KORINEA SA AKSÜK
Polüh noh Korin mlüh shaang üng ah kbia sa
1
Kei Polüh hin Pangsiima hlü eia kba Booi Pa Khritoa ngshäa kah thoon vaia ah nah xü ni. Kei jah nih na Sho Theng noh nah nih veeia sa kah nih yuk lok kti. Korin mlüh-a vek kti Pangsiima shaang, Booi Jeishüh Khrito üng ngsiim ngsaih ktie, Pangsiima kkhyaang ngsiima thoon kkhaia ah jah xü kse eie jah kei nih-ea Booi Pa-a thoon lü nang nih-ea Booi Pa-a phi thoon kti Booi Jeishüh Khrito hjok khah kti tui khyong abäng üng ka-a phäh ahina sa kah nih ning jah yuk lo ni. Nih Pa Pangsiim jah nih Booi Pa Khrito noh bä naak jah diim deih naak nang nih-e üng ning jah peshe.
Pangsiim noh Booi Jeishüh Khrito üng ah ning jah peet bä naaka phäh Pangsiim sun nang nih-ea phäh-a anghläia kah je ei ni. I lüni ti ta Khrito üng nglooi ei u kti lü nah nih xün naak üng a i üng phi nah nih däm duh lok ktie. Nang nih-e noh hiit üng nah nih pyen kshak khoh vai u jah theem ngvaai naak üng nah nih ve vai ua ah nih noh ning jah ku ei kti ni. Khritoa hiita mong kah shak shi hin aksang ni ati sun nang nih-e üng ngshing ngte kti ni. Mkhyangsiim noh ah jah peet khyaih naak khoh-e sun nang nih-e üng küm seei ktia vek kti ni. Asun kba ni nang nih-e noh nih Booi Pa Khritoa kyum lo be vai sun nah nih yüng ei ktie. Nih Booi Pa Jeishüh Khrito ah kyum lo bea mhnüüp üng kbäü ei naak üng nah nih lät vaia nah nih jum ei naak üng ning jah ngkhääng shak kkhai. Pangsiim kkhyü shing üng vek kti ni. Ah nih noh ah sa kpa nih Booi Pa Jeishüh Khrito üng nah nih nglooi ei vai ua nang nih-e ning jah khü kti.
10 Kah be naeo, nih Booi Pa Jeishüh Khrito noh kei üng ah nah peet hiit üng kah ning jah mtheh hlük kti. Mat jah mat nah nih ngthäh ngkhyah u üng nah nih mlung ang'yäp vai hlü kti. Käh nah nih ngkhoi ngpa vai ua mtun ei kkhüt ua. Nang nih-e hin mata mlung üng täng ktia ve ua. 11 Kah be naeo, shaanga k'uma ngsuh ngkaih u kti lü nah nih si u ktiea nah nih be Khaloa kkyoong üng ka akhäk noh nah mtheh lok ktie ni. 12 I kah pyen hlü ni ti ta nang nih-ea k'uma mat noh “Kei hin Polüh üng ni kah shääng ei” ah ti. Mat be tü noh ta “Apolüh üng ni kah shääng ei” ah ti. Mat be tü noh phi “Khe Pa üng ni kah shääng ei.” Mat noh phi “Kei hin Khrito üng ni kah shääng ei” tilü nah nih pyen ktie. 13 Khrito hin ngkhoi ngkhya ktio. Polüh hin nang nih-ea phäh baan lam ktung üng thih suun ei ktio. Asun am ani üng Polüh-a ngming üng patiso nah nih khaam ei ktieo. 14 Nang nih-ea veeia Kyipuh jah Kajüh nghngih sho xat patiso kah jah peeta phäh kah je kti. 15 Asun kba am ani ta “Kei noh Polüh-a ngming üng patiso kah khaam ei kti ni” akhäk noh tihlü to kkhaie. 16 Aa, Satei Phana kkyoong long phi patiso kah jah peet. Asuna thea jum ei kti akse u phi patiso kah jah peet sun am hmat ti ngü. 17 I lüni ti ta Khrito noh patiso jah pek kkhaia kei ah nah tüih lo am ni. Thang kdo kkya kpyaü kkhaia ni ah nah tüih lo. Baan lam ktung üng Khritoa thih naaka thanga hiit käh akhyüh vaia kei noh kah jah msuh mtheh üng kho mdek aktheemea kkhyü am shum ei ngü.
