1 Kah be naeo, Mosheia kha üng nah nih pu paea ve soh sun kah ning jah shüüm hlüshak be ktie ni. Pangsiim noh ah nih bäng sun kho ngmei üng lam jah mshüüm lü kshu kshaai ngshuk ngvän naak üng abäng sun jah ksung ngvoong lü mpang lai tui shen sun ah jah kkaan püi ni. 2 Kho ngmei jah mpang lai tui shen üng Mosheia akläka ah nih thoon naaka abäng noh patiso khaam ei ktie. 3 Pangsiim noh kkhaan khoa ka ah jah peet ei ksaak sun abäng noh ei ktie. 4 Pangsiim noh ah jah peeta tui sun abäng noh ok ktie. Ah nih nih-e noh lung nua kkhyüh lut lok kti tui ok ktie. Asuna lung nu ta anghläia ah nih hlonga jah khyüi kti Khrito sun ti hlü ni. 5 Ahin kba nikyo lüphi aknung bok Pangsiima mlung hlüa käh thoon ve ulü moa ayooka ngphuh ngphyang juut kye ei hüt päih ktie. 6 Am do kti käh nih kpaam ei vai ua Pangsiim noh ahin kba ah nih thoon ve naak u üng nih nih-e ah jah msuh msääi ni. 7 Mhnama lup käh hjok khah ubä. Ah nih nih-ea kshuunga akhäk noh mhnama lup hjok khah ktie. Sangsiim üng ng'yuk kti ta “Kkhyaange mhnama lup hjok khah pooi üng ei ok kkhaia ngshut lü nglaam kkhaia ngdüüi lok ktie” tilü vek kti. 8 Ah nih nih-ea k'uma akhäk ah nih boh bah ua kba nih nih-e am nih boh bah yah u. Pangsiim noh ah nih boh bah ua phäh mtaam jah pelü kho mhnüüp mat üng toong nghngih jah thoong kthum thik ktie. 9 Pangsiim käh saam xa vai. Ah nih nih-ea k'um üng ka akhäk noh Pangsiim kook saam ulü Pangsiim noh kphyu kphyaai üng jah suih shak lü thik ktie ni. 10 Nang nih-e am mlu msi yah u kti. Ah nih nih-ea k'uma akhäk mlu msi ulü Pangsiim noh thih naaka kkhaan kho ngshä tüüi lolü ah jah hnim shak ni. 11 Pangsiim noh ah nih mkhyea phäh i hok kba jah si jaang kti ati sun ah jah mhnüh naaka nih pu pae noh asun kba shoong toh ei khoi ktie ni. Khrito ah kyum lo hlü be hnüh-a ksüün üng xüng shei kti nih nih-ea ah jah msääi msing naaka ahin kba Pangsiim noh Sangsiim üng ah jah yuk shak ni. 12 Asuna thoon lü mat mat noh “Kah jum ei naak ngkhääng kti” tilü ah ngngaih ei ta käh ah kyuk vaia mseei ei kyet she. 13 Hlo hleep naak nah nih shoong toh naküt u hin kkhyaang abäng noh ah shoong toh-a ng'yüi hlo hleep naak ni. Pangsiim kkhyü shing üng vek ktia thoon lü nah nih jum ei naak ngjung ktha üng am nah nih ngnääng khoh vaia hlo hleep naak am ning jah shoong toh ei shak. Hlo hleep naak nah nih khaam ei naak khoh vai Pangsiim noh ktha ning jah pelü nah nih lät naak vai lam phi ning jah mboon peet kkhai.

