15
Kah be naeo, kei noh kah ning jah msuh mtheh nah nih dou daan u thang kdo kkya sun tuh hi kah ning jah shüüm hlü shak be kti. Asuna kkhaana nah nih jum ei naak ngphun ei kti ni. Asuna thang kdo kkya üng thoon khyah naak nah nih yah ktie. Ngkhääng ktia ngman ei kyet ua. Asun kba am ani ta nah nih jum ei naak alapa vek kkhai. Kah pät kuung noh dou daang ngüshe aktung boka kah ning jah msuh mtheh be ni. Asun i ni ti ta Sangsiim üng ang'yuka kba nih mkhye ua phäh-a Khrito baan lam ktung üng thik kti ni. Ah nih nih-e noh Khrito sun msüm ulü Sangsiim üng ang'yuka kba amhnüüp kthum üng Pangsiim noh ah thoh shak be ni. Ah nih sun Peta-a ma-a pou lolü kona ngshäe xalei nghngih üng nghmuh ei kti. Kona akläke phya mhma am tan kti noh ahunata abäng noh ah nih hmuh u. Ah nih nih-e üng ka tuh hi aknung bok xüng ham ulü akhäk ni ah nih thih u. Kona Jakopa ma-a pou lolü kona ngshäe abäng noh ah nih hmuh be tü u. Akpäih naaka keia ma-a phi pou lok kti. Kei hin khya-a shüt kon nua hmi lok kti hnashena kba kah thoon kti ni. Kei hin ngshäe üng akneem boka thoon ngüshe ngshäa kah ngshui vai phi am kah looi ngkäih kti ni. I lüni ti ta kei hin Pangsiima shaang ngsiim kah mkhuh mhlih khoi kti. 10 Lüphi Pangsiima bä naak üng kah thoona kba kah thoon lok kti ni. Pangsiima bä naak hin keia phäh alapa am thoon. Alapa athoon vaia ksah-a aksea ngshäea kthaka kei noh mtun ei bok lü khuut kah poh kti. Lüphi asun hin kah päta mtun ei am ni. Keia k'uma vek kti Pangsiima bä naak üng kah mtun ei ni. 11 Kei noh phi nishe aksea ngshäe noh phi nishe, ahin kba thang kdo kya kpyaü hü u ngüshe nah nih jum ei lok ktie ni.
12 “Pangsiim noh Khrito thih naaka kkhyüh ah thoh shak be ni” tilü kah nih kpyaü hü ktie, am ni bä. Asun kba ani ta “Thi pääng ktie am thou lo be ti u” tilü nang nih üng ka akhäk noh i lü pyen khoh ktie ni. 13 Thik ktiea phäh thoh naak be vai am ave ta Pangsiim noh Khrito phi am mthou be. 14 Pangsiim noh Khrito am ah mthoh be ta kei nih-ea kpyaü hü phi amdang ni. Nang nih-ea jum ei phi alap ni. 15 Kei nih-e hin Pangsiima mong üng hleei pyen ktia kah nih thoon ktie. I lüni ti ta “Pangsiim noh Khrito ah mthoh be ni” tilü kah nih shak shi ktie. Asuna thoon lü thi pääng ktie aksanga am ah nih thoh be vai ta Pangsiim noh Khrito phi am thou be. 16 I lüni ti ta Pangsiim noh thipääng ktie am ah jah mthoh be vai ta Khrito phi thih naaka kkhyüh am thou be. 17 Khrito am ah mthoh be ta nang nih-ea jum ei naak hin alap ni. Nah nih mkhye phi am ning jah hlät ham. 18 Asun kba ani ta Khrito jum ei lü thik ktie hin sim pyak naaka phak kkhaie ni. 19 Nih nih-e hin kho mdeka nih xün naaka phäh sho xata Khrito nih ääp ei u ta kkhyaang abängea thea mpyeen ei shek ktia nih thoon kkhaie ni. 20 Lüphi Pangsiim noh angshaaia Khrito sun thih naaka kkhyüh ah thoh shak be ni. Kona Khrito hin thipääng lü thou be kti kho hah-a kshuunga aksük dä däa thoon kkhai. 