6
1 Nih nih-e hin Pangsiima dä khuut nih poh yüm ktie ni. Asuna kyalü Pangsiima bä naak nah nih dou ei u sun alapa käh thoon shak ua tilü kah ning jah nghui nak ktie.
2 Pangsiima kkhyü ngngaai ua. “Kah ning jah dou daan hlüa ksüün üng nah nih pyen kah ning jah ksang nak kti. Kuum kyan naak kah ning jah peeta mhnüüp üng kah ning jah ku ei ni” tilü Pangsiim noh ah pyen. Ngngaai ua. Tuh hin Pangsiim noh ah jah dou daan naak hlüa ksüün ni. Tuh ngooi hin kuum kyan naak yah naaka mhnüüp ni.
3 Kei nih-e hin kkhyaangea ngshuk ngvän naaka thoon kkhaia am ve u ngü. I lüni ti ta Pangsiima khuut kah nih poh naak u üng kbäü ei naak ave vai am hlü ei u ngü.
4 A i kah nih poh u üng phi Pangsiima xüh shoh-a kah nih thoon sun kah nih ngte shak ktie. Khui kha mpyeen sheet pyang ma naak naküt sun mlung mshaaü lü ni kah nih suun ei u.
5 Ah nih jah te kpaai u. Khup üng kah nih kyum ktie. Kkhyaang päa üng phou naak naküt kah nih shoong toh ktie. Ngnoi ngsai lü khuut kah nih poh ktie. Am ip ei yah u ngü. Buh ei nghmüh-a kah nih vek ktie.
6 Ngsiim ngsaih ktia kah nih xüng shei ktie. Pangsiima jah peet pum ngyam, suun ei naak jah the phya üng kah nih xüng shei ktie. Mkhyangsiim üng nglooi ei lü mhlä kphya naak ksang üng ni kah nih ve u. Ahin abäng hin Pangsiima xüh shoh ksanga kah nih thoon naak sun kah nih mdan naak u ni.
7 Pangsiima kkhyü aksang kuunga kba kah nih kpyaü ktie. Pangsiima hiit kah nih veeia vek kti. Shatan tuk naak vai jah pät yung ei naak vaia ngpyuun naak hin kei nih-ea li ksim ni.
8 Kkhyaang akhäk noh jah lei shong ulü akhäk noh am jah lei shong u. Akhäk noh jah thang mseh ei ulü akhäk noh jah mküüi ei ktie. Akhäk noh lam jah hmü shak ktia ah nih jah ngngaih. Lüphi Pangsiima kkhyü ksang ni kah nih pyen u.
9 Ahina kho mdek kkhyaange noh kei nih-e am jah kshing ulüphi Pangsiim jah ah kkhyaange noh ta angtea jah kshing ktie ni. Anghläia thi naak hnüh vai kking vek kti. Lüphi kah nih xüng ei ham ktie. Mtaam khaam yah kyo u ngüshe phi am jah hnim u.
10 Puk she kyo u ngüshe phi aläa kah nih je kyai ktie. Mpyeen she kyo u ngüshe phi kkhyaang kho hah üng khoh kkhyam kah nih jah pek ktie. I am ka nak ktia kba ve kyo u ngüshe phi abäng naküt hin kah nih ka naak u ni.
11 Korin mlüh-a vek kti kah nih kphya naak kah nih püieo! Angshing ngkyaaia kah ning jah ngthuh ei püi ktie ni. I lüni ti ta kah ning jah kphya naak kkhüta kyalü va.
12 Nang nih-e kah nih ning jah mhlä kphya naak ngpam lok kti tia am ve. Nang nih-ea mhlä kphya naak ni kei nih-ea kkhaana angpam lo.
13 Kah sa hnashenea kba kah ning jah ngthuh ei püi kti. Kei nih jah ngkhot ngsheng püi be ua.
14 Am jum ei ktie üng käh nglooi ei ua. Ngpyuun naak jah mkhye naak hin i hok kba ngpüi ngpo khoh kkhai xooi ni. Akvaai jah anghmüp phi i hok kba nglooi ei khoh kkhai xooi ni.
15 Khrito jah Pelila kho yaai i hok kba shääng ei kkhai xooi ni. Jum ei kti jah am jum ei kti i hok kba ngkhot ngsheng kkhai xooi ni.
16 Pangsiima hjok khah im nu hin mhnama lup üng i hok kba shääng ei kkhai ja. Nih nih-e ta xüng shei kti Pangsiima hjok khah im nu ni. Pangsiim noh “Kei hin ah nih hlonga ve ngüshe ah nih kshuunga kah sit hü kkhai ni. Kei hin ah nih-a Pangsiima thoon ngüshe ah nih nih-e hin kah kkhyaangea thoon kkhaie” tilü ah pyen.
17 Pangsiima pyen be tü ta “Asuna thoon lü ah nih nih-ea kkhyüh shot ua. Ngkya ua. Mtuih mleh ktia ngkho sun käh hne ua. Asun kba ani ta kah ning jah dou daang kkhaie ni.
18 Kei hin nah nih pa-a thoon ngüshe nang nih-e phi kah sa na-a nah nih thoon kkhaie” tilü hiit mah kti Booi Pa noh ah pyen.