1 Nah nih veeia akshe hleena boh bah ktie vek ktiea kah ngjak kti. Pangsiim am kshing kti kkhyaang mjü kse-ea veei hngoh phi asun am ngjaak khoi ni. Asun ta ah pa-a kkhyu ve püi lü im mah püi kti. 2 Nang nih-e ta nah nih sam sah ktoih ktie. Nah nih puk sheet kkhüt ua ngkäih kyo kti. Asun kba mkhye poh kti ta shaanga kkhyüh mshot ua. 3-4 Kah puum sha hin nang nih-e üng akthuuk nua ve kyo ngüshe phi kah mlung üng ta nah nih hlonga kah vek kti ni. Asuna thoon lü nah nih hlonga kah puum sha üng vek ktia kba Booi Jeishüh Khritoa ngming üng asun kba mkhye ktia kkhaana si jaang naak kah mkhyah pääng ni. Shaang üng ngkhääm naak poh ua. Booi Jeishüh-a hiit nang nih üng velü kei phi kah mlung üng nah nih hlonga kah vek kkhai ni. 5 Asun üng asun kba mkhye kti sun shaanga kkhyüh mshot u kti lü Shatan yaai pa-a kut k'uma ap ua. Asun üng ah puum sha üng khui kha ah khaam eia phäh vuuk be lü Booi Jeishüh ah kyum lo be üng kuum kyan naak yah kkhai ni. 6 Nah nih sam sah u hin am do kti ni. Kkhaai phoom alääm sa noh kkhaai kso kho hah pa phoom shak khoh kti ati sun am nah nih kshing ktie mä. 7 Asuna thoon lü nang nih-e üng vek kti mkhye ni tia kkhaai phoom akphyüm naküt msiim mhlaaü päih ua. Asun üng nang nih-e kkhaai phoom käh ngpüi ktia kkhaai kso akthaaia kba nah nih thoon kkhaie. I lüni ti ta nih nih-ea Phyong pooi sun ngpyaang ei pääng kti. Khrito hin nih nih-ea Phyong pooi to sa-a thoon lü ah nih khah naak pääng u ni. 8 Asuna thoon lü kkhaai phoom akphyüm ngpüi kti kkhaai kso üng Phyong Pooi am nih poh yah u. Kkhaai phoom akphyüm ta kkhyaangea kkhaana am do ktia ngnei shak jah mkhye mshoh naak amjü mjü sun pyen hlü ni. Kkhaai phoom am ngpüi kti kkhaai kso ta ngsiim ktia mlung kko jah kkhyü shing üng ve naak sun ti hlü ni. Ahina mlung kko üng Phyong Pooi nih poh vai u. 9 Ahlaan üng sa kah ning jah yuk lo u üng “Boh bah ktia kkhyaang üng käh nglooi ngtheeng u bä” tilü kah ning jah msääi u ni. 10 Lüphi ahina kho mdek kkhyaange üng ka boh bah ktie, ngkeei ngku, mpyuk ei, mhnama lup hjok khah ktie üng käh ngpüi ngpo ubä kah ti hlü am ni. Am ani ta kho mdeka kkhyüh nang nih-e hin nah nih shot yah kkhaie ni. 11 Kah pyen hlü ksang ta mat mat noh “Kei hin Khritjaan be na ni” tilü boh bah lü ngkeei ngku lü mhnama lup hjok khah, sok sek, mpyüi mhma, mpyu ei lü ah thoon ta asuna kkhyaang üng käh nah nih ngpüi ngpo yah kkhaie. Asuna kkhyaanga dä buh hngoh phi käh nah nih ei yah kkhaie. 12 Khrito am jum ei ktie jah si jaang vai keia mta am ni. Khritoa shaang üng ngpüi ktie ta nah nih jah si jaang vai ua kyak kti. 13 Khrito üng am shääng ei ktie ta Pangsiim noh jah si jaang kkhai. Nang nih-e noh ta Sangsiim üng ang'yuka kba “Mkhye poh kti ta mshot ua” ati sun läk ubä.