21 Kkhyaang mata phäh ahina kho mdek kkhaana thih naak apha loa kba kkhyaang mata phäh thih naaka kkhyüh thoh naak be phi phalok kti. 22 I lüni ti ta Atama phäh kkhyaang abäng thik ktie. Khrito üng Pangsiim noh kkhyaang abäng üng xün naak ah jah peet ni. 23 Abäng hin Pangsiima nüt yaana kba thou be kkhaie. Aksük süka Khrito thou be ma kti. Kona Khrito ah kyum lobe üng jum ei lü ah nih üng shääng ei ktie sun thou be kkhaie. 24 Kona akpäih naaka ksüün phalok kkhai. Khrito noh Shatan yaai pa jah lung kho tuui yaaiea phun kam jah ksim kpyak lü ahina kho mdeka kkhaana jah up naake phi abäng jah lou la-be kkhai. Kona Khrito noh ah upa pe sun Pa Pangsiim üng ap be kkhai. 25 I lüni ti ta Khrito noh ah ye-e abäng ah kho pha kkea ah jah kpha vei säpa up yah kkhai ni. 26 Akpäih naak ah ksim kpyak vaia ye ta thih naak ni. 27 Sangsiim üng ng'yuka kti ta “Pangsiim noh akve naküt sun ah nih-a kho pha kkea ah jah taak ni” tilü vek kti. “Akve naküt sun ah kho pha kkea ah jah taak ni” ti hin akve naküt ah kho pha kkea jah taak shak kti ah pät Pangsiim ngpüi kti ta am ni. 28 Akve naküt Khritoa up naaka ah nih pha u üng ta ah pät Pangsiima sa kpa sun phi Pangsiima up naaka kkea vek kkhai. Asun üng Pangsiim noh abäng naküt sun küm seei ktia up kkhai ni. 29 Thipääng ktiea ksah-a patiso khaam kti akhäk vek ktie. Thipääng ktie hin am ah nih thoh be vai u ta patiso ah nih jah khaam peet hin i a phi am kyah. 30 Nih päte kuung ta i a thoon lü tuh vei säpa amhnüüp tä thih kyuk naak vai shoong toh ei lä lü nih ve yah ktie ni. 31 Kah be naeo, thih naak vai amhnüüp tä lü kah shoong kti ni. Nih Booi Pa Jeishüh Khrito üng nang nih-ea phäh sam sah ngüshe ahin aksang ni tia kah shak shi kti. 32 Ephet mlüh-a kkhyüng kshei kläänge kah jah ngtuk püi hin kho mdek kkhyaangea hmuh-a i a phi am kyah. Thipääng ktie am ah nih thoh be vai u ta “Nih ei vai u. Nih o vai u. Kho ngooi thih vaia la” ti hin aksang ni. 33 Pät noh pät käh hleep ei ua. “Ah mlung ngnei kshe nih püi naak ta nih nih-a ngnei shak kdo phi shelok kkhai” tia vek kti ni. 34 Nah nih mlung ngkyaai be hnüh she. Mkhye käh poh ti ua. Nang nih-ea k'uma akhäk noh “Pangsiima mong am kshing ngtu ktie ni” tilü nah nih ngke ei vai ua kah pyen hlük kti.
35 Lüphi akhäk noh “Thipääng ktie hin i hok kba thou lobe kkhaie ni, i hok kba puum sha üng thou lobe kkhaie ni” tilü ngthäh hlüto kkhaie. 36 Nang nih-e hin nah nih nghmoong ktie ni. Msi nah nih sho u üng msi ui sun sim pyak lüva ah phung sun xüng lok kti. 37 Mdeka nah nih nglin sho üng msi ui hin, i a msi ui phi nishe hnua lut lok kkhaia aphung üng am täng. Msi ui shoxata thoon kti. 38 Pangsiim noh ah mlung hlüa kba msi uia puum yo ah jah peet ni. Ah nih noh msi ui naküt üng mjü mat siim mat siim ah nih puum yo ah jah peet ni. 39 I lüni ti ta mti sha naküt phi am täng. Kkhyaanga sha mjü mat, kkhyüng ksheia sha phi mjü mat, kha-a sha phi mjü mat, nga-a sha phi mjü mat ni. Am täng u. 40 Kkhaan kho üng shääng ei kti puum sha phi velü kho mdek üng shääng ei kti puum sha phi vek kti. Lüphi kkhaan kho puum sha-a jou taai jah kho mdeka puum sha-a jou taai am lang lang. 41 Kho nghngia ngtou ngtaai jah mah khya-a ngtou ngtaai, aai shia ngtou ngtaai phi am täng. Aai shi mat jah mata ngtou ngtaai phi am lang lang u. 42 Thik ktiea thoh naak be phi ahina ng'yüi ni. Ah nih jah msüma puum sha ta sim pyak be ktia ngkho ni. Pangsiim noh ah jah thoh shak be üng ta käh sim pyak khoh kkhaia puum sha ka nak kkhaie. 43 Ah nih msüma puum sha hin ah lup shelü ah ktha phi ngseek kti. Ah mthoh naak bea puum sha ta ah lup ngtou ngtaai lü aktha phi vek kti. 44 Ah nih msüm üng kho mdek üng shääng ei kti puum sha-a thoon kti. Pangsiim noh ah mthoh be üng Mkhyangsiim üng shääng ei kti puum sha-a kyak kti. Kho mdek üng shääng ei kti puum sha phi ave ta Mkhyangsiim üng shääng ei kti puum sha phi vek kkhai ni. 45 Sangsiim üng ng'yuk kti ta “Atama ngshui kti aksüka thoon kti kkhyaang sun Pangsiim noh xüng shei ktia ah mhnün mseng lo” tilü vek kti. Khritoa thoon kti akpäih naak Atam ta xün naak jah pek kti ngmüi mkhya ni. 46 Asuna thoon lü Mkhyangsiim üng shääng ei kti hin aksüka thoon velo ma kti am ni. Kho mdek üng shääng ei kti aksüka ah mhnün mseng ni. Kona Mkhyangsiim üng shääng ei kti sun thoon velok kti. 47 Aksük süka kkhyaanga thoon kti Atam hin Pangsiim noh kho mdek mput khui üng ah mhnün mseng ni. Khritoa thoon kti anghngih naaka kkhyaang ta kkhaan kho pea kkhyüh lok kti. 48 Kho mdeka üng shääng ei kti kkhyaange hin Pangsiim noh mdek üng ah mhnün mseng Atam üng täng ktie. Asuna ng'yüia kkhaan kho üng shääng ei ktia kkhyaange hin kkhaan khoa kkhyüh lok kti kkhyaang üng täng ktie. 49 Nih nih-e hin mdek üng ah mhnün msenga kkhyaanga joong pan üng nih tänga kba kkhaan khoa kkhyüh lok ktia kkhyaanga joong pan üng phi nih täng kkhaie. 50 Kah be naeo, i kah pyen hlüni ti ta athi mah asha mah noh Pangsiima pea khoh am shääng na-khoh. Sim pyak be khoh ktia puum sha noh phi shak ngshääi am yah khoh.
51 Ngngaai ua. Ngthup ktia mong mat kah ning jah mtheh kkhaie. Nih nih-e hin abäng nih thi päih kkhaie am ni. Lüphi Pangsiim noh nih bänga nih puum sha sun jah thu hlai peet kkhai. 52 Akpäih naak kpuung tum kthai ang'yün lo üng ahunata, mik mkhyüp üng, ahin kba thoon lok kkhai. I hok kba ni ti ta kpuung tum kthai ang'yün lo üng Pangsiim noh thipääng ktie sun am thi-khoh ti kkhaia puum sha üng jah thoh shak be kkhai. Xüng ham kti nih nih-e ta Pangsiim noh puum sha akthai jah pek kkhai. 53 I lüni ti ta sim pyak kkhaia puum sha hin am sim pyak khoh ktia puum sha-a ngthu nghlai yah kkhai. Thih khoh ktia puum sha phi am thi khoh ktia puum sha-a ngthu nghlai yah kkhai. 54 Sim pyak khoh kti jah thi-khoh kti hin am sim pyak khoh kti jah am thi-khoh ktia ah nih thoon lo kona Sangsiim üng ang'yuka kba velo hnüh kti. Thih naak sim pyak hnüh ve. Booi Pa noh thäü thäüa thih naak ah nääng hnüh ni. 55 “Thih naako, nanga ngnääng naak ta hoa ni. Nah jah shun naak ta hoa ni” tilü vek kti. 56 Thih naak noh mkhye mshoh naak üng ah jah shun vaia ah hiit vek kti. Mkhye naak ta thuum üng hiit vek kti. 57 Lüphi Pangsiim noh nih Booi Pa Khrito üng ngnääng naak jah pek kti. Ah nih sun nih mküüi mtou vai u. 58 Kah ning jah kphya naak be naeo, asuna thoon lü ngkhääng ngpaang ktia jum ei ua. Käh up lat lü ve ua. Booi Pa-a khuut poh däm däm ua. Booi Pa-a khuut nah nih poh u hin phi amdanga am thoon ati sun kshing ei ua.