14 Asuna thoon lü kah kphya naak kah looi püieo, mhnama lup hjok khah naak sun mphen ua. 15 Apum ngyam mah-ea ning jah ngngaai ngüshe kah ning jah ngthuh ei püi ktie ni. Asuna thoon lü kei kah pyen hlü sun nah nih pät noh mkhoi mkhya ei ua. 16 Pooi ngsiim phäih-a phäh Booi Pa noh Pangsiim je ei kti. Nih nih-e noh phi Pooi ngsiim phäih-a phäh Booi Pa nih mküüi mtou ktie. Asuna phäih üng ka nih o-ulü Booi Pa üng nih nglooi ei ulü ah thi ah mshooi naak üng ka do kya naak üng phi nih ngpüi ktie, am ni bä. Kkhaai kpeh kphyüt lü nih ei ulü Khritoa puum sha üng nih ngpüi ktie am ni bä. 17 Kkhaai kpeh mat däka thoon lü kkhyaang kho hah-a nih thoon kyo ulü phi ahina kkhaai kpeh mat däk abäng noh nih ei ua phäh puum sha mata nih thoon lok ktie. 18 Isare kkhyaange jah bük kti lü ngngaaia. Khah naak kkhyüng üng ka ei ok ktie hin khah naak lung päm üng Pangsiim hjok khah naak üng ngpüi ktie am ni bä. 19 I kah pyen hlü ni ti ta mhnama lup kkhyüng kshei üng khah ktiea phäh do naaka thoon kti atia kah pyen hlü mä. Am ani ta mhnama lup hin kkhyü mhnama thoon kti ati kah pyen hlüo. 20 Am ni. Pangsiim am kshing ktiea khah naak hin Pangsiim ah nih khah naak am ni. Kho yaaie ah nih jah khah naak ni. Kho yaaie üng am ning jah nglooi ei hlüshak ngü. 21 Pooi ngsiim phäih olü kho yaaia phäih phi olü am ng'yah. Pooi ngsiim ei kbe üng ka ei u kti lü kho yaaia ei kbe am ei yah u kti. 22 Pangsiima ngkeei ngku vai nah nih poh hlük kkhaie mä. Pangsiima kthaka nih ktha mah bok kkhaieo. 23 “A i phi kah poh naak khoh mkot vek kti ni” tilü akhäk noh pyen ktie. Lüphi a i phi nih poh ta jum ei naaka phäh do naaka am thoon. “A i phi nih poh naak khoh-a mkot vek kti.” Lüphi a i nih poh hin phi jum eia ngkhääng naak loa am thoon. 24 Kkhyaang naküt noh nih päta do naak vai däk am nih bük yah. Nih püi poa do naak vai phi nih büh yah vai. 25 Joih naaka ah nih joih meh abäng nah nih ei o-khoh ktie. Nah mlung noh käh ah ning kbäü ei vaia meh hin hoa ka atia käh ngthäh xa-a. 26 I lüni ti ta Sangsiim üng ng'yuk kti ta “Kho mdek jah kho mdek kkhaana akve naküt Pangsiima ka ni” tilü vek kti. 27 Pangsiim am kshing kti noh buh ning khü ei lü seh vaia nah mkhyah ta ah ning mbei naküt sun ei bä. Nah mlung noh käh ah ning kbäü ei vaia “Meh hoa ka ni” tia käh ngthäh-a. 28-29 Lüphi Khritjaan be na noh “Meh hin mhnama lup khah naak ni” ah ti ta käh eia. Ning mtheh kti käh ah up lat vaia käh eia. Nah mlung noh am ning kbäü ei kyo lüphi nah be na sun ah mlung noh kbäü ei khoh kti ni. Asun kba ani ta Khrito üng kah yah-a lät naak sun kah be na ah mlung noh käh ah kbäü ei vaia am shum ei yah vaio. 30 “Kah ei ooka phäh Pangsiim kah je ei kti. Asun kba ani ta i lü kah je ei naak ei ooka phäh mat mat noh nah kbäü ei yah kkhai ni” tilü akhäk ngthäh to kkhaie. 31 A i ei kti lüphi ok kti lüphi poh kti lüphi Pangsiima jou taaia ngshing ngte naak vai abäng sun poh-a. 32 Jüdah mjü, Kärih mjü, Pangsiima shaang ngsiim abänga phäh käh ah nih up lat vaia vea. 33 Kei phi kah poh mshah naküt üng kkhyaang abänga mlung hlüa thoon vaia kah mtun ei kti. Kah päta do naak vai am bük ngü. Kkhyaang kho hah noh thoong khyah naak ah nih yah ei vai jah kkhyaang kho hah-a do kya naak vaia kah mtun ei kti.