1 Sa nah nih nah yuk lo ua mong kah ning jah mkhyaai be kkhai. Kpa mi mat noh ah kkhyu am ah laaka ta do kti kyo. 2 Lüphi boh bah vaia hlo hleep naak nih khaam ei ktiea thoon lü kpa mi naküt noh ah nghnu mi lou ei she. Nghnu mi naküt phi im mah she. 3 Kpa mi noh ah nghnu mi sun ih lou seh lama mta üng ve püi yah kti. Nghnu mi noh phi ah kpa mi sun ih phak lou lama mta üng ve püi yah kti. 4 I lüni ti ta nghnu mi noh ah puum sha hin ah pät noh am ka na-ti. Ah kpa mi noh ah ka naak ni. Asuna ng'yüia ah kpa mi noh phi ah puum sha sun ah pät noh am van na. Ah nghnu mi noh ah van naak ni. 5 Nah nih nghngih noh mkhyah nih kti lü tä sham vai aksüün nah nih loh eia thea mat noh mat nah nih püi käh hai nih-a. Nah nih tä sham ksüün apäih kona kkhyu ngla thuuma kba vebe nih-a. Asun kba am ani ta nah nih mlung am mbüüp khoh u kti lü Shatan noh nah nih bäü hma vaia ning jah hlo hleep kkhaie. 6 Tuh-a kei noh kah pyen hin mkhyah lü kah pyen am ni. Kah ning jah lu mhlang naak ni. 7 Aksanga ta kkhyaang naküt keia kba ah nih ve vai kah hlü ei kti kyo. Lüphi Pangsiim noh kkhyaang naküt üng khyaih naak khoh mjü mat siim jah pek kti. Kkhyaang naküta khyaih naak khoh hin am lang lang. 8 Song pyang, ngla, hmeei nu jah hmeei pae phi keia kba käh im mah ulü ah nih ve mhläi u ta do bok kkhai ni tia kah pyen hlük kti. 9 Lüphi ah nih mlung am ah nih mbüüp khoh ta ngkhyu ngla u-she. Ih om hlüa mlung kking üng vea kthaka im mah ta do bok kkhai ni. 10 Ngkhyu ngla xooi ani ta nghnu mi noh ah kpa mi käh ngkya püi she tilü kah mkhyah hlük kti. Aksanga ta keia mkhyah am ni. Booi Pa-a mkhyah ni. 11 Lüphi nghnu mi hin ah kpa mi üng ah ngkya ta kpa mi kse üng käh im mah ti lü ve-ei she. Asun am ani ta ah kpa mi üng ng'ye be she. Kpa mi noh phi ah nghnu mi sun käh nong she. 12 Tuh-a kah pyen hlü be tü ta Booi Pa-a mkhyah ta am ni kyo. Kah pät noh kah ning jah sük hlü ta jum ei kti mat hin Pangsiim am üm nak kti ah nghnu mi velü nghnu mi noh ayüma ve-ei vai ah yü naak ta käh nong she. 13 Asuna ng'yüia nghnu mi noh phi Khrito am jum ei kti ah kpa mi velü ah kpa mi noh ayüma ve-ei vai ah yü naak ta käh hoih she. 14 I lüni ti ta am jum ei kti kpa mi hin ah nghnu mia phäh ngsiim ngsaih kti ni. Asuna ng'yüia am jum ei kti nghnu mi phi ah kpa mia phäh ngsiim ngsaih kti. Am ani ta ah nih sae hin Pangsiim am kshing kti kkhyaang mjü kse-ea hnashene üng lang lang kkhaie ni. Lüphi ah nih sae hin ngsiim ngsaih ktie ni. 15 Am jum ei kti nghnu mi kpa mi ta jum ei kti ah nghnu mi, kpa mi üng ah ngkya hlü ta ngkya ei she. Jum ei kti nghnu mi, kpa mi ta ngkhyu ngla-a thuum noh am jah khun phep ti ktia thoon lü ni. I lüni ti ta diim deih naak üng nih ve vai ua Pangsiim noh nih nih-e ah jah khü ni. 16 Nghnu mieo, nah nih kpa mi hin nanga phäh thoong khyah naak yah kkhai ni tilü nah kshing khoh kkhai mä. Kpa mieo, nanga phäh nah nghnu mi noh thoon khyah naak ah yah vai sun nah kshing khoh kkhai mä.

17 Pangsiim noh mat siim mat siim üng khyaih naak khoh ah jah peeta kba ah nih sun ve she. Pangsiim noh ah jah khü ah jah msoona ning lama kba ve she. Shaang abäng naküt üng ahina thuum ning kah ning jah peet u ni. 18 Pangsiim noh mat mat ah khü üng vun moih khaam ei pääng kti mä. Asun kba ani ta vun moih am khaam ei kti kkhyaanga kba ve vai käh mtun ei she. Mat be tü phi Pangsiim noh ah khü üng vun moih am khaam ei kti kkhyaanga thoon kti mä. Asun kba ani ta vun moih ah khaam ei vaia käh mtun ei she. 19 I lüni ti ta vun moih khaam ei phi nishe, am khaam ei phi nishe aktung am ni. Pangsiima kkhyü ksang naak vai ni aktung bok. 20 Pangsiim noh ah ning jah khü üng nah nih vea kba sä ve ua. 21 Pangsiim noh nang ah ning khü üng nang hin mpya-a nah thoon kti mä. Am lai. Lüphi kkhyaang kläta nah thoon naak vaia mkot ave ta shum eia. 22 I lüni ti ta Booi Pa noh ah thoong khyah-a mpya hin Booi Pa-a hmuh-a kkhyaang kläta thoon kti ni. Asuna ng'yüia Pangsiim noh ah khüa kkhyaang klät hin Khritoa mpya-a thoon lok kti. 23 Pangsiim noh nang nih-ea phäh aphu kküüi nu pelü ah ning jah kkhyäih ei ni. Asuna thoon lü kkhyaangea mpya-a käh thoon ua. 24 Asun kba ni, kah be naeo, Pangsiim noh ah ning jah khü üng nah nih ve naaka ning lam üng Pangsiim üng nglooi ei lü ve mhläi ua.

25 Tuh hi am im mah ham ktiea phäh kah pyen hlük kti. Booi Pa-a kkhyüh lok ktia mkhyah ta am nikyo lüphi Booi Pa-a bä naaka phäh kah su ngngaih sun kah ning jah mtheh vaia ngkäih kti ni. 26 Tuh-a ksüün hin ve soh khak ktia thoon lü kkhyaang mat hin am ah im mah ta do kkhaia kah ngngaih ni. 27 Nang üng nah nghnu mi vek kti mä. Ave ta nah ngkya püi vai käh mtun ei bä. Nah nghnu mi am veham mä. Am ave ham ta nah kkhyu mah vaia käh mtun eia. 28 Lüphi nah kkhyu mah hin mkhye naak ta am ni. Ngla phi ah im mah ta mkhye kti am ni. Lüphi im mah kti noh ta ahina kho mdek üng khui kha naak amjü mjü shoong toh yah kkhai. Asuna khui kha naake üng nah nih lät vai u sun kah hlü ei kti. 29 Kah be naeo, kei noh kah pyen hlü ta Khrito ah kyum lo be vai aksüün hin säh lohnüh kti. Asuna thoon lü ah nghnu mi vek kti noh am vek ktia kba tuh-a kkhyüh lü thoon veshe. 30 Mbooi kyap ktie phi am mbooi kyap ktiea kba veyah kkhaie ni. Je kyai xe xok na-tong ktie phi am je kyai ktia kba veyah kkhaie. 31 Kho mdek külak shum ei ktie noh käh ah nih ng'oh naak vaia mseei ei u she. I lüni ti ta ahina kho mdeka ve soh ning lam naküt hin khyük leih be päih kkhai ni. 32 Nang nih-e pyang ma ng'äh ngkhyah naak üng nah nih ve vai u am hlü ei ngü. Ah nghnu mi am vek kti noh Booi Pa üng shääng ei kti ni ah su ngngaih. Booi Pa-a mlung hlü ah poh vai ni ah mtun ei. 33 Lüphi im mah kti noh ta kho mdek üng shääng ei kti ni ah su ngngaih. Ah nghnu mia mlung hlüa ah thoon vai sun mtun ei kti. 34 Asuna thoon lü ah mlung hin nghngih-a ngpa lok kti. Am im mah ham kti, nghnu mi am ani ta ngla noh phi Booi Pa üng shääng ei kti ni ah su ngngaih. Ah puum sha jah ah mlung sun Booi Pa üng ap lü Pangsiima khuut poh hlük kti. Lüphi im mah pääng ktia nghnu mi noh ta hina kho mdek üng shääng ei kti ah kpa mia mlung hlüa ah thoon vaia mtun ei kti. 35 Ahina monge hin nah nih do naak vai kah pyen ni. Ning jah khun phep hlü ngüshe kah pyen am ni. Aksang bok jah akdo bok sun kah ning jah poh hlü shak ktie ni. Mlung kko ksang üng Pangsiima khuut nah nih poh vai u sun kah hlü ei ni. 36 Kkhyaang mat noh ah pyen ei pääng nghnu mi vek kkhai. Asun kba ani ta am ah loh ei ta nghnu mia kkhaana bäü hma ktia ngngaai lü am ani üng ah mlung am mbüüp khoh lü ah loh ei hlü ta lou ei she. Mkhye kti am ni. 37 Lüphi käh im mah kkhai kuunga mkhyah lü ah mlung phi mbüüp khoh lü im mah vai am hlü bä ktia ah ngngaih ta ah pyen ei pääng ngla sun am ah loh ei xa ta do kkhai. 38 Asun kba ah pyen ei pääng ngla lou ei kti hin do kti. Lüphi pyen ei pääng lüphi am lou ei kti hin do bok kti ni. 39 Im mah kti nghnu mi hin ah xün k'um naküt üng ngkhyu ngla-a thuum noh ah jah khun phep ni. Ah kpa mi ah thih kona ta ah hlü eia kpa mi üng im mah be khoh kti. Asuna kpa mi jum ei ktia thoon yah kkhai. 40 Lüphi käh ah im mah be ti ta je kyai naak yah bok kkhaia kah ngngaih ni. Kei üng phi Pangsiima Mkhyangsiim vek kti atia kah mkhyah ei kti.