1 Kei nih-e noh Italih hnea mhlüüi kdäm üng seh vaia tääng u ngüshe Polüh jah khup üng ngphep kti akse akhäk Juliuh üng ah nih jah ap u. Juliuh ta Romah ngtuk kpoh üng “Kesha shang phuhlang ngtuk kpoh pä” ngming nak kti ngtuk kpoh pä üng ka kkhyaang phya jah up kti. 2 Atam Mituma kkhyüh lok kti mhlüüi kdäm Asha hne da sit kkhaia ngshääm kti sun üng kah nih mhläi vaai ktie. Make Tonih hne Teshah Lonih mlüh-a ka Arih Taküh kah nih hlonga ngkhyüi lok kti. 3 Angooi üng Shiton mlüh kah nih phak ktie. Juliuh bä pi pi lü Polüh ah looi püie noh kkhin nalü ah hlü ko ei ah nih yet mshem vai ua sit kkhaia ä lü ah hläh ni. 4 Asuna kkhyüh sit u ngüshe kho anglata khi lolüta Khipyüh tui shonga nghngi lo kho khia ngim naak da ngleng lü kah nih sit ktie. 5 Shili Shia jah Pan Philih hne peia ka mpang lai tui kkaan u ngüshe Lükhia hnea Mürah mlüh kah nih phavaai ktie. 6 Asua ngtuk kpoh up kti noh Alek Santa-a kkhyüh Italih hne da sit hlü kti mhlüüi kdäm hmulü ah jah ngsum shak. 7 Ahnääi hnääia sit u ngüshe akhäk vei hjou lü ngyan nu ngyan üng Ngi Tüh mlüh-a pei kah nih phak ktie. Kho khi noh jah buuk kyet lüta kho khia ngshung naak Khap Salamon da ngleng lü Karite tui shong kho khi amshung naak da kah nih sit ktie. 8 Asun üng kkong pei üng nghne ktia sit u ngüshe ngnü kkhüt pi pi lü Lasha mlüh hlonga “Üp ktia mhlüüi ngxü naaka” ah nih shuia hnüna kah nih lai ktie. 9 Kah nih seh u hjou kolaih lüta mhlüüi kdäm üng seh vaia kyüh ei loshek kti. I lüni ti ta “Ei jeih kho mhnüüp pooi” aphyään kona kho kshik khya phalolü tui lam shük khyak lok kti. 10 Polüh noh ta “Kkhyaangeo, aana kkhyüh nih mhläi u ta kyüh ei shek kti ni. Külak phi, mhlüüi kdäm phi, nih jah shum nak kkhaie ni. Nih shak u hngoh phi khyük kkhai ni” tilü ah jah msing msääi. 11 Lüphi ngtuk kpoh jah up kti noh mhlüüi kdäm pyaih kti khong jah mhlüüi mah-a pyen sun sha lü ksang nalü Polüh-a pyen ta am suh lih ei u. 12 Asuna mlüh-a mhlüüi ngxü naak sun kho kshik k'um naküt üng ngseei naak vaia am do. Asuna thoon lü aknung bok noh i a kyalü phi Phonih mlüh-a pha onga seh vai ah nih mkhüh naak hmaih u. Ponik mhlüüi ngxü naak sun Karite tui shonga vek kti. Asuna ngxü naak sun kho kyaak jah asuma kkeh jah kho kyaak jah ashiipa kkeh-a shung nglaka vek kti. Kho kshik khya üng asua ngseei vai ah nih tääng u.

13 Sum kho khi ahlääi hlääi sa-a khi lolüta ah nih mkhüh-a kba thoon kkhaia ah nih ngngaih u. Asun üng mhlüüi käh theih ngnoon kkhaia msääng naak lung tong kshet be ulü Karite tui shong pei üng nghne ei ktia sit ktie. 14 Am hjou pyei ham lü nghngi lo shiip mong üa ah nih shui kho khi kshe nu khi lok kti. 15 Mong ü nu sun noh mhlüüi kdäm sut lomop lüta kho khi käh k'an ei khoh u ngüshe kah nih poh hjaüh lü kho khia man naak da kah nih ngseh-in ktie. 16 Kautah tui shong kdiika sum da kah nih pha u üng kho khi alääm sa ngshung lü xep xep lok kti. Ngshääm naak mhlüüi sa angyan nu üng mhlüüi kdäm kkhaana kah nih mkaai hlot u. 17 Kona mhlüüi kdäm ngkhääng kkhaia yüüi üng ven lü kah nih yai tim tim u. Lipya hne da ka mdih heena säh naaka lut yot lü angtaan vai noh phi jah äh khyah ei lü jih kdae jah shuut phyam shüm sheek ulü khoa khi naak da kah nih ngseh ktie. 18 Angooi üng kho khi sheng lü kshe hleen lolüta mhlüüi kdäm lääk hü hü kti. Asuna thoon lü külak akhäk tui üng ah nih jah kpyaai-in u. 19 Angooi üng ta mhlüüi kü kap akhäk (jih kda, yüüie) ah nih pät noh ah nih jah xot xeng-in u. 20 Kho mik, mah khya, aai shi am kah nih jah hmuh u phi kho vei nghjook lo hnüh kti. Mong ü phi su ei ktä kti. Akpäih naaka ta xün shei vaia phi am ngngaai ei ti u ngü. 21 Am ah nih ei ook hjou lolüta Polüh ah nih