1 Kkong sun phyong lü pha-u ngüshe ta Maita tui shong ni atia kah nih kshing lo u. 2 Asuna tui shonga vek kti kkhyaang mjüe sun kah nih kkhaana do pi pi ktie. Kho a-lolü ye lolüta kei nih-e mei jah tih peet lü ah nih jah dou daan u. 3 Polüh noh thing ngxääi shui hjap hü lü mei üng kphuum lüta thinga k'uma um kti kphyu kphyaai ha shik mah mei ngling noh kshät lü lut lok kti. Polüh-a kut mkyam lü ngbat-in kti. 4 Asuna kkhyaang mjüe sun noh hmu-ulüta “Aana kkhyaang hin noh kkhyaang hnim kti va ni ye khüng vai. Mpang lai tuia kkhyüh lät lolü phi ah luh kyaak be ni” tilü ngsi ngjaang ktie. 5 Polüh noh kphyu kphyaai sun meia kkhaana kthüng hlot-in lü ah pät ta a i phi am mshou mhleei ei ngtu. 6 Ah nih nih-e noh Polüh sun bük ulü ngphyüng ngboom lolü ahunata kyuton laai lü thik kkhai ni tilü ah nih ngngaih u. Kho vei pa mtät ulü phi Polüh i a phi am thoon ve-lolü ta ah nih ngngaih nglat lolü “Mhnam va ni khüng vai” ah nih ti u. 7 Asuna kkhyüh käh thuuk pyei ktia Pupa Lih ngming nak kti tui shong upa ngvoong kdäm vek kti. Ah nih noh xe nalü jah dou daang lü mhnüüp kthum jah kkhin nak kti. 8 Pupa Lih ah pa am khyaih lü mhnat ei kkhon mshooi noh poh lüta ah ih naaka ngjaih-in kti. Polüh ah ih naaka lut lü tä sham peet lü ah lu kkhaana ah kut mtaang lü ah mya shak be. 9 Asun kba poh lü tui shonga am shi khyaih kti naküt lo hü ulü do be ktie. 10 Ah nih nih-e noh kei nih-e üng khoh kkhyam kho hah jah yet ulü hnua mhlüüi üng kah nih mhläi be tü u üng phi tui lama kah nih hlü ko ei vai phi jah yet be tü ulü mhlüüi kdäma veia ah nih jah tha peet u.

11 Asun khya kthum om ma u ngüshe Alek Santa mlüh-a kkhyüh lok kti mhlüüi kdäm ngsum lü kah nih sit ktie. Mhlüüi kdäm sun phi kho kshik k'um naküt üng Maita tui shonga om ei hnga kti. Asuna mhlüüi kdäma lu da “Mhnam ngphi” ah nih shuia lup ah nih pyaang. 12 Shürah Kuh mlüh-a pha-u ngüshe mhnüüp kthum kah nih om ktie. 13 Asuna kkhyüh mhläi u ngüshe Rekum mlüh kah nih phak ktie. Angooi üng sum kho sut ei lü khi lolüta mhnüüp nghngih üng Putolih mlüh kah nih phak ktie. 14 Asua jum ei kti akhäk jah hmu-u ngüshe ah nih veeia ngkhyün suum om vaia ah nih jah nghui naak u. Om ma u ngüshe Romah mlüh-a kah nih sit ktie. 15 Romah-a be nae noh kah nih thang ngja-ulüta akhäk noh “Apjuh joih naak” säpa, akhäk noh “Ngxü naak im kthum” ah nih shuia ve naak säpa jah dou lok ktie. Polüh noh jah hmu-lüta Pangsiim je ei lü ah ktha phya lopyei kti. 16 Romah mlüh pha-ulüta Polüh sun ngtuk kpoh mat üng mtäh shak ulü ah päta im ngvat ei lü ah hlü büa ve-ei yah kkhaia ah nih taak u.

