1 Asun üng Ananih-a ah nih shui mat vek kti. Ah kkhyua ngming ta Saphi Rah ni. Ananih noh ah kho hmün mat ah joih. 2 Lüphi ah yah-a ngui ah päta phäh-a akhäk ah süm ei. Akhäk ta ngshäe üng ah jah peet lo. Ngui abäng ah jah peet loa hana ngsom kti. Ah kkhyu noh phi ah khong pa-a ngtuui ngten sun ah kshin ni. 3 Peta noh ta “Ananih-o! A i a Shatan yaai pa üng nah mlung kkyoong nah up shak kti ni. Nah yah-a ngui akhäk nah süm ei vaia Shatan noh Mkhyangsiim sun ah ning mhleei shak ni. 4 Am nah joih ham üng phi nah kho mdek hin nah päta ka ni. Nah joih kona nah yah-a ngui phi nah päta ka ni. Ahin kba nah poh mshah vaia nah mlunga a i a nah su ngngaih ni. Kkhyaang nah jah mhleei am ni. Pangsiim nah mhleei ni” tilü ah mtheh. 5 Asun üng Ananih noh asun ah ngjaak jah ta kyuton-in lü thi-in kti. Asuna mong ngjak ktie naküt kyüh ei lopyei ktie. 6 Athoi kpa mi sae noh ngdüüi lo kshet ulü ah yook sun jih üng hloop lü seh püi ulü ah nih mkhyüh vaai u. 7 Naji kthum bang anghjook kona Ananih-a kkhyu phalok kti. I hok kba anathoon ve sun ah kkhyu sun noh am kshing. 8 Peta noh ta “Aksanga nah mtheh-a. Nah nih kho mdek nah nih joih üng ahi kän mä nah nih yah” tilü ah kthäh. “Ä! Ahi kän kuung ni” tilü ah mshak be. 9 Peta noh ta “A i a Mkhyangsiim saam kkhaia nah nih ng'yäp kti ni. Nah khong pa mkhyüh vaai ktie athoi kpa mi sae tuh kuung kshoh hlong phalobe hnüh ve u. Nang phi ning kkot kkhaie ni” tilü ah mtheh. 10 Asuna nghnu mi phi Peta-a kho ma-a ahunata kyuton lü thi-in kti. Lut lok ktie athoi kpa mi sae noh ah yook sun hmu-ulü kkot lü ah khong pa-a peia ah nih mkhyüh vaai u. 11 Shaang ngsiim üng kae abäng jah asuna mong ngjak ktie naküt sun kyüh ei lopyei ktie. 12 Ngshäe noh kkhyaangea kshuunga mün sam kshe jah ngshing ngte naak kho hah pa ah nih poh mshah u. Sholoh Monga lam shüa jum ei ktie naküt sun anghläia ngkhääm lok ktie.

13 Booi Jeishüh am jum ei ktie sun jum ei ktiea hana u phi am ngpüi ei dat u. Asuna thoon lüphi kkhyaange noh jum ei ktie sun ah nih jah mküüi mkhyah ei u. 14 Booi Pa jum ei lok kti nghnu mi jah kpa mi nung lodäm ulü shaang üng ngpüi lok ktie. 15 Asuna thoon lüta am shi khyaih kti kkhyaange sun jah kkot lo-ulü kyääp jah phak üng lama ah nih jah mphään lo u. I a thoon lüni ti ta Peta asuna lam üng ah seh üng am khyaih ktiea kkhaan su Peta-a nghnge shuun ei kkhaia ah nih jah mphään lo u ni. 16 Jeirüh Shalema pi peia ngname üng ka ah jah mhnat ei sun ngshäea veei ah nih jah kkoh lo u. Kho yaaia jah ngsum naake phi ah nih jah khü lo u. Abäng sun do be päih ktie.

