8
Tuh hi mhnama lupe jah khah naaka ei ooka mong kah pyen hlü kti. Nang nih-e akhäk noh “Nih nih-e abäng hin nih theem ngvaai kti ni” nah nih ti u hin sang kyo kti. Ahin kba theem naak noh kkhyaang sun jah sam sah shak kti ni. Mhlä kphya naak noh ta jum ei naak üng jah ngkhääng shak kti ni. Kkhyaang mat noh “Kei kah kshing kti ni” tilü ah ngngaih ei ta Pangsiim noh ah theem hlü shaka kba am theem ham ktia kyak kti. Lüphi mat noh Pangsiim ah kphya naak ta asuna kkhyaang Pangsiim üng shääng ei kti tia Pangsiim noh kshing kti. Asun kba ani ta mhnama lupe jah khah naaka meh eia mong nih ngngaai vai u. “Mhnama lupe hin hina kho mdeka i a phi am kyah” ati sun nih kshing ktie. Pangsiima thea akse kkhyü mhnam am velaang. Kho li va-a phi kho mdeka phi mhnama ah nih jah shui ua xüng shei ktie hin kho hah vek ktie. Aksang kuunga phun kam mah kti booie jah mhname kho hah vek ktie. Nikyo lüphi nih nih-ea phäh-a Pa Pangsiim mat däk ni ah ve. Ah nih noh abäng naküt mhnün mseng lü ah nih-a phäh nih nih-e nih xüng shei ktie. Booi Pa phi mat däk ni ah ve. Asuna Booi Pa sun Booi Jeishüh Khritoa thoon lü ah nih üng Pangsiim noh akve naküt mhnün mseng lü ah nih üng nih nih-e phi nih xüng shei ktie. Lüphi kkhyaang naküt noh asun aksang sun kshing kti am ni. Akhäke noh kho vei pa mhnama lup hjok khah khoi ktiea thoon lü mhnama lup khah naak meh ah nih ei üng asuna meh sun mhnama lup üng shääng ei ktia tuh vei säpa su ngngaai ktie. Asuna phäh ah nih mlung noh ah nih pät jah kbäü ei lü mtuih mleh lok ktia su ngngaai ei kti. Meh ei jah am eia phäh Pangsiim noh jah hlü ei lobok kti am ni. Meh am nih eia phäh nih shum naak lo phi am ve. Nih eia phäh do naak nih yah naak lo phi am ni. Pangsiim noh xü ei vaia mkot jah mboon peet kti. Lüphi asuna mkot sun jum ei naak ngseek ham kti nih be na ngshuk ngvän lü käh nih mkhye shak vaia nih mseei vai u. 10 Avai shüa nang aktheem noh mhnama lup khah naaka ima meh nah ei sun jum ei naak ngseek kti noh ning hmuk kkhai. Ah mlung noh ah nih sun kbäü ei kyo lüphi nanga phäh mhnama lup khah naak meh ei lok kkhai ni. 11 Asun kba nanga theem naak üng jum ei naak ngseek kti nah be na sun nah mkhye shak ni. Nah be na suna phäh phi Khrito noh va thih khaam kti. 12 Ahin kba jum ei naak ktha ngseek kti nah nih be na-a kkhaana mkhye naak nah nih poh ni. I lüni ti ta asun sun mkhye atia ngngaai ei kyo lüphi nanga phäh ah nih noh poh yot kti ni. Ahin kba ktha ngseek kti nah be na nah mkhye shak ta Khrito nah bäü hma naak üng täng kti. 13 Asuna thoon lü ei ooka phäh kah be na ngshuk ngvän lü ah mkhye vai shüa akyaak üng kah shak üng meh am ei ti ngü. I lüni ti ta kah be na ngshuk ngvän lü ah mkhye vai am hlü ei ngü.