7
Kah kphya naak kah püieo, ahina kkhyü taam abäng Pangsiim noh nih nih-e üng ah jah peet ni. Asuna kyalü nih puum sha mlung kkyoong jah mtuih mleh shak kti abänga kkhyüh nih ngthi ngpyo ei vai u. Pangsiim kyüh lü ngsiim ngsaih ktia nih xüng shei vai u.
Mlung mshaaü lü jah su ngngaai ua. U a kkhaana phi akkhye am poh u ngü. U phi am ksim kpyak u ngü. U phi am ngtuui ngten na-u ngü. Kah ning jah kbäü ei hlüa phäh ahin kba kah pyen am ni. Kah pyen päänga kba kah ning jah kphya nak kkhüt ktie ni. Nang nih-e üng ayüma thi üng phi xün üng phi kah yü naak ni. Nang nih-ea phäh kah mkhüh üp kti. Nang nih-e kah ning jah hmaai nak kti ni. Kah mlung nah nih nah bäi shak ktie. Khui kha kshe nu shoong toh kyo u ngü she phi kah je kyai pi pi kti ni.
Make Tonih hne kah nih pha kon u hngoh-a phi am ngxü ei khoh u ngü. Ahoa phi khui kha kah nih shoong ei lä ktie. Kkhyaange üng ngtek ngkhaih naak velü mlung k'uma pyang ma naak mjü kküm üng kah nih vek ktie. Lüphi ktha ngseek kti üng ktha pek kti Pangsiim noh Titüh ah pha naak lo üng ktha jah pe-be kti ni. Titüh ah pha naak lo däk üng ktha kah nih yah ktie am ni. Ah nih sun i hok kba ktha nah nih phya shak ktie ati sun jah mtheh be kti. Kona nah nih nah hmuhlü be kkhüt ktie ati ni, keia phäh mai nah nih ti be u jah i hok kba nah nih nah yung u ati sun jah mtheh lok kti. Asuna thoon lü nang nih-ea phäh sha lü kah je kyai kti.
Sa kah yuk lo üng kah ning jah puk sheet shak sän “Am lai bä” kah ti naak be vai am ve. Lüphi noong vei kah ning jah puk sheet shak kshing lo ngüshe kah mlung ta am do. Tuh hi ta kah je kyai kti. Nang nih-e kah ning jah puk sheet shaka phäh ta am ni. Nah nih puk sheet naak u hin nah nih ngthu nghlai naak ua athoona phäh ni. Pangsiim noh asuna puk sheet naak ah shum eia phäh alapa am ve. 10 Pangsiim noh puk sheet naak shum ei lü kkhyaanga mlung ngthu nghlai shak lü kuum kyan naak pek kti. Asuna phäh “Mai” ti vai am hlü. Pangsiim am kshing ktiea puk sheet naak ta thih naaka jah kpha kti. 11 Pangsiim noh nah nih puk sheet naak i hok kba shum ei kti ati sun ngngaai ma ua. Nah nih ngthiim ng'yääi lok ktie. Mkhye üng nah nih ngsiim vaia nah nih mtun ei lok ktie. Nah nih shaanga k'uma mkhyea phäh nah nih mlung käh do lü nah nih kyüh ei lok ktie. Nah nih veeia kah lo be tü vaia nah nih yü nak kkhüt ktie. Pangsiima phäh nah nih mtun ei lobe kkhüt ktie ni. Mkhye poh kti phi mtaam peet vai nah nih tääng ktie. Ahina mong üng i hok kba phi ning jah kbäü ei naak vai am ve ati sun nah nih ngte shak ktie ni.
12 Nah nih veeia sa kah yuk lo hin mkhye poh ktia phäh phi am ni. Ah nih mkhye naak khaam ei ktia phäh phi am ni. Kah ti pyen nah nih ksang naak vai u jah am nah nih nah ksang naak vai u sun Pangsiima ma-a nah nih päte noh nah nih kshing ei lo vai ua ahin kba kah yuk lo ni. 13 Asuna thoon lü kah nih ktha phyak kkhüt kti. Titüh-a je kyaia phäh kei nih-e sha lü kah nih je kyai ktie. I lüni ti ta nah nih bänga phäh ah mlung hnip lok kti. 14 I lüni ti ta nang nih-ea phäh Titüh-a ma-a kah hmaai mah naak hin kah ngke ei naak vai am ni. Nang nih-e üng kah ning jah mtheh u hin sang ktia athoona kba Titüh-a ma-a kah hmaai mah naak phi sang kti atia ngte lok kti. 15 Titüh sun abäng noh nah nih ksang naak u jah let let thak kyü u kti lü nah nih dou daan u sun shüüm be lü abäng sun sha lü ning jah kphya na-lok kti ni. 16 Nah nih bänge kah ning jah üm naak khoh-a phäh kah xe xok nak kti.