KOLOTE
Polüh noh Kolot mlüh shaang üng ah kbia sa
1
1 Pangsiima hlü eia Booi Jeishüh Khritoa ngshä kei Polüh jah kah na Timotih noh sa kah nih ning kbi lo ni.
2 Kolot mlüh-a vek kti Khrito üng kkhyü shing kti be naea thoon kti Pangsiima ngsiim ngsaih kti kkhyaange kah ning jah shüüm kti. Pa Pangsiim noh nang nih-e üng bä naak jah diim deih naak ning jah peshe.
3 Nah nih phäh-a kah ning jah tä sham peet tä lü nih Booi Jeishüh Khritoa Pa Pangsiim je ei lä ni.
4 I lüni ti ta Booi Jeishüh Khrito jum ei u kti lü Pangsiima ngsiim ngsaih kti kkhyaange nah nih jah kphya nak ktie atia kah nih ngjaak ni.
5 Aksanga kkhyüa thoon kti thang kdo kkya nah nih veeia aksüka angpyaü lo üng asuna thang üng shääng kti ääp ei naak sun nah nih ngjak ktie. Asuna thoon lü nah nih jum ei naak jah mhlä kphya naak hin nah nih ääp ei naak üng ngphun ei kti. Nah nih ääp ei u sun Pangsiim noh kkhaan khoa ah nih ning süm peet ni.
6 Thang kdo kkya kho mdek naküta ngpyaü lo hü lü asun üng do kya naak phi ngpüi lok kti ni. Asun kba nang nih-e noh thang kdo kkya nah nih ngjaak lo ksük kuung jah Pangsiima bä naak i ni atia aksanga nah nih kshing loa kkhyüh nang nih-e phi do kya naak nah nih yah ktie.
7 Kah nih kphya naak kkhüt kah nih khuut poh püi Epa Pyah noh nah nih veeia thang kdo kkya kpyaü lok kti. Ah nih hin nah nih ksah-a Khritoa kkhyü shing üng vek ktia xüh shoh ni.
8 Nang nih-e hin Mkhyangsiim noh ning jah kpüi lü mhlä kphya naak üng nah nih vek ktie atia ah nih noh jah mtheh lok kti.
9 Asuna thoon lü nah nih thang kah nih ngjaaka kkhyüh lü nah nih phäh-a anghläia kah nih tä sham ktie. Nang nih-e noh Pangsiima hlü ei i ni atia nah nih kshing vaia ni, a i üng phi nah nih theem ngvaai lo vaia Mkhyangsiim üng shääng ei kti nah nih kshing lo vaia, Pangsiim noh ah ning jah peet vaia kah ning jah tä sham peet ktie ni.
10 Asun üng va Pangsiima ah mlunga je vaia vekhoh u kti lü ah hlü ei phi anghläia nah nih poh khoh kkhaie. Aktheih angtheih loa kba nah nih shak üng khuut kdo amjü kküm pou lok kkhai ni. Kona Pangsiim sha lü nah nih kshing lok kkhaie.
11 Hlüng taai kti ah hiita kba ah jah peet ngjung ktha üng nah nih ngkhääng vai ua. Asun üng a i phi mlung mshaaü lü nah nih khaam päih khoh kkhaie.
12 Xe nalü Pa Pangsiim sun je ei ua. Pangsiima akvaai pea nih ngpüi lü ah nih-a ngsiim ngsaih kti kkhyaange mah mah-a khoh bi kkhaia nih nih-e jah piit pyaang kti ni.
13 Pangsiim noh nih nih-e hin Shatan yaai pa-a nghmüp pea kkhyüh jah yung lü ah kphya naak ah sa kpa-a pea jah tha kti ni.
14 Pangsiima Sa kpa-a thia phäh üng nih lät lang lü mkhye naaka kkhyüh nih ngshuut be ktie.
15 Pangsiim ta mik üng am nih hmuyah. Khrito ta mik üng hmuh yah khoia Pangsiima joong shaang ni. Ah nih hin Pangsiima sa ksük ni. Pangsiima mhnün mseng naküta kthaka hiit mah kti ni.
16 I lüni ti ta Pangsiim noh kho mdek jah kkhaan khoa nghmuh khoh kti jah am nghmuh khoh kti naküt Khrito üng ah jah mhnün mseng ni. Kkhaan kho ngshäea pe, kho yaaiea pe jah ah nih shang phuhlange, khong mange, ah phun kam mah-e abäng hin Khritoa van vai Pangsiim noh Khrito üng ah mhnün mseng ni.
