4
Kei nih-e Khritoa xüh shoh-a kah nih thoon ktie atia nah nih jah ngngaih ua ngkäih kti ni. Ngthup kti ah kkhyü ksang sun jah msuuk mtheh kkhaia kei nih-e Pangsiim noh ah jah mtaat ni. Ah mah pa noh khuut mta ah peeta kkhyaang sun üm naak ngkäih vaia thoon yah kkhai. Nang nih-e noh phi nishe kho mdeka si jaang khonge noh phi nishe i hok kba nah si jaang u kti lüphi keia phäh asun aktung am ni. Kah pät noh phi kah pät am si jaang ei ngü. Kah mlung kko noh am nah kbäü ei lüphi asuna phäh mkhye üng kah ngsiim kti ta am ni. Kei nah si jaang kti ta Booi Pa ni. Asuna thoon lü aksüün am ah pha ham üng nang nih-e noh u phi käh si jaang ubä. Pangsiima mkhyah-a ksüün üng Booi Pa kyum lobe lü tuh k'um üng kho nghmüp üng ngthup ktie sun akvaaia mdan be kkhai ni. Kkhyaanga mlung k'uma mkhüh ktüüm naküt sun phi ngshing ngte shak kkhai. Asuna ksüün üng Pangsiim noh kkhyaang naküt sun looi ngkäih ktia jah mküüi mtou kkhai. Kah be naeo, ahina mong kah yuk lo hin kei jah Apolüh üng shääng ei ktia kah ning jah msuh mtheh naak hlü ni. I lüni ti ta Sangsiima tia kba nah nih ve vai u nah nih sing naak vai ua phäh kei jah Apolüh noh kah nih ning jah msuh mtheh ni. Nah nih be na akhäk mdih mshuui u kti lü be na akhäka phäh-a u phi am pa kkhyap yah ti u kti. U noh nang nih-e sun kkhyaang abänga kthaka akdo boka ning jah hmuk ktie ni. Nang nih-e üng vek kti bä naak jah khyaih naak khoh-e sun Pangsiim noh ah nih ning jah peet u, am ni bä. Asun kba ani ta Pangsiim noh ah ning jah peet am nik ktia mäi i lü nah nih pa kkhyap ktie ni. Hlü kti abäng küm seei pääng ktia nah nih ngngaai ei ktie. Booi mangea nah nih thoon lo hnüh ktie ni. Kei nih-e noh am ning ku ei xa u ngüshe shang phuhlanga nah nih thoon ktie. Nang nih-ea up naak üng kei nih-e phi kah nih ngpüi khoh vai ua ahina lam üng nah nih jah upa ta do kkhai shü. Kei nih ngshäe ta Pangsiim noh hnu mshääi mshääia kah nih vek kkhaiea ah jah msoon atia kah ngngaih ni. Ah nih jah hnim hnüh vaia ah nih jah senga kba kah nih vek ktie ni. Kho mdek ni, kkhaan kho ngshäe ni, kkhyaange ni, ah nih bängea ma-a ah nih hnim hlü u kkhyaang kläänga kba Pangsiim noh ah jah mshääm ni. 10 Kei nih-e ta Khritoa phäh anghmoonga kah nih thoon ktie ni. Nang nih-e ta Khrito üng kkhyaang ktheema nah nih thoon ktie. Kei nih-e ktha ngseek lü nang nih-e ta nah nih ktha mah ktie. Nang nih-e ta kkhyaange noh ning jah mküüi ei ulü kei nih-e ta ah nih jah mdih mshuui u ni. 11 Tuh vei säpa ei ook phyüt vat lü shui shak kpyoon kteek bi lü kah nih vek ktie ni. Kkhyaang noh jah nghnge na-ulü ah nih jah te kpaai ei hü u. Ah im lou kka-a kah nih sit hü ktie ni. 12 Kah nih päta kut üng ngnoi ngsai lü khuut kah nih poh ktie. Kkhyaange noh ah nih jah she sham u üng Pangsiim noh do kya naak ah jah peet vaia kah nih jah tä sham peet be ktie. Ah nih jah mkhuh mhlih u üng am jah thung ei be u ngü. 13 Kkhyaange noh ah nih jah thang mseh ei u üng hnip hnooi ktia kah nih jah ngthuh ei be u ni. Kei nih-e hin kho mdek bi booia kah nih thoon lok ktie ni. Tuh vei säpa kkhyaange noh pheih kpyaai-ina mputa kah nih thoon ktie.
14 Nah nih ngke ei vai ua ahin kba kah yuk lo am ni. Kah sa na-a kba ning jah kphya na-ngüshe kah ning jah msääi hlü ni. 15 Nah nih xün shei naak vai ning jah msuuk mtheh kti kkhyaang kho hah vekyo ulüphi nah nih pa ta kho hah am ve. Kei noh nah nih veeia thang kdo kkya kpyaü lo ngüshe jum lo u kti lü Khrito üng nang nih-ea pa-a kah thoon kti ni. 16 Asuna thoon lü keia ning nah nih nah hju tuih vai ua kah ning jah msääi ni. 17 Nah nih veeia Timotih kah tüih lo ni. Ah nih hin Khrito üng kah kphya naak jah kah üm naak kah sa-a thoon kti. Khrito üng nglooi ei lü i hok kba kah xüng shei kti ati sun ning jah shüüm shak kkhai ni. Ahin kba kuunga shaang naküt sun kah jah msuuk mtheh kti ni. 18 Nang nih-ea k'uma sam sah kti akhäk ve ulü am kah lo ksang kkhaia ngngaai ktie. 19 Lüphi Pangsiim noh ah hlü ei ta i vei am lo nah nih veeia kah phalok kkhai ni. Asun üng pa kkhyap ktiea ah nih kkhyü däk am ni, ah nih hiit phi kah kshing lok kkhai ni. 20 I lüni ti ta Pangsiima pe hin kkhyü üng up khoh am ni. Hiit üng ni up khoh ta. 21 Huui sik lo ei ngüshe ning jah him kkhaia mä kah lo kom. Am ani ta mhlä kphya naak üng hnip hnooi ktia mä kah lo kom. I nah nih hlü ei ktie ni. Xü ei ua.