1 Asuna thoon lü nah nih puk sheet naak vai ua käh athoon vaia käh kah lo be tü ham vaia kah mkhüh naak ni. 2 Kah ning jah puk sheet shak u ta nah je kyai shak kkhai u veham kkhai ni. Kah jah puk sheet shak ni, ah nih ve kom u. 3 Kah lo üng ta nah je kyai shak ktia ngkäih ktie noh käh ah nih nah puk sheet shak vai ua ahin kba kah yuk lo ni. I lüni ti ta kah je kyai ta nang nih-e phi abänga nah nih je kyai kkhaiea kah k'üp ei kti. 4 Nah nih veeia sa kah yuk lo üng nang nih-ea phäh-a pyang ma ngüshe kah kphyü tui phi loong lok kti. Kah ning jah puk sheet hlü shaka phäh am ni. I hlooka kah ning jah kphya naak u ati sun abäng üng kah ning jah kshing hlü shaka phäh ni.

5 Mat mat noh ah nah puk sheet shak ta kei ah nah puk sheet shak am ni. Alam mata ta nang nih-e phi abäng ah ning jah puk sheet shak kyo ni. 6 Asuna kkhyaang üng shaang üng ka aknung bok noh mtaam nah nih peet u hin khäk kti kyo ni. 7 Tuh hi ta ah mkhye mhlät lü ktha pe-be ua. Asun kba am ani ta puk kshe kolaih lü ääp ei naak am ta-ei ti kkhai ni. 8 Asuna thoon lü ah nih nah nih kphya nak ktie ati sun mhnüh mtheh ua tilü kah ning jah nghui nak ktie ni. 9 Kah pyen naküt nah nih nah ksang nak kkhaie mä tia saam naaka ahlaan üng asän kba sa kah ning jah yuk lo ni. 10 Nang nih-e noh mat mata mkhye nah nih mhlät u ta kei noh phi asuna mkhye kah mhlät ni. Kei noh mat mata mkhye kah mhlät ta avai shüa kah mhlät vai ave to ta nang nih-ea phäh Khritoa hmaai ma-a kah mhläta kyak kti. 11 Asun kba am ani ta Shatan yaai pa noh jah nääng ei nak kkhai ni. I lüni ti ta ah nih-a nüt yaan nih kshing u ni.

12 Khritoa thang kdo kkya kpyaü kkhaia Taroah mlüh-a kah pha üng Booi Pa noh mkot ah nah mboon peet atia kah hmuh ni. 13 Lüphi nih na Titüh shui hü mnü ngüshe kah pyang ma kkhüt kti. Asuna thoon lü asua jum ei ktie jah ta-hüt ngüshe Make Tonih hne da kah nglään vaai kti.

14 Lüphi Pangsiim nih je ei vai u. I lüni ti ta Khrito üng nglooi eia phäh Pangsiim noh Khritoa ngnääng naak üng anghläia ah jah ngpüi shak ni. Khritoa mong kshing naak sun ang'uuia kba hnün naküta ah pha vaia Pangsiim noh nih nih-e ah jah shum ei ni. 15 Nih nih-e hin Pangsiima phäh Khrito noh mei üng shi lü ah khah naaka ng'uui üng nih täng ktie. Kuum kyan naak yah kkhaie jah sim pyak naaka phak kkhaiea veei ahina ng'uui hin pha-hü kti ni. 16 Sim pyak kkhaiea phäh ahina ng'uui hin yook thua thuk kti ni. Kuum kyan naak yah ktiea phäh ta xün naak jah pek ktia ng'uui ni. Ahina khuut poh kkhaia u ta looi ngkäih kkhai ni. 17 I lüni ti ta ngui ah nih yah naak vaia Pangsiima kkhyü pyen hü kti kho hah vek ktie ni. Kei nih-e ta asune üng am täng u ngü. Pangsiim noh ah jah msoona thoon lü Pangsiima ma-a Khritoa xüh shoh ksang kuunga kba kah nih kpyaü hü ktie ni.