1 Kei Polüh noh Khritoa mlung mhneem naak jah hnip hnooi naak üng kah ning jah nghui na-hlük ktie. Kkhyaang akhäk noh ta “Nih hmaai ma-a ta mlung mhneem lü akthuuka kkhyüh ta jah pyen dat kti ni” tilü keia mong pyen ktie. 2 Nah nih veeia kah pha lo üng käh kah ning jah kshe naak vaia kah ning jah nghui na-hlük ktie. I lüni ti ta kho mdek kkhyaangea thuuma kba poh kti ni tik ktie sun kah jah kshe na-dat kti atia kah k'üp ei kti. 3 Kho mdek kkhaana nih xüng shei kyo ulü phi kho mdeka lam üng ngtuk nih poh ktie am ni. 4 Ngtuk nih poh naaka nih shum ei ua li ksim hin kkhyaange noh ah nih shum ei khoi ua li ksim am ni. Nih nih-ea shum ei li ksim ta ye-ea ngseei loh naak daai kyong ngvoong sun ksim kpyak naak vai Pangsiima jah peet hiit mah ktia li ksim ni. Lam hmü ktia su ngngaih naak phi ksim kpyak kti. 5 Pangsiim kshing naak vai jah shung khaam naküt kti sun phi nih phyeet phyat-in u ni. Kkhyaangea khye kti su ngngaih naküt sun man lü Khritoa up naaka nih kpha u ni. 6 Pangsiim sun küm seei ktia nah nih ksang naak lo u ta Pangsiima ti pyen am ksang nak kti naküt mtaam jah pek kkhaia kah nih ngshääm kyet ktie ni.

7 Nang nih-e noh kkhyaang sun ah kho kpung ni nah nih büh u. Nah nih kshuunga “Kei hin Khrito üng kah shääng ei kti ni” tilü mkhüh k'üp ei kti hin vek ktio. Asun kba ani üng kei nih-e phi Khrito üng kah nih shääng ei ktie ati sun ah nih noh shüüm be she. 8 Booi Pa noh ah nah peet hiita mong kah pyen nung sa kyo lüphi am ngke ei ngü. Nah nih jum eia sim pyak naak vai käh nik ktia nah nih jum eia ngkhääng ngpaang naak bok bok vaia Pangsiim noh ah hiit ah jah peet ni. 9 Kah yuk loa sa hin kah ning jah mkyüh naak atia am ning jah ngngaih hlüshak ngü. 10 Akhäk noh ta “Polüh noh sa yuk lü akdeen kuunga ah jah msuh msääi ni. Lüphi ah pät ah pha lo üng ta ah ktha am velü ahiit mah-a kkhyü am pyen ve” tik ktie. 11 Akthuuka kkhyüh sa kah nih yuk lo jah nah nih hlonga velü kah nih poh pyen hin alang lang ni ati sun ahina kkhyaange hin noh ah nih ngjaak kkya vai u hlü ve.

12 Ah nih pät mküüi mkhyah ei lü jah msuuk mtheh ktie üng msäp mteh lü mtu mtäng vai am hlü ei u ngü. Ah nih pät noh mat jah mat mtu mtäng lü ah nih msäp mteh ei ta ah nih-e üng Pangsiima kkhyüh lok kti pum ngyam am ve ati sun ngshing kti ni. 13 Alooi ngkäih kka-a kah nih pät am mküüi mkhyah ei hlü u ngü. Pangsiim noh ah jah xüh-a kah nih khuut ma üng shääng ei ktia mong ni kah nih pyen u. Kei nih-ea khuut üng nang nih-e phi nah nih ngpüi ktie ni. 14 Nang nih-ea phäh Pangsiim noh ah jah xüh-a kah nih khuut ma-a thea lüüm u ngüshe khuut kah nih poh ktie am ni. Nang nih-ea veei lolü aksük ksüka Khritoa thang kdo kkya pyen lo ma kti hin kei nih-e ni. 15 Pangsiim noh am ah jah xüh kkhyaang kse-e üng shääng kti khuuta phäh kah nih pät kah nih mküüi mkhyah ei ktie am ni. Nah nih jum ei naak däm duh lolü Pangsiim noh ah jah xüh-a kba nah nih veeia aana thea däm duh ktia khuut kah nih poh yah vai ua kah nih ääp ei ktie. 16 Kona nah nih tui khyong khe lü aksea phi thang kdo kkya kah nih pyen khoh ham kkhaie. Asun üng kkhyaang ksea poh naak päänga hnün üng kah nih sam sah vai am hlü. 17 Sangsiim üng ng'yuk kti ta “Sam sah hlük kti noh ta Pangsiima poh mshah naak üng sam sah she” tilü vek kti. 18 Kkhyaang mat noh ah pät ah mküüi eia phäh Pangsiima dou daana thoon lok kti am ni. Pangsiima mküüi ei ni Pangsiima dou daana ah thoon.