1 Sholüh ta Booi Pa-a akläke jah mkyüh msiing ham lü jah hnim kkhaia väät väät ei kti. Khotu ngsiim kdäm boka veei sit kti. 2 Tama Kuh mlüh Sangsiim ngthei naak kyong upe üng ah jah peet vaia sa ah tong. Tama Kuh mlüh-a akläke ah jah hmuh naküt nghnu mi kpa mi, Jeirüh Shalem mlüh-a ah jah seh vaia jah man khoh kti tilü ah jah yuk shak. 3 Tama Kuh mlüh-a sit lü ah pha hlü hnüh üng kkhaan khoa kkhyüh akvaai nu ahunata ah ling lenga mlaih lok kti. 4 Asun üng ta Sholüh kyulo ton-in lü “Sholüh, Sholüh, ahin kba ta nah nah mkhuh mhlih kti ni” tilü pyen püi ktia kthai ah ngjaak. 5 Sholüh noh “Booi Pao, nang u ni” tilü ah kthäh. “Kei hin nah nah mkhuh mhlih-a Jeishüh ni” tilü ah pyena kthai ah ngjaak be. 6 “Asuna thoon lüphi thou loa. Mlüh k'uma sita. Asua nah poh mshah vai ning mtheh mkhyah kkhaie ni” tilü ah pyen. 7 Sholüh-a hlonga sit ktie phi ngdüüi-in ulü am msik msot dat u. I a thoon lüni ti ta kthai thak ngja-ulü u phi am hmu-u. 8 Sholüh thou lolü mdei hü kyo kti. Ah mik mü ei lü i phi am hmu-ti. Ah kut üng man ulü Tama Kuh mlüh k'uma ah nih seh püi u. 9 I phi käh ei olü mhnüüp kthum vek kti. 10 Tama Kuh mlüh-a Ananih-a ah nih shui akläk mat vek kti. Ananih sun Pangsiim noh mhnüh mdan üng “Ananih-o” tilü Booi Pa noh ah khü. “Booi Pao, hia kah vek kti ni” tilü ah ääi be. 11 Booi Pa noh “Thou loa. Lam ngpyuuna ah nih shui lam üng sita. Asua Tashüh mlüh-a ka Sholüh-a ah nih shui sun Jüdah-a ima ksäk vaaia. Tuh hi tä sham um kti ni. 12 Tuh hi ah nih noh mhnüh mdan üng Ananih ngming nak kti lut lolü ah mik ah vaai lo be vaia ah kkhaana ah kut mtaang lü tä sham peet kti ah hmuh ni” tilü ah pyen. 13 Ananih noh “Kah Booi Pao, Sholüh hin Jeirüh Shalem mlüh-a ning jum ei ktie i hok kba onga jah mkhuh mhlih kti ati sun kkhyaang kho hah-a veeia kah ngjaak va am ni shü. 14 Ahina mlüh-a phi ning hjok khah ktie kkhyaange sun khotu ngsiim kdäm boka hiit üng jah man kkhaia lok kti ni” ah ti be. 15 Booi Pa noh “Sita, Sholüh hin kkhyaang mjü kse-ea veei phi, shang phuhlangea veei phi, Isare kkhyaangea veei phi kah mong jah kshing shak kkhaia, kah khuut poh kkhaia kah xü kse pääng ni. 16 Keia hmaaia phäh-a i hok kba onga khui kha mpyeen she yah kkhai ati sun kah pät noh kah mhnüh mtheh kkhai ni” ah ti. 17 Asun üng Ananih sit lü asuna ima lut vaai kti. Sholüh-a kkhaana ah kut ah mtaan. “Kah na Sholüh-o, nah lo naak lama nah hmaai ma-a pou lok kti Booi Pa Jeishüh kuung kuung noh ah nah tüih lo ni. Nah mik ah vaai lo be vaia phi Mkhyangsiim üng nah be bang vaia phi ah nah tüih lo ni” tilü ah mtheh. 18 Sholüh-a mik üng nga lipa mäia ahunata ngkhok lolü ah mik vaai lobe kti. Thou lolü patiso khaam ei kti. 19 Asun üng ei o-lobelü ah ngjung ktha velobe kti. Tama Kuh mlüh-a akläkea hlonga noong vei vek kti.

