läk hlüham ktie ni.
22 Asuna thuume sun kkhyaanga su ngngaih jah mkhyah-a kkhyüh lolü alap ni. I lüni ti ta asuna thuume sun sim pyak khoh ktia ngkho üng shääng ei ktie ni.
23 “Kkhaan kho ngshäe jah hjok khah vai, mlung mhneem vai, jeih boih vai, päta puum mkhui mkha vai” tia ngkho thuume jah msuuk mtheh kti hin theem ktia mäi ni. Lüphi kkhyaanga am do kti ngnei shak jah mtuih shek kti kpaam ei sun am mbüüp nääng khoh.