13
Kei noh kkhyaangea läk jah kkhaan kho ngshäea läk pyen thei kyo ngü she phi mhlä mkhya naak am ave ta akthai ng'yüng kti moong am ani üng ngsheeia kba ni ah ve. Shahma ngsiima pyen, pyen thei ngüshe phi ngthup kti naküt ngja-kya khoh ngüshe phi ktheem ngvaai naak mjü kküm velü phi kho msuung mhnoon khoh ktia jum ei naak vekyo lüphi mhlä kphya naak am ave ta kei hin alapa kah kyak kti. Mpyeen kshe-e sun kah külak xüi ngui naküt jah pelü jah tu mbei ngüshe phi jum ei naaka phäh kah puum sha mei üng shi vaia ap ngüshe phi mhlä kphya naak am ave ta keia phäh do naaka am thoon laang. Mhlä kphya naak hin mlung shaaü lü mlung hnip hnooi kti. Ngkeei ngku naak am ve. Am pa kkhyap. Mhlä kphya naak hin am shou shat. Ah päta do naak vai am bük. Päta mlung ktüüma thoon yah kkhai tia mlung am ve. Ah mlung am säh thei. Püia mkhye mlung üng am ksep. Mhlä kphya naak hin abäng naküt suun ei kti. Khye kti üng am je kyai. Aksang üng ni ah je kyai. Mhlä kphya naak noh abäng naküt sun jum ei kti. Abäng naküt ääp ei kti. Abäng naküta kkhaana mlung shaaü kti. Mhlä kphya naak hin i tüh-a phi am päih. Shahma ngsiim pyen khyaih naak khoh sun kho mhnüüp mat üng ashüt naak phak kkhai ni. Mkhyangsiima pyen shak aksea läk phi am shum ei ti u. Theem ngvaai naak phi thuum-in lok kkhai ni. I lüni ti ta nih theem ngvaai naak hin am küm seei. Shahma pyen nih pyen phi am küm seei. 10 Küm seei ktia pha lo üng ta am küm seei naküt kti sun khyük leih ei päih kkhai ni. 11 Ahlaan üng kah hnashen k'um üng hnashena kba kah ngthu ei kti, kah su ngngaai kti, hnashena kba kah hmu-ngjak kti. Lüphi pa songa kah thoon lo kona ta hnashena kba kah thoon ve naküt sun kah hoih päih ni. 12 Tuh hi nih nih-e noh lup büh naak hman üng nih hmuh-a kba abäng naküt sun käh ngshi ngkyaai ktia nih jah hmuk ktie. Ngooia ta Booi Pa sun ah hmaai ma kuunga nih hmuk kkhaie. Tuh hi ta akhäk ni kah kshing ham. Pangsiim noh akküma ah nah kshinga kba ngooia ta abäng naküt sun küm seei ktia kah ngja-kya päih kkhai. 13 Asun kba ani ta jum ei naak, ääp ei naak, mhlä kphya naak anghläia veham kkhaie. Ahin mjü kthuma k'um hin üng mhlä kphya naak hin aktung bok ni.