18 Thoong khyah naak am yah ktiea phäh baan lam ktung üng Khritoa thih khaam naaka thang hin nghmoong naaka thoon kti. Thoong khyah naak yah kti nih nih-ea phäh ta asuna thang hin Pangsiima hiit ni. 19 Sangsiim üng ng'yuk kti ta “Aktheemea theem naak sun kah ksim kpyak kkhai ni. Pum ngyam mah-ea ah nih pum ngyam sun kah jah sing pang shak kkhai ni” tilü vek kti. 20 Pum ngyam mah kti sun hoa ni. Sangsiim ktheem sun hoa ni. Kho mdek theem naak pyen kshak pen lai nak kti sun hoa ni. Ahina kho mdeka theem ngvaai naak hin Pangsiima hmuh-a nghmoong naaka thoon kti ati sun angshing ngte shak ni. 21 Kkhyaang noh päta theem ngvaai naak üng Pangsiim käh ah kshing khoh vaia Pangsiim noh ah pum ngyam üng ah mkhyah ni. Asuna ksah-a kei nih-ea nghmoong kti kkhyü üng jum ei kti noh kuum kyan naak ah nih yah vaia Pangsiim noh ah mkhüh naak ni. 22 Jüdah kkhyaange noh ngshing ngte naak hmuhlük ktie. Kärih kkhyaange noh theem ngvaai naak shui hjap ktie. 23 Kei nih-e noh ta baan lam ktung üng thik kti Khritoa mong kah nih kpyaü ktie. Asuna thang Jüdah-e noh am hlü ei ulü ah ning ngshuk ngvän naak ni. Kkhyaang mjü kse-ea phäh ta asuna thang nghmoong naak ni. 24 Lüphi Pangsiima jah khüa kkhyaanga phäh ta, Jüdah mjü phi nishe, kkhyaang mjü kse phi nishe kah nih pyen kshaka thang üng Khrito hmulok ktie. Khrito sun ah nih nih-ea phäh Pangsiima hiit jah theem naaka thoon kti ni. 25 I lüni ti ta Pangsiima nghmoong naak hin kkhyaangea theem naaka pum ngyam mah bok kti. Pangsiima ktha ngseek naak hin kkhyaangea ngjung ktha-a kthaka hiit mah bok kti.
26 Kah be naeo, Pangsiim noh nang nih-e ah ning jah khü üng nah nih thoon ve sän shüüm be ua. Nah nih k'uma kho mdek pum ngyam mah ktie üng ka, Booi khong mange üng ka, pa kkhui mah amjü kdäm üng ka alääm ni nah nih ngpüi u. 27 Lüphi aktheeme ah nih ngke ei vai ua kho mdek kkhyaange noh nghmoong ktia ah nih jah ngngaih u sän Pangsiim noh ah jah xü ni. Aktha mah-e ah nih ngke ei vai ua kho mdek kkhyaange noh aktha kka-a ah nih jah ngngaih u sän Pangsiim noh ah jah xü ni. 28 Kho mdek kkhyaange noh ah nih jah mdih mshui u, i a am ah nih jah mshui mhlei ei sun Pangsiim noh ah jah xü ni. Asun kba kho mdek kkhyaange noh akküüi boka ah nih ngngaih u sun Pangsiim noh alap ni tia jah mhnüh kti. 29 Asuna thoon lü nghngi siim sa hin Pangsiima ma-a i hok kba phi am nih pa khyap khoh u. 30 Pangsiim noh nang nih-e sun Booi Jeishüh Khrito üng ning jah nglooi ei shak lü Khrito sun nang nih-ea pum ngyama ah thoon shak ni. Ah nih-a phäh Pangsiim üng ning ng'ye lobe ulü nih nih-e hin ngsiim ngsaih kti kkhyaanga nih thoon lok ktie. Khrito hin nih nih-ea thoong khyah naaka thoon kti ni. 31 Asuna thoon lü Sangsiim üng ang'yuka kba “Pa kkhyap hlük kti ta Booi Pa-a poh mshah-e üng pa kkhyap she” tilü vek kti.