1 Fetüh booi ah hnea pha ma lü mhnüüp kthum alo üng Kesha Reh-a kkhyüh Jeirüh Shalema ngvaak kti. 2 Asun üng khotu ngsiim kdäme jah Jüdah khong mange noh Polüh kbäü ei ma lü Fetüh-a ma-a ah nih mshuum ei u. 3 Polüh lama kham lü hnim vaia seng kyam ulü Polüh Jeirüh Shalema ah tüih lo vaia Fetüh ah nih nghui naak u. 4 Fetüh noh “Polüh ta Kesha Reh mlüh-a khup üng ngphep kti ni. I vei am lo ham kei phi asua kah sit be kkhai ni. 5 Nah nih khong mange kah hlonga Kesha Reh-a lo-ushe. Ah nih nih-e noh ah mkhye naak ave ta asua mshuum ei lo-ushe” tilü ah pyen. 6 Fetüh mhnüüp xa bang om ma lü Kesha Reh mlüh-a sit be kti. Angooi üng si jaang ngoh naak üng ngshut lü Polüh ah jah khü vaai shak. 7 Polüh noh pha lolüta Jeirüh Shalema kkhyüh lok kti Jüdah-e noh ngvoong ulü Polüh üng akshe hleena kho hah pa mshuh ulü ah nih kbäü ei u. Lüphi ah nih mshuum ei naak shak shi ta am ngdüih khoh u. 8 Polüh noh ta “Kei noh Jüdah thuum phi nishe hjok khah im nu phi nishe Kesha shang phuhlang phi nishe kah bäü hma naak am velaang kuung” tilü ng'yung ei kti. 9 Lüphi Fetüh ta Jüdah-ea ma-a hmaai mah hlü kti. Asuna thoon lü Polüh üng “Jeirüh Shalema sit lü aana bea phäh üng kah ma-a ning kshü kset vaia nah yü kti mä” tilü ah kthäh. 10 Polüh noh ta “Tuh hi kei hin Kesha shang phuhlanga ksah-a jah si jaang ktia ma-a kah ngdüüi kti ni. Asua kshü kset vaia ngkäih kti ni. Nah pät noh angshing ngtea nah kshing kuunga kba Jüdah-ea kkhaana i phi kah mkhye naak am velaang kuung. 11 Kei noh thuum lüüm kkaan kpet mjak ngüshe thi ngkäih ktia mkhye naak kah poh ta thih naaka kkhyüh lät vaia am mtun ei ngü. Lüphi ah nih nih-e noh ah nih nah mshuum ei mat phi am angya ta ah nih kut k'uma u noh phi am nah ap khoh. Kesha shang phuhlang bä noh nah si jaang she” tilü ah pyen. 12 Asun üng ta Fetüh booi noh ah kong si püie mah mah ngthäh ma ulü “Nang hin Kesha shang phuhlanga veeia nah pha hlü ta Kesha shang phuhlang ah pät noh ning si jaang kuung she” ah ti.

13 Akhäk vei nghjook lolüta Akyipa shang phuhlang jah Penih ngming nak kti ah nghnu mi mah mah Fetüh booi dou daang kkhaia Kesha Reh mlüh-a lok kti xooi. 14 Akhäk vei bang vema nih lü Fetüh booi noh Polüh-a mong ah mtheh. “Feilik booi noh khup üng ah taak hüt ahia kkhyaang mat vek kti ni. 15 Jeirüh Shalema kah seh üng khotu ngsiim kdäme jah Jüdah khong mange noh asuna kkhyaang sun kah ma-a kbäü ei ulü mtaam kah peet vaia ah nih nah nghui naak u. 16 Kei noh ta ‘Romah thuuma kba kkhyaang mat hin kbäü ei ktie mah mah jah mkhyum lü ah nih noh phi ah ng'yung ei naak pyen ma lü va mtaam peet vaia ap khoh ni’ tilü kah mtheh. 17 Kei Kesha Reh mlüh-a phalobe u ngüshe ta ahunata angooi kuung üng ah si jaang ngoh naak üng ngshut lü Polüh kah jah khü vaai shak ni. 18 Ah ye-e sun ngdüüi lokyo ulüphi kah ngngaih eia kba kshe hleen ktia mkhye ah nih mshuh u phi am ve. 19 Pangsiim ah nih jum ei naaka mong siim siim ni ah nih nghai ngbak ei naak u. Thipääng kti Jeishüh-a ah nih shuia kkhyaanga mong ngsuh ktie ni. Polüh noh ta ‘Asuna Jeishüh xüng kti ni’ tilü ah pyen. 20 Kei noh asuna be i hok kba sha lü kshin lo vai atia am yü khya khoh ngü. Asuna thoon lü Polüh üng ‘Jeirüh Shalema sit lü asua nah bäü naak ning kshü kset vaia nah yü kti mä’ tilü kah kthäh. 21 Polüh noh ta ‘Kesha shang phuhlanga si jaang ngoh naak ma-a kah phak kkhai ni’ tilü ah pyen. Asuna thoon lü Kesha shang phuhlanga ve naaka mdüih khoh vei säpa mtät ktiea hlonga taak vaia kah mkhyah ni” tilü Fetüh booi noh ah pyen. 22 Akyipa noh ta “Kah pät kuung noh ah nih-a pyen kshak kah ngja-hlük kti ni” tilüta Fetüh noh “Kho ngooia ngngaai khom kom kti” ah ti. 23 Angooi üng Akyipa jah Penih sun akkyäpa ngpiit ngpyaang kkhüt nih lü lei shong phyak ktia lok kti xooi. Kona ngtuk kpoh up kdäme jah mlüh khong mange mah mah ngkhääm naak im nua lut vaai ktie. Kona Fetüh noh Polüh ah jah laak vaai shak. 24 Fetüh noh ta “Shang phuhlang Akyipao, tuh-a ahia vek kti abängeo, aana kkhyaang hin nah nih hmuh u ni. Jeirüh Shalema vek ktie jah ahia ka Jüdah-e abäng noh kah ma-a ah nih mshuum ei u. ‘Aana kkhyaang hin mkhyüh mhleih phyak kti ni’ tilü ngpyaang ktie. 25 Lüphi hnim ngkäih-a ah mkhye naak kei noh am hmulaang ngü. Ah pät noh ‘Kesha shang phuhlanga si jaang ngoh naak ma-a kah phak kkhai ni’ atia thoon lü Kesha shang phuhlanga veeia tüih vaia kah mkhyah pääng ni. 26 Lüphi ah nih-a be Kesha shang phuhlanga veeia kah yuk vai i phi angshing ngte am ve. Asuna thoon lü Polüh hin nang nih-ea ma-a ni, aktung bok boka ta nang shang phuhlang Akyipa-a ma-a khü lo ni. Ah nih-a be kshü kset lü sa kah yuk vai ave vaia phäh kah lo püi ni. 27 Khup üng kyum ktia kkhyaang mshuh vai am ve xa ktia Kesha shang phuhlanga ve naaka tüih vai am looi ngkäih kti ni” tilü ah pyen.