kshuunga ngdüüi loma lü “Kkhyaangeo, kah nih ning msääi msing sän nah ksang hnak nalü Karite tui shonga kkhyüh am nih mhläi lo ua ta do kkhai shü. Ahin kba shum kooi sim pyak naak phi am nih shoong toh ei kkhaie shü. 22 Asuna thoon lüphi käh ng'äh ngkhyah pyang ma lü nah nih mlung ngkhääng shak ua, tilü kah ning jah nghui na-hlü ktie ni. Nang nih-e üng u phi ah shak shum kkhai am ni. Mhlüüi kdäm ni ah pyak kom. 23 I lüni ti ta tuh mthan üng nah ka nak kti kah hjok khah Pangsiima kkhaan kho ngshä kah veeia pou lok kti. 24 Kkhaan kho ngshä noh ‘Polüh-o, käh sääia, Kesha shang phuhlanga ma-a nah ngdüüi kkhai ni. Pangsiima bä naaka phäh üng nah ngkhah püie mat phi am thi-u’ ah ti ni. 25 Asuna thoon lü nah nih ktha mkyan ua. Kkhaan kho ngshä noh ah nah mtheh-a kba thoon kkhai ni atia Pangsiim kah üm nak kti ni. 26 Lüphi nih mhlüüi kdäm hin tui shong mat mata ngseh lü ngtaang vaai kkhai ni” tilü ah pyen. 27 Mhnüüp xalei kphyü asuuma mthan üng kho khi kshe noh kah nih mhlüüi kdäm Metih Teran mpang laia kkhaana joong hü hü lü ngseh kti. Mthan nglung banga mhlüüi pyaih ktie noh kkong säh lok ktia ah nih ngngaih u. 28 Tui sun msäp ulüta lam mku bang thuuk kti. Mhjook sa lü msäp be tü ulüta lam xalei mhma thuuk kti. 29 Mhlüüi kdäm lung üng angshuk ei vai kyüh ei ulü mhlüüi mdüih naak lung tong kphyü sun yüüi üng kkhyalü kho thai loshe tilü nghui ngpha ktie. 30 Mhlüüi pyaih ktie sen-in vaia mkhüh na-ulü mhlüüi mdong da lung tong kkhyak kkhaia hana ngsom lü ngshääm naak mhlüüi sa tuia ah nih kkhyaak u. 31 Lüphi Polüh noh ngtuk kpoh up kti jah ngtuk kpoh-ea veeia “Aana mhlüüi pyaih ktie am ah nih ve ta nah nih päte phi am lät u kti” tilü ah pyen. 32 Asun üng ta ngtuk kpoh-e noh ngshääm naak mhlüüi sa khun yai naak yüüi jah kshat bät-in ulü ah nih mseh-in u. 33 Kho athaih lo hlü hnüh üng Polüh noh ah nih bänge noh buh ah nih ei vai ah jah nghui naak. “Nang nih-e noh nghmüh lü nah nih mtäh mshou kho mhnüüp xalei kphyü suum lohnüh kti ni. 34 Asuna thoon lü ei ook sun ei o-hnüh ua, tilü kah ning jah nghui nak ktie ni. Nah nih shak man naaka ei ook vai hlü kti ni. Nah nih lu sham thek mat phi am khyük yah” tilü Polüh noh ah jah mtheh. 35 Asun kba ah pyen kona kkhaai kpeh lo-ulü Pangsiim je ei lü kphyüt lü ah nih ei u. 36 Ah nih bäng ah nih ktha phya lolü mat siim mat siim noh ei ktie. 37 Asuna mhlüüi kdäma kkhaana vek kti naküt phya nghngih kkhyüh kip jah kkhyuk suum ktie. 38 Ah nih bäng noh ah nih phüa ah nih ei kona mhlüüi ahaang lo vaia kkhyääi sun tui üng ah nih kkhyaak-in u.

39 Kho thai lolüta mhlüüi pyaih ktie noh hona ngdanga pha lo atia am kshing kyo ulüphi tui kkit phüüm mata mlang pou kti ah nih hmuh. Asuna mlang da lai püi lü tui k'uma vek kti mdih heen üng ah nih mhluh vaia ah nih mkhüh naak kyo u. 40 Lung tong jah kkhyaak naak yüüi jah kbät-in lü ah nih jah kkhyaak-in u. Mhlüüi pyaih naak khoon yüüi phi ah nih jah shuh be. Kho khi noh mhlüüi kdäm sun ma da ah seh püi khoh vaia mhlüüia lu da vek kti jih kdae jah shung be lü kkong da lai khoh kkhaia ah nih ngngaih u. 41 Lüphi mhlüüi kdäm noh mdih heen üng lut lü ah lu ngsai kyet lüta ah ngmei sun tui ngkhup kshat nu noh asut pyeh-in. 42 Khup kkyume sun noh tui joh lü kkong da ah nih sen ei vai noh jah mpyü ei lü ngtuk kpoh-e noh jah hnim vaia ah nih seng u. 43 Ngtuk kpoh up kti noh Polüh mhlät hlü lüta ngtuk kpoh-ea sui seng sun ah ngya. Asuna thoon lüta “Tui joh kthei abäng noh aksüka mhlüüia kkhyüh kyum lü jän joh ma lü kkonga kaai u she. 44 Tui am mjoh thei ktie noh mhlüüi ngbaan pen phea ngkho phong nalü ngkhyüi u she” tilü ah mkhyah. Asun kba su ah nih bänge phyong lü kkong phavaai ktie.