1 Kah be naeo, Mkhyangsiima jah peet khyaih naak khoh-e sun aksanga kah ning jah ngjaak kya hlü shak kti. 2 Mhnama lup nah nih hjok khah k'um üng käh ngthu ei kti mhnama lupe noh lam ning jah hmü shak ktie ni. Mhnama lup noh ah ning jah pin man hlo hleep naak da nah nih sit ktie ni. 3 Asuna thoon lü kah ning jah kshing hlü shak ta Pangsiima Mkhyangsiim üng kkhyü pyen kti noh Jeishüh sun i hok kba phi am yün she khoh. Mkhyangsiim käh ngpüi ktia u noh phi Booi Jeishüh sun “Booi Pa ni” am ti khoh. 4 Khyaih naak khoh amjü kküm vekyo ulü phi khyaih naak khoh jah pek kti ta Mkhyangsiim mat ni ah ve. 5 Booi Pa-a khuut poh naak vai lam amjü mjü vekyo lüphi Booi Pa ta mat däk ni. 6 Pangsiim noh kkhyaang sun lam amjü mjüa jah shum ei kyo lüphi ah nih bäng üng bä naak jah pek kti ta Pangsiim mat däk ni. 7 Jum ei naak üng nih bäng nih däm duh lo vaia Mkhyangsiim noh jum ei kti mat siim mat siim üng khyaih naak khoh mjü mat siim jah pek kti. 8 Mkhyangsiim noh kkhyaang mat üng theem naak üng ngthuh ei naak pek kti. Asuna Mkhyangsiim noh kkhyaang mat üng pum ngyam üng ngthuh ei naak pek kti. 9 Mkhyangsiim noh kkhyaang mat üng däm duh kti jum ei naak pek kti. Asuna Mkhyangsiim noh mat üng am shi khyaih kti mdo naak be pek kti. 10 Mkhyangsiim noh mat üng mün sam kshe poh naaka khyaih naak khoh pelü mat üng shahma ngsiim pyen naak khoh khyaih naak khoh pelü mat üng Mkhyangsiim üng mä, kho yaaiea phun kam üng mä, ah pyen khü ti sun li khya naaka khyaih naak khoh pek kti. Mat üng Mkhyangsiim noh ah pyen shaka kba aksea läk pyen naak khoh-a khyaih naak khoh pek kti. Mat üng Mkhyangsiim noh ah pyen shak aksea läk kkhyü lat khyaih naak khoh pek kti. 11 Ahina khyaih naak khoh abäng hin Mkhyangsiim mat däk noh ah jah peet ni. Ah nih noh ah hlü eia kba kkhyaang naküt üng khyaih naak khoh mjü mat siim jah pek kti.

12 Puum sha mat üng puum yo kho hah vek kti. Puum yo kho hah vekyo lüphi puum sha mat däka ni athoon. Khritoa puum sha phi ahina ng'yüi ni. 13 I lüni ti ta nih nih abänge Jüdah mjü nishe, Kärih mjü nishe, kkhyaang lät nishe, mpya nishe puum sha mat üng nih shääng ei naaka ngshing ngte naak Mkhyangsiim mat üng patiso nih khaam ei ktie. Abäng noh Mkhyangsiim mat däk nih yah ei ktie. 14 Puum sha mat hin puum yo mat üng thoon khoh kti am ni. Puum yo kho hah üng thoon lok kti ni. 15 Avai shüa kho noh “Kei hin kuta am kah thoona phäh puum sha-a puum yo üng am ngpüi ngü” tilüphi puum sha-a puum yoa thoon kti ni. 16 Nghnga noh phi “Kei hin mika am kah thoona phäh puum sha üng am shääng ei ngü” tikyo lüphi puum sha-a puum yoa thoon kti ni. 17 Puum sha abäng mik kkinga ah thoon päih ta i hok kba ngja-khoh kkhai ni. Puum sha abäng nghnga kooi kkinga ah thoon päih ta i hok kba ni ahooi ahäät yah kom. 18 Aksanga ta Pangsiim noh puum yoe abäng sun ah mkhüh-a kba puum sha-a k'uma ah nih hnün üng ah jah taak ni. 19 Puum yo mat däka ah thoon ta puum sha-a i hok kba som khoh kkhai ni. 20 Asuna thoon lü puum yo kho hah ngpüi ktia puum sha mata thoon kti. 21 Mik noh kut üng “Nang am hlü kti” tilü pyen lü am ng'yah. Lu noh phi kho üng “Nang am hlü kti” tilü pyen lü am ng'yah. 22 Aksanga ta ktha ngseek kti puum yoe hin sha lü ktung bok ktie ni. 23 Nih jah hmuh mshita puum yoe hin sha lü nih jah mseei mshang yah ni. Kkhyaang üng am nih hmuh hlü shak puum yo sun shui shak kdo üng nih khüm pha yah ni. 24 Ngtou ngtaai kti nih puum yo sun ahin kba onga mshü mseei vai am hlü. Pangsiim noh ahin kba nih puum sha sun ah mkho kbeh ni. Kkhyaange noh ah nih hmuh mshita puum yo sun mshü mseei bok vaia Pangsiim noh ah mkhüh naak ni. 25 Asun kba puum yo üng mkhoi mkhya naak käh vek ktia puum sha-a puum yo abäng mat jah mat angteh-a büh ten yah vai. 26 Puum yo mat ah khui kha üng puum yo abäng noh puk sheet püi yah ktie. Puum yo mat noh mküüi mkhyah naak ah yah üng puum yo abäng noh je kyai püi yah ktie. 27 Nah nih bäng hin Khritoa puum sha-a thoon u kti lü mat siim hin ah puum yoa nah nih thoon ktie. 28 Shaang ngsiim üng nah nih bäng hin nah nih hnün üng Pangsiim noh ah ning jah taak u ni. Aksüka ngshäe, anghngih naaka shahma ngsiime, akthum naaka Sangsiim jah mthei ktie, kona mün sam kshe poh khoh ktie, kona am khyaih kti jah mdo be ktie, kkhyaang jah ku ei ktie jah pä khong thei ktie, Mkhyangsiima jah peet aksea läk pyen ktie ah jah taak ni. 29 Ah nih bäng hin ngshäa am thoon u. Shahma ngsiime, am ani üng Sangsiim jah mthei ktie phi am ni u. Kona abäng üng mün sam kshe poh naak khoh hiit phi am ve. 30 Kkhyaang naküt noh am shi khyaih naak mdo be khoh ktie phi am ni. Kona Mkhyangsiima jah peet aksea läk phi pyen khoh ktie am ni. Mkhyangsiima pyen shak aksea läke sun abäng noh ngja-kya khoh ktie am ni. 31 Aktung boka khyaih naak khoh-e sun jah hmaaü ei ua. Lüphi ahina kthaka do bok kti lam kah ning jah mhnüh be tü kkhai.