1 Kah be naeo, Mkhyangsiima lam mshüüm naak üng vek ktia kba am ning jah ngthuh ei püi khoh ngü. Mlung lo läk ktie jah Khrito üng hnashen kpook sa hama kba kah ning jah msuh mtheh yah ni. 2 Sih tui kah nih ning tu yah u. Am ei khoh ham u kti lü meh am ning jah mbei khoh u ngü. Aksanga ta tuh veia phi meh am ei khoh ham u kti. 3 I lüni ti ta mlung loa kba tuh veia nah nih xüng shei ham ktie ni. Mat jah mat ngkeei ngku u kti lü nah nih ngtuun ngvok ktie ni. Asune hin mlung loa kba ve soh, am ni bä. Nang nih-e hin Khrito am kshing ktiea kba nah nih ve soh ktie ni. 4 Nang nih-e üng ka mat noh “Kei hin Polüh üng ni kah shääng” ah ti. Mat be tü noh phi “Apolüh üng ni kah shääng” ah ti. Asun hin Khrito am kshing ham ktie üng am täng kti bä. 5 Apolüh hin u ni. Polüh hin u ni. Kei nih-e hin Pangsiima xüh shoh-e ni. Pangsiim noh kei nih-e üng khuut mta aphäh phäh-a ah jah peeta kba nah nih jum ei lo vai ua kah ning ku ei ktie ni. 6 Kei noh msi kah sho kti. Apolüh noh ta tui buui kti ni. Lüphi däm duh loshak kti ta Pangsiim ni. 7 Asuna phäh msi sho kti jah tui buui kti hin aktung bok am ni. Aphung däm duh loshak kti Pangsiim ni aktung boka ah thoon. 8 Msi sho kti jah tui buui kti hin ah nih mlung hlü täng kti xooi ni. Ah nih poh-a kba kheen yah ei kkhai xooi. 9 I lüni ti ta kei nih-e hin Pangsiima khuut poh yüm ktia kah nih thoon ktie. Nang nih-e hin Pangsiima ngvoonga nah nih thoon ktie ni. Pangsiima ima phi nah nih thoon ktie ni. 10 Pangsiim noh bä naak ah nah peet üng im shah thei ktia kba mthoh ktung kkit ktunge sun kah jah nglin kti ni. Asun kona mat noh nglong taang lü im ksi be tü kti ni. Pangsiima im shak naak üng ngpüi kti naküt noh i hok kba shak kti atia mseei ei she. 11 Pangsiim noh Khrito sun mthoh ktunga ah nglin pääng ni. Asuna ktung akse üng hlai lü am ng'yah ti. 12 Pangsiima im shak kti akhäk noh xüi, ngui, aphu kküüi lung üng shak ktie. Akhäk noh ta thing, yo, mdi üng shak ktie ni. 13 Khrito ah kyum lo bea mhnüüp üng kkhyaang naküt noh i hok kba shak kti ati sun Khrito ah kyum lo bea mhnüüp üng ngte lok kkhai ni. Asuna mhnüüp üng kkhyaang abänga khuut sun mei noh ngshing ngte shak kkhai ni. Kkhyaang naküta im shak sun mei üng kshü kset lok kkhai ni. 14 Aktung bok ktunga thoon kti Khritoa kkhaana kkhyaang mata ah shak naaka khuut ma sun mei noh am ah uih ta kheen yah ei kkhai. 15 Lüphi kkhyaang mata shak sun mei noh ah uih ta kheen shum kkhai. Ah pät ta thoong khyah naak yah kkhai kyo. Meia kkhyüh ah nih khuui bea kba vek kkhai ni. 16 Nang nih-e hin Pangsiima hjok khah im nua thoon u kti lü nah nih k'uma Pangsiima Mkhyangsiim vek kti ati sun am nah nih kshing ktie bä. 17 Mat mat noh Pangsiima hjok khah im nu ah ksim kpyak ta Pangsiim noh ah nih sun ksim kpyak be kkhai ni. I lüni ti ta Pangsiima hjok khah im nu hin ngsiim ngsaih kti ni. Nah nih päte kuung hin ahina hjok khah im nua nah nih thoon ktie. 18 Nah nih pät käh mhleei ei ua. Kkhyaang mat noh “Kei hin kho mdeka lam üng kah theem ngvaai kti ni” tia ah ngngaih ta aktheem ksanga ah thoon vaia anghmoonga thoon she. 19 I lüni ti ta kho mdek üng shääng ei kti kkhyaangea theem naak hin Pangsiima hmuh-a nghmoong naak ni. Sangsiim üng ng'yuk kti ta “Pangsiim noh ‘Aktheeme sun ah nih theem naak üng jah ng'oh shak kti’” tilü vek kti. 20 Sangsiim üng ng'yuk be tü kti ta “Aktheemea ah nih su ngngaih hin amdang ni ati sun Pangsiim noh kshing kti ni” tilü vek kti. 21 Asuna thoon lü kkhyaanga khyaih naak khoh sun käh sam sah na-ua. Abäng naküt hin nang nih-ea phäh ni. 22 Polüh ni, Apolüh ni, Khe Pa ni, ahina kho mdek ni, xün naak ni, thih naak ni, tuh-a ksüün jah ngooi khoa lok kkhaia ksüün naküte hin nang nih-ea phäh ni. 23 Nang nih-e hin Khrito üng nah nih shääng ei ktie. Khrito ta Pangsiim üng shääng ei kti ni.