17 Khrito hin i phi am ave ham üng vepääng kti. Ah nih-a ahiit üng akve luum hin ah nih ning lam üng thoon vek ktie.
18 Ah nih sun ah nih-a puum sha-a thoon kti shaang ngsiima lu ni. Shaang ngsiim hin ah nih üng sut ei lok kti. I lüni ti ta Khrito däk hin abängea kthaka aksük ksüka thoon kkhaia thih naaka kkhyüh thou be ma ktia sa ksük ni.
19 Pangsiima küm seei naak ah sa kpa üng ave vai hin Pangsiima mkhüh ni.
20 Ah sa kpa üng mse jah kkhaan üng akve naküt sun apät Pangsiim üng ng'yäp be lü ah nih ve vaia Pangsiim noh ah mkhyah ni. Booi Jeishüh baan lam ktunga thih khaam ei lü ah thi üng ng'ye naak poh lü kho mdek jah kkhaan khoa vek kti naküt Pangsiima veei ah jah khü be.
21 Nang nih-e phi ahlaan üng ta Pangsiim üng nah nih thuuk khoi ktie. Nah nih mkhye mshoh bäü hma jah nah nih ngnei shak am adoa phäh üng Pangsiima yea nah nih thoon khoi ktie.
22 Tuh-a ta Pangsiima sa kpa sun kkhyaanga puum sha-a thoon lolü ah thih-a phäh üng nih nih-e hin Pangsiima hmaai ma-a ngsiim ngsaih lü kbäü ei naak üng nih lät lü pyuun lü nih vaang khoh hnüh ktie.
23 Nang nih-e hin nah nih jum ei naak ngkhääng lü kkhyü shing üng nah nih vesoh yah kkhaie ni. Thang kdo kkya nah nih ngjaak üng nah nih yah-a ääp ei naaka kkhyüh käh theih ngnoon laang ubä. Aana thang kdo kkya-a xüh shoh-a kei Polüh kah thoon lok kti. Thang kdo kkya sun kho mdek kkhyaang abänga veeia kpyaü hü ktie.
24 Tuh-a kei hin nang nih-ea phäh-a khui kha naak kah shoong ei ktia thoon lü kah je kti. Kah puum sha üng kah ngjaak ei hin noh Khritoa puuma thoon kti shaang ngsiima phäh-a Khritoa khui kha naak küm seei shak kti ni.
25 Pangsiim noh kei hin shaang ngsiima xüh shoh-a ah nah msoon ni. Nang nih-ea do naak vai poh kkhaia Pangsiim noh ah nah khüüi shak ni. Pangsiima kkhyü thang kdo kkya küm seei ktia jah msuh mtheh vai hin keia khuut ni.
26 Pangsiim noh aana thang kdo kkya hin aksüka kkhyüh lü kkhyaange noh käh ah nih kshing vaia thup lü akpäih naaka tuh ta ah kkhyaangea veeia ngshing ngte shak kti.
27 Pangsiima mkhüh-a ta ngthuh kti thang kdo kkya sun ah kkhyaange üng jah kshing shak ma lü jou taai mah kti thang kdo kkya sun Pangsiim am hmat ktiea veeia angshing ngte vaai vaia phäh ni. Pangsiima thuh ta Khrito nah nih mlung kkyoonga ah vea phäh üng ah nih-a hlüng taai naak üng nah nih ngpüi vaia ääp ei naak ni.
28 Asuna thoon lü kei nih-e noh kkhyaang naküt üng Khritoa mong kah nih jah mtheh kti. Kei nih-e noh kah nih theem ngvaai naak üng kah nih khyaih khoh säpa kkhyaang naküt jah msing msääi lü kah nih jah msuuk mtheh ktie. Kei nih-e noh ta kkhyaang abäng hin Khrito üng ah nih jum eia phäh-a küm seei naak üng Pangsiima veei kah nih jah seh hlü püi ktie ni.
29 Asun kba athoon lo vaia kei noh mtun ei lü khuut kah poh kti. Khrito noh ah nah peet däm duh kti ngjung ktha üng kei noh ahin kba kah poh kti ni.