20 Sangsiim ngthei naak kyonga sit hü lü “Jeishüh hin Pangsiima Sa ni” tilü sut ei lü kpyaü hü kti. 21 Sholüh-a pyen kshak ngja-naküt kti mün sam tong ktie. “Jeirüh Shalem mlüh-a Jeishüh hjok khah ktie jah hnim kti sän ah nih am ni bä. Ahina Tama Kuh mlüh-a ah lo naak phi Jeishüh hjok khah ktie jah man lü khotu ngsiim kdämea veei jah seh kkhaia lok kti am ni bä” tilü ngthäh ngkhyah ktie. 22 Sholüh ta Mkhyangsiima ngjung ktha üng be lo däm däm kti. “Jeishüh hin Khrito ksang ni” tilü angshing ngtea jah mhnüh mtheh lüta Tama Kuh mlüh-a vek kti Jüdah-e noh i phi am pyen be thei u. 23 Hjou lolüta Jüdah-e noh Sholüh hnim kkhaia ngseng ngkyam lok ktie. 24 Asun kba ah nih ngseng ngkyam sun Sholüh noh ah kshing lo. Jüdah-e noh Sholüh ah nih hnim vaia amhnüüp mthan mhläi lü mlüh ngvoong mkota mtät kyet ktie. 25 Asun üng Sholüh sun ah püie noh mthan mat üng ta sä nu üng xon ulü ngvoong k'hlüng nua kkhyüh kho kpung da yüüi üng ah nih juk kkhyaak u.

26 Asuna kthoh Jeirüh Shalem mlüh-a sit kti. Akläkea hlonga ngpüi ngpo hlü kyo kti. Asuna thoon lüphi Sholüh sun Booi Jeishüh-a akläk ksang ni ati sun am jum ulü abäng noh ah nih kyüh ei pyei u. 27 Asun üng ta Pana Pa noh Sholüh sun khü lü ngshäea veei ah seh püi. “Sholüh noh lama Booi Pa ah hmuh ni. Booi Jeishüh noh ah ngthuh ei püi ni. Sholüh noh hlem hlem pan pana Jeishüh-a mong Tama Kuh mlüh-a kpyaü hü kti ni” tilü ah jah mtheh mkhyah. 28 Asun kona Jeirüh Shalem mlüh-a vek kti akläkea dä ayüma velü Sholüh noh käh kyüh kyook ei lü Jeishüh-a mong kpyaü hü kti. 29 Kärih läk pyen kti Jüdah-e mah mah sok sek lok ktie. Asuna thoon lü Sholüh hnim kkhaia mtun ei lok ktie. 30 Ah nih hnim hlü u sun jum ei ktie noh kshing lo-ulüta Sholüh sun Kesha Reh mlüh-a seh püi ulü Tashüh mlüh-a ah nih tüih u. 31 Asun kona Jüdah, Kalile, Shama Rih hnea shaang ngsiime diim deih lü ve-ei yah ktie. Mkhyangsiima ah jah ku ei naak üng ah nih jum ei naak ngkhääng lolü Booi Pa kyüh kyook lei shong ktie. Jum ei lok ktie phi nung lo nak nak ktie.

32 Peta sun sa hia sit hü lü Lütah mlüh-a vek kti Pangsiima kkhyaang ngsiimea veei phi phavaai kti. 33 Asua Aneah ngming nak kti mat ah hmuh. Aneah sun ah kut kho thi lü ah ngkoh naaka kkhyüh am ah thoh lo kum kkhyet lohnüh kti. 34 Peta noh “Aneah-o, thou loa. Jeishüh Khrito noh ning mdo be kti ni. Nah ih naak jah hooi liima” tilü ah pyen. Aneah ahunata ngdüüi lokshet kti. 35 Lütah mlüh jah Sharon mlüh-a vek ktie noh ah nih sun hmu-ulü abäng noh Booi Pa Jeishüh jum ei lok ktie. 36 Jopa mlüh-a ta Tapita ngming nak kti nghnu mi mat vek kti. Kärih läka Tokah-a ah nih shui u. Asuna Tokah sun jum ei kti ni. Kkhyaange aläa jah ku thei ei lü ampyeen kshe-e jah yet mshem kti kkhyaang kdo ni. 37 Asun k'um üng am khyaih lolü thik kti. Ah yook sun tui mhloh ulü khaan thapa ah nih phään vaai u. 38 Lütah mlüh jah Jopa mlüh säh kti. Lütah mlüh-a Peta ah ve sun Jopa mlüh-a ka akläke noh ngja-ulü akjaanga lok kkhaia kkhyaang nghngih Peta-a veeia ah nih jah tüih u. 39 Peta ngdüüi lolü ah nih hlonga sit kti. Ah nih pha vaai u üng khaan thapa ah nih seh püi u. Hmeei nue abäng Peta-a pi peia ngshut lo-ulü kyap ktie. Tokah ah xün k'um üng ah jah kkhyüi peet shui shake ah nih jah mhnüh u. 40 Peta noh abäng kho kpunga jah tüüi ma lü ah mkhuuk lu üng ngdääng lü tä sham kti. Yook da mang lü “Tapitao, thou loa” ah ti. Mdei lolü Peta hmulüta ngshut lok kti. 41 Peta noh ah kut man lü ah mthoh. Kkhyaang ngsiime jah hmeei nue jah khü be lü ah xün lo be sun ah jah mhnüh. 42 Asuna thang sun Jopa mlüh-a ngpyaü hü päih lü kho hah noh Booi Pa Jeishüh jum ei lok ktie. 43 Asun kona Peta Jopa mlüh-a kho vei pa velü meh vun pyaang kti Shimona ima ngseei kti.