13
Tuh nah nih veeia kah lo be tü ta akthum naak hnüh vai ni. Sangsiim üng ng'yuk kti ta “Mat mat noh ah püi ah kbäü ei ta shak shi nghngih kthum veshe” tilü vek kti. Ahlaan üng mkhye poh ktie kah jah msääi khoi kti. Tuh kah pha lo hlaana phi kah jah msääi be tü kkhai. Nah nih veeia anghngih naak kah ve lo k'um üng “Hnua kah pha lobe tü üng mkhye poh lü am vuuk be ktie ta am jah non ei ti ngü” tilü kah pyen hüt pääng ni. Khrito kei üng ah ngthuh ei sun ngshing ngte naak nah nih hlü ei ktie. Khrito nang nih-e üng ngpüi ngkho lü ktha ngseek kti am ni. Nah nih kshuunga däm duh kti ah hiit ngshing ngte shak kti ni. Baan lam ktung üng ah nih hnim üng ktha ngseek kyo lüphi Pangsiima hiit üng xüng be kti. Kei nih-e phi Khritoa kba ktha ngseek kyo u ngüshe phi nang nih-e üng kah nih ngpüi ngkho naak üng Khrito üng nglooi ei lü Pangsiima hiit üng kah nih poh mshah ve soh kkhaie.
Nah nih pät noh kshü kset ei lü nah nih pät noh si jaang ei ua. Asun üng jum ei naak üng xün shei mä, am xün shei mä ati sun pät noh pät nah nih kshing ei lok kkhaie. Khrito nang nih üng xüng shei kti ati sun am nah nih kshing ktieo. Booi Jeishüh Khrito nang nih üng am ah xün shei ta xün naak kthaai am yah ham u kti. Kshü kset naak khaam lü kah nih looi ngkäih ktie ati sun nah nih kshing lok kkhaiea kah ääp ei kti. Khye kti käh nah nih poh vai ua Pangsiima veei kah nih tä sham ktie. Theem kti ngshäa kah nih thoon kti atia kah ning jah mhnüh naak hlü am ni. Kkhyaange noh ngshäa am jah ngngaai bä kyo ulü phi aksang ni kah ning jah poh hlü shak u. Pangsiima ksang naak sun am nih ngtuk püi khoh. Aksanga phäh mtun ei lü khuut bi vai hlü kti. Ktha ngseek kyo u ngüshe phi nang nih-e nah nih ktha ave ta kah nih je kyai ktie ni. Nah nih küm mseei lo bok vaia kah nih tä sham ktie. 10 Nang nih-e üng akthuuka kah ve naaka kkhyüh ahin kba kah yuk lo ni. I lüni ti ta nah nih veeia kah pha lo üng Booi Pa noh ah nah peeta hiit sun kah ning jah him naak jah mtaam ning jah peet naak vaia am shum ei hlü ngü. Ktha ning jah peet naaka ni kah shum ei hlü.
11 Akpäih naaka ta kah be naeo, mya lü ve ua. Nah nih ve soh poh mshah naak sun aküm seei vai mtun ei ua. Kah ning jah msuh msääi naak nah su ngngaai ua. Mat jah mat mlung kko ngi ktia ve ua. Diim deih lü ve ua. Mhlä kphya naak jah diim deih naak üng küm seei kti Pangsiim nang nih-e üng ayüma vek kkhai ni.
12 Mat jah mat ngsiim ngsaih ktia uut mhnam üng dou daang ua.
13 Pangsiima ngsiim ngsaih kti kkhyaang abäng noh ning shüüm ktiea pyen ktie ni. 14 Booi Jeishüh Khritoa bä naak Pangsiima mhlä kphya naak Mkhyangsiima nglooi püi naak nah nih bäng üng veshe.