17 Khotu ngsiim kdäm bok jah ah püie Satüke-ea pä noh ngshäe sun ah nih jah kkeei ei lo pyei u. 18 Asun üng ta ngshäe sun jah man shak ulü khup üng ah nih jah pheh u. 19 Lüphi mthana ta Booi Pa-a kkhaan kho ngshä noh khup kshoh sun nghmong lü ngshäe sun ah jah hläh be. 20 Kkhaan kho ngshä noh ta “Sit ua, hjok khah im nua ngdüüi lü ahina shak ngshääia mong küm seei ktia kkhyaange üng jah mtheh ua” tilü ah pyen. 21 Asun üng ngshäe noh ksang nalü athaih lo jah ta hjok khah im nu su vaang lü shak ngshääia mong ah nih jah msuh mtheh lo u. Khotu ngsiim kdäm bok jah ah püie noh Jüdah-ea khong mange jah kong si üng ngpüi kti naküt jah khü lü ngkhääm ktie. Khupa kkhyüh lok kkhaia ngshäe phi ah nih veeia ah nih jah khü shak u. 22-23 Ah nih jah tüih xüh shoh-e sun khupa phavaai ktie kyo. Ngshäe sun khupa k'uma am jah hmuvaai ti u. Ah nih ngkhääm naak kong si su sit be ulü “Khupa kah nih pha vaai üng kshoh ta akdo kuunga ngkyang ei lü kah nih hmuh vaai u ni. Khup mkot phi ah namtät ktie ni. Khup kshoh sun kah nih nghmon u jah ta ak'uma u laang phi am veti” tilü ah nih jah mtheh vaai be u. 24 Hjok khah im nu mtät ktie jah ah nih khong jah khotu ngsiim kdäme sun noh asun ah nih ngjaak u üng i hok kba thoon loham kkhai ni tilü ah nih ngngaih u. 25 Asun üng kpa mi mat ah nih veeia lolü “Nah ngngaai ma tu-ua! Khup üng nah nih jah khyume sän noh hjok khah im nua ngdüüi ulü kkhyaange jah msuuk mtheh ktie ni” tilü ah jah mtheh vaai. 26 Hjok khah im nu mtät ktie jah ah nih khonge sit ulü ngshäe sun ah nih jah khü vaai be. Kkhyaange noh lung üng ah nih jah khoong vai kyüh ei ulüta ngshäe sun akdoa ah nih jah khü lo u. 27 Ngshäe sun jah lo püi ma ulü kong sia ma-a jah ngdüih shak lü khotu ngsiim kdäm bok noh ah jah kshü kset. 28 Khotu ngsiim kdäm bok sun noh “Kei nih-e noh ‘Ahina kkhyaanga ngming üng käh jah msuuk mtheh hü bing bing u bä’ tilü kah nih ning mtheh pääng u ni. I ja nah nih poh u tuh bük hnüh-ua. Nah nih jah msuh mtheh u noh Jeirüh Shalem mlüh aksu päih hnüh ni. Ah nih-a thih hin kei nih-e üng nah nih jah mshuh hlü u ni” tilü ah jah pyen. 29 Peta jah ngshäe noh “Kkhyaangea pyen kah nih jah ksang naaka thaka Pangsiima pyen kah nih ksang nah yah kkhaie ni. 30 Nang nih-e noh Booi Jeishüh baan lam ktunga hneen shak lü nah nih jah hnim shak kon ua nih pu paea Pangsiim noh thih naak üng ah thoh shak be ni. 31 Booi Jeishüh sun khong mang jah thoong khyah ktia thoon kkhaia Pangsiim noh ah kkheet lama ah msoon ni. Asuna thoon lü Isare-e vuuk be deih deih ulü ah nih mkhye-e üng ah nih läh naaka mkot ni ave. 32 Ahinea phäh kei nih-e phi kah nih shak shi ktie ni. Pangsiim ksang na-naküt kti üng Pangsiim noh ah jah peet Mkhyangsiim hin phi shak shi ni” tilü Peta jah ngshäe noh ah nih pyen u. 33 Jah kshü kset ktie noh asun ah nih ngjaak u üng ah nih mti sha phi phyüt shek-in hlü täh ulü ah nih mlung shou ktie. Ngshäe sun ah nih jah hnim kuung kuung vaia ah nih jah seng u. 34 Lüphi Kama Ling ngming nak kti Pharishe mat sun kong sia kshuunga ngdüüi lok kti. Kama Ling sun noh Pangsiima thuum theem nalü kkhyaange noh phi ah nih lei shong u ni. Ah nih noh ngshäe sun ah nih jah juk kyum püi vaia ah jah mtheh. 35 Kama Ling noh ta kong si üng “Isare-eo, ahina kkhyaange i hok kba nih jah poh mshah vai nih mseei ei vai u. 36 I vei am lo ham Tuta ngming nak kti sun pou lok kti. ‘Kei akdäm bok ni’ ah tituhan. Kkhyaang phya kphyü bang noh ah nih läk u. Lüphi Tuta sun hnim kti ve-lüta läk ktie sun ngpyeeng päih ktie. Ah nüt yaan hüt phi khyük be päih kti. 37 Tuta-a hnua ta aso-yah noh kkhyaang salaang ah nih mkhääm k'um u üng Kalile hne üng ka Jüdah ngming nak kti pou lobe tü kti. Jüdah sun phi kkhyaang pä noh ah nih läk u. Jüdah sun phi hnim kti ve-lüta läk ktie kkhyaang pä sun phi ngpyeeng päih be tü ktie ni. 38 Tuh hia phi nang nih-e üng kah nih ning mtheh hlü ta ahina kkhyaange hin ve-ei u she. Käh nih jah hne vai u. Ahina nüt yaan jah poh mshah hin kkhyaang sa-a nüt yaan poh mshah-a athoon ta khyük ei lobe hnga kkhai ni. 39 Lüphi asuna nüt yaan hin Pangsiima kkhyüh ah lo ta nih nih-e noh ahie am nih jah nääng khoh u. Pangsiim nih ngshun püi yot balaak kkhaie ni” tilü Kama Ling noh ah pyen. 40 Kama Linga ti sun kong si noh ah nih läk u. Ngshäe sun im kkyoonga jah khü lü ah nih jah te shak u. Booi Jeishüh-a ngming üng käh ah nih jah msuh mtheh hü ti bing bing vai ua ah nih jah ngya be tü. Asun kba ngshäe sun ah nih jah hläh u. 41 Ngshäe sun kong sia kkhyüh kyum lobe ktie. “Booi Jeishüh-a phäh-a mkhuh mhlih nih khaam ei yah u hin do ve” tilü ngshäe je kyai pi pi ktie ni. 42 Asun üng ngshäe noh amhnüüp tä lü ngshääi ei ktia hjok khah im nu jah imea phi Jeishüh hin Khrito ni tilü thang kdo kkya sun jah msuuk mtheh hü lü ah nih kpyaü hü u.