17 Mhnüüp kthum anghjook kona Jüdah khong mange jah ngkhääm shak ma lü “Kah be naeo, kei hin noh nih mjüe am jah bäü na-ngü. Nih pu pa-a kkhyüh nih shääm shuui loa thuum seen phi am lüüm kkaan ngü. Asuna thoon lüphi Jeirüh Shalem mlüh-a nah man ulü Romah kkhyaangea kut üng ah nih nah ap u ni. 18 Romah-e noh nah kshü kset ulü thih naak ngkäih kah mkhye mshoh naak am hmu-ulüta ah nih nah hläh hlü kyo u. 19 Lüphi Jüdah-e noh ngya ulüta Kesha shang phuhlanga si jaang ngoh naak ma-a pha vaia kah tääng yah ni. Nikyo lüphi nih mjüe jah kbäü ei kkhaia kah thoon kti ta am ni. 20 Asuna thoon lü ngkhyum lü ning jah si jaang püi vaia kah ning jah khü shak ni. Isare mjüe noh ah nih ääp ei ua phäh üng kei hin ah nih nah shääm yah ni” ah ti. 21 Ah nih nih-e noh ta “Jüdah hnea kkhyüh nah mong i a sa phi am yah u ngü. Asua kkhyüh lok kti be nae noh phi nah thang am do kya kti phi am pyen u. 22 Lüphi nanga su ngngaih sun kah nih ngja-hlü ktie ni. I lüni ti ta nah ngpüi naaka shaang sun pe naküta kpet mjak ktie ni” ah nih ti u. 23 Ah nih nih-e sun noh Polüh mah mah kho mhnüüp miin ulü Jüdah-e kho hah pa Polüh-a ima lok ktie. Ngooi lama kkhyüh lü mü vei säpa jah msuuk mtheh lü Pangsiima pea mong pyen lü thang kdo kkya jah mtheh kti. Mosheia yuk hüta sa ktoom ni, shahma ngsiimea sa ktoome ni jah shum ei lü Booi Jeishüh ah nih jum ei lo vaia jah hlo phok kti. 24 Akhäk noh Polüh-a pyen ah nih jum ei u. Akhäk noh ta am jum ei u. 25 Asun üng ta ah nih ngngaih ngkyaü lü sit be ktie. Ah nih ngpyeen be hlü hnüh üng Polüh noh “Mkhyangsiim noh shahma ngsiim Hei Shajah shum ei lü nih pu pae ah jah mtheh sän aksang pi pi ni. 26 Mkhyangsiim noh ta ‘Ah nih nih-ea veeia sit lü hin kba pyen vaaia “Nang nih-e noh bük lü am hmu-u kti. Ngngaai lü am ngja-kya u kti. 27 I lüni ti ta käh lu nghnga na-ulü ah nih nghnga ah nih kden u, ah nih mik mphiing-in kti. Asun kba am ani ta ah nih nghnga noh ngjak kkhai shü ni. Ah nih mik noh phi hmuk kkhai shü ni. Ah nih lu nghnga üng phi vaang kkhai shü kyo. Ah nih nih-e kei da mang lo-ulü kah jah do shak be kkhai ni”’ tilü Pangsiim noh ah pyen ni. 28 Asuna thoon lü Pangsiima thang kdo kkya kkhyaang mjü kse-ea veeia ngpyaü hü kti ni atia nah nih kshing vai u ni. Ah nih nih-e noh ta ksang nak kkhaie ni” tilü ah pyen. 29 Polüh noh ah pyen kona Jüdah-e ah nih päte mat jah mat nghai ngbak ei kshe ma ulü ngpyeeng be ktie. 30 Polüh ta im ah ngvah sua kum nghngih velü ah veeia son ei lok ktie naküt jah hlem pan nak kti. 31 Polüh u noh phi käh ngya lü kyüh kyook ei phi käh poh laang kuung lü Pangsiima pea mong kpyaü kti. Booi Jeishüh Khritoa mong jah msuuk mtheh kti ni.