1 Mhnüüp mhma anghjook kona khotu ngsiim kdäm bok Ananih ni, khong mang akhäk ni, Tetuh Lüh ngming nak kti thuum ktheem ni, Kesha Reh mlüh-a sit ktie. Asue sun Feilik booia hmaai ma-a ngdüüi lü Polüh kbäü ei naaka mong pyen ktie. 2 Polüh khü ma ulü Tetuh Lüh noh kbäü ei naaka mong ah pyen ta “Jou taai mah kti Feilik booio, nang noh nah theem ngvaai naak üng nah upa phäh kei nih-e kho vei pa akdiim kdeih-a kah nih ve-ei yah ktie ni. Kah nih khyong pe noh phi piit pyaang naak yah lü kah nih soon taai naak lo u ni. 3 Asun sun kei nih-e noh ahoa phi anghläia dou daang lü kah nih ning mküüi ei ktie ni. 4 Kei noh am ning msü msoon kyoh kyeh hlü ngü. Asuna thoon lüphi jah suun ei lü kah nih pyen alääm sa jah ngngaih peet ma-a. 5 Aana kkhyaang hin kkhyaang lap pi pi ni atia kah nih kshing u ni. Ah nih noh kho mdek luum naküta vek kti Jüdah-e jah mhläk hü kti ni. Nasarete päa khong mang mata phi thoon kti ni. 6 Ah nih noh kei nih-ea hjok khah im nu mtuih mleh shak kkhaia mtun ei kti. Kei nih-e noh man lü kah nih thuuma kba si jaang vaia kah nih mkhüh naak u ni. 7 Lüphi ngtuk kpoh up kti Lüsha lut lolü kah nih kuta kkhyüh Polüh sun anäänga ah jah huh. 8 Kona Polüh kbäü ei ktie sun nah veeia ah nih lo vaia Lüsha noh ah mkhyah ni. Nang noh aana kkhyaang hin nah kshü kset ta kei nih-e noh kah nih kbäü ei u abäng hin ah päta veeia kkhyüh nah kshing lok kkhai ni” tilü Tetuh Lüh noh ah pyen. 9 Jüdah-e noh phi kpüi kpak lü “Tetuh Lüh-a pyen hin aksang ni” ah nih ti u.

10 Feilik booi noh Polüh noh ah jah mshak be vaia ah mdan. Polüh noh ta “Nang noh kei nih-ea kkhyaang mjü hin kho kum kho vei nah up pääng kti ati sun kah kshing kti ni. Asuna thoon lü kah ng'yung ei naak nah ma-a kah pyen ei yah-a phäh üng kah je kti ni. 11 Nah kshing ei lo vai kuunga kba hjok khah kkhaia Jeirüh Shalem kah pha lo mhnüüp xalei nghngih ni alo ham. 12 Hjok khah im nua k'uma mat mata dä kah nih nghai ei phi Jüdah-e noh am nah hmulaang u. Sangsiim ngthei naak kyonga phi nishe, mlüh k'uma aksea phi nishe kkhyaange kah jah mhlon msook phi am nah hmukuung u. 13 Tuh ah nih nah kbäü ei naak üng shak shi am mdüih khoh u. 14 Lüphi ‘Khye ktia jum ei naak ni’ ah nih ngngaih-a lam üng kei noh kah mah püi mah pookea Pangsiim kah hjok khah kti atia nah pät üng kah ning mtheh hlü kti. Mosheia thuum jah shahmaea sa ktoom üng ng'yuk naküt kti ta kei noh phi kah jum ei kti. 15 Ngpyuun ktia kkhyaang käh ngpyuun ktia kkhyaang naküt abäng thih naaka kkhyüh Pangsiim noh jah mthou be kkhai ni ati sun ah nih-ea kba ääp ei lü kah üm nah hnga kti ni. 16 Kah ve soh ngnei shak hin Pangsiima ma-a phi, kkhyaangea ma-a phi kah mlung kkyoong käh kah kbäü ei vaia anghläia mtun ei ngüshe kah vek kti ni. 17 Jeirüh Shalema am kah ve kho kum hjou lolüta mpyeen shek kti kah mjüea phäh ngui phi lo püi ngüshe Pangsiim hjok khah naak kkhyüng kshei jah hnim shak kