8
1 Kah be naeo, Make Tonih hnea ka shaange Pangsiima bä naak üng i hok kba thoon vek ktie ati sun kah ning jah kshing hlü shak kti.
2 Ah nih shoong toh-a khui kha üng ah nih jum ei naak sun kshü kset khaam ei yah kkhüt ktie. Lüphi je kyai naak üng be bang kkhüt ktie. Asuna thoon lü mpyeen she kyo ulü phi käh kpaam ei lü khoh yet kkhüt ktie.
3 Ah nih peet khoh-a kba pe-ulü asuna thea ah nih shum ei hlü mhlä üng ka hngoh phi mlung hlü naak üng yet ktie ati sun kah pät kuung kah shak shi kti.
4 Jüdah hnea mpyeen shek kti Pangsiima kkhyaange jah ku ei naak vaia mkot üng phi jah ngpüi shaka ti ulü nah nghui nak kkhüt ktie ni.
5 Kah nih ngngaih-a kthaka thoon lok kti. Pangsiim üng ah nih shak ng'ap ei ma ulü Pangsiima hlü eia kei nih-ea ti pyen phi jah ksang nak kkhaia ng'ap ei ktie ni.
6 Titüh hin nang nih-ea veeia yet sut ei lü mkhääm kti. Asuna thoon lü nang nih-e noh mhlä kphya naak üng nah nih poh khuut ning jah kpüi lü ngpääng onga ah poh vaia kah nih tääng shak pääng ktie.
7 Nah nih jum ei naak, nah nih ngthuh ngmin ei, theem ngvaai naak, püi po ku ei, kei nih-e nah nih jah kphya naak abäng hin üng nah nih be bang ktie. Asuna thoon lü ahina mhlä kphya naaka khuut üng phi kah ning jah küm seei hlü shak kti ni.
8 Ahin kah ning jah mkhyah peet am ni. Lüphi shaang kse-e noh i hok kba onga jah ku ei hlük ktie ati sun ning jah mhnüh ma ngüshe nang nih-ea mhlä kphya naak hin aksang mä ati sun kah ning jah saam naak ni.
9 Nih Booi Pa Jeishüh-a bä naak nah nih kshing ktie ni. Abäng naküt hin ka na-kyo lüphi nang nih-ea phäh mpyeen she lo-yah kti. I lüni ti ta ah nih-a mpyeen sheeta phäh nah nih küm seei vai ua phäh ni.
10 Ahina mong üng kah ning jah lu mhlang hlük kti. Tuh kum üng nah nih sut ei ua khuut sän tuh hi pääng onga nah nih poh u ta nang nih-ea phäh do bok kkhai ni. Shaang abängea kshuunga aksüka yet mkhääm ma u kti lü jah ku ei naak hlüa mlung phi nang nih-e üng ni ave ma.
11 Asuna thoon lü ahina khuut ngpääng hnüh ktia poh ua. Nah nih jah ku ei hlü naaka mlunga vea kba nah nih peet yet hin ngkäih she.
12 Nah nih peet hlüa mlung ah ve ta am akve ah jah tong am ni. Akvea kba nah nih peet Pangsiim noh dou daang kkhai.
13 Shaang kse noh alääm ah nih peet vai ua nang nih-e üng kho hah pa kah ning jah peet hlü shak am ni. Abäng noh angtea nah nih peet vai kah yü naak ni.
14 Lüphi nang nih-e ta tuh k'um hin üng be bang ktia nah nih vek ktiea thoon lü hlü ko ktia be nae üng nah nih yet ua ngkäih kti. Asun kba ni nang nih-e phi nah nih hlü ko lo üng be bang kti shaang kse noh ning ku ei be kkhaie. Asun üng va nah nih lang lang khoh kkhaie.
15 Sangsiim üng ng'yuk kti ta “Kho hah nu mkhääm ei kti üng ak'hleei lo am ve. Alääm sa mkhääm kti üng phi am hlü lo” tilü vek kti.
16 Kei nih-e noh kah ning jah ku ei hlüa kba Titüh noh phi ah ning jah ku ei hlüa phäh Pangsiim kah nih je ei kkhüt ktie.
17 Kei noh nah nih veeia ah lo vai kah hlo phok sun ah yü naak däk am ni. Ah pät kuung phi nah nih veeia lo naak hlüa mlung vekuung kti.
18 Ah nih-a hlonga be na mat kah nih tüih lo u ni. Asuna be na hin thang kdo kya pyen naak üng shaang abäng üng nglou ngthang kti.
19 Asun däk am ni. Kah nih ku ei vai u sun mhnüh u ngüshe ta Pangsiima jou taaia phäh mhlä kphya naaka khuut kah nih poh naak hü üng phi jah läk lo hü kkhaia shaange noh ah nih msoon u ni.
20 Ahina yet kho kän kah nih jah bi vaia phäh kkhyaange noh käh ah nih jah kbäü ei vai ua kah nih mseei ei ktie.
21 Pangsiima ma däka am ni. Kkhyaangea ma-a phi abäng sang ktia poh vai hin kei nih-ea mlung ktüüm ni.
22 Asuna thoon lü yet tha ktia pä üng nih na u mat phi mkhyüi vai ni. Ah nih sun kho vei kuung saam u ngüshe jah ku ei hlülä kti ti sun kah nih hmuh u. Tuh hi ta nang nih-e ning jah üm na-kyet lü sha lü jah ku ei hlübok kti.
23 Titüh ta nang nih-e ning jah ku ei kkhaia keia khuut poh püi ni. Ah nih-a hlonga lok kkhaie be nae ta shaange noh ah nih jah tüih lo ua be naea thoon ulü Khritoa jou taai ngshing ngte shak ktie ni.
24 Ah nih nih-e sun mhlä kphya naak üng jah dou daang ua. Asun üng kei nih-e noh nang nih-ea mong hmaai mah lü kah nih pyen sang kti ti sun shaang abäng noh kshing lohü kkhaie.