1 Khritjaan be na mat noh nah kkhaana mkhye ah poh ta Pangsiim am kshing kti si jaang khonga veei nah nih seh ta looi ngkäih kkhai mä. Asuna ksah-a Pangsiima kkhyaange noh ah ning jah si jaang ta am do bok kkhai mä. 2 Pangsiima kkhyaange noh ahina kho mdek si jaang kkhaie ati sun am nah nih kshing ktie bä. Ahina kho mdek nah nih si jaang kkhaie noh ta am pyen hmuh mat jah mat ng'ye onga ta am nah nih si jaang khoh ktie mä. 3 Nih nih-e noh Shatan yaaia pa-a ngshäe phi nih jah si jaang kkhaie ati sun am nah nih kshing ktie mä. Asun kba ani ta hina kho mdek xün naak üng shääng kti sun nih si jaang ua ngkäih bok kti ni. 4 Lüphi nang nih-e ta nah nih ngsuh ngkaih ave lo üng Pangsiima shaang üng am shääng ei ktia veei ah ning jah si jaang vaia nah nih sit ktie ni. 5 Nah nih ngke ei ua do kti. Nah nih shaang üng mat jah mat nah nih ngsuh ngkaih naak ning jah si jaang khoh kti aktheem mat hngoh ta vek kkhai ni. 6 Nang nih-e ta asun kba am ni. Nah nih be na kkhya ei kkhaia si jaang luuma nah nih sit ktie. Pangsiim am üm nak ktie üng nah nih jah si jaang shak u. 7 Luuma si jaang yah onga mat jah mat nah nih ngsuh ngkaih ave hin phi nah nih mkhye naak u ni. Mat mat noh ah ning bäü hma naak üng nah non eia athoon ta do bok kti. Nah külak nah shum naak ta do bok kti. 8 Nang nih-e ta asun kba am ni. Jum ei kti be na-a thoon u kti lüphi nah nih püi bäü hma na-u kti lü mata külak mat noh nah nih hut ei ktoih ktie. 9-10 Am ngpyuun kti ta Pangsiima pea khoh kshäänga am thoon yah ati sun nah nih kshing ktie, am ni bä. Nah nih pät käh mhleei ei ua. Ngla shui, mhnama lup hjok khah, kkhyaanga nghnu mi kpa mi ve püi, kpa mi khye khye jah nghnu mi khye khye nghüüi ngtäm, mpyuuk ei, hnaih ei, kpaam ei, ktaai tum, sok sek, kkhyaanga külak jah hut ei naküt kti ua kkhyaang phi Pangsiima pea khoh shäänga thoon kkhai am ni. 11 Nang nih-ea k'uma akhäke ta asun kba vekhoi ktie. Lüphi Pangsiim noh Booi Jeishüh Khritoa ngming jah Mkhyangsiim üng nah nih mkhye ning jah mthi kpyo lü ngsiim ngsaih ktia ning jah thoon shak lü ah nih üng ning jah ng'ye shak be kti ni.

12 Mat mat noh “Kei hin a i phi kah poh mshah naak khoh-a mkot vek kti ni” ah ti ta kei noh phi “Sang vek kti. Lüphi a i nah poh hin phi nah jum ei naaka phäh do naaka thoon kti mä” tilü kah kthäh hlük kti. Kei noh phi kah pyen hlü ta “A i phi kah poh naak khoh-a mkot vekyo lüphi asun noh käh ah nah up vaia kah vek kkhai” kah ti. 13 Mat mat noh “Ei ook hin kkhon nua phäh ni. Kkhon nu hin ei ooka phäh ni” ah ti ta kei noh phi “Nah sang ni.” Lüphi kho mhnüüp mat üng ta Pangsiim noh ah nih nghngih jah ksim kpyak kkhai ni. Pangsiim noh kkhyaanga nih puum sha hin nih boh bah naak vai ah jah mhnün mseng am ni. Booi Pa-a phäh nih shum ei vaia ah mhnün mseng ni. Booi Pa noh phi nih puum sha jah bük teng mshüüm mseei kkhai. 14 Pangsiim noh Booi Pa sun thih naaka kkhyüh thoh shak be lü ah nih noh nih nih-e phi ah hiit üng jah thoh shak be kkhai. 15 Nah nih puum sha hin Khritoa puum sha-a thing yoa thoon kti ati sun am nah nih kshing ktie bä. Asun kba ani ta Khritoa puum sha thing yoa kkhyüh lü kkyük bät lü boh bah kti nghnu mia puum sha-a thing yoa nih thoon shak vaio. Käh thoon shak yah laang vai. 16 Mat mat noh boh bah kti nghnu mi ah ve püi ta puum sha mata thoon kti xooi ati sun am nah nih kshing ktie mä. Sangsiim üng ang'yuka kba “Ah nih nih hin puum sha mata thoon lok kkhai xooi ni” tilü vek kti. 17 Kkhyaang mat hin Pangsiim üng ah nglooi ei lo ta Pangsiima dä mlung kko mata thoon lok kti xooi. 18 Boh bah naak sen ta-ua. Kkhyaang mat hin noh mkhye akse i poh lüphi ah puum sha ta am shuh hne. Boh bah ktia kkhyaang ta ah puum sha sun ah pät noh bäü hma nak kti ni. 19 Nah nih puum sha hin Mkhyangsiima hjok khah ima thoon kti ati sun am nah nih kshing ktie mä. Pangsiim noh Mkhyangsiim ning jah pelü nah nih k'uma vek kti ni. Asuna thoon lü nah nih pät noh nah nih pät am ka na-u kti. 20 Pangsiim noh aphu pelü ah ning jah kkhyäih ei ni. Asuna thoon lü nah nih puum sha üng Pangsiima jou taai ngshing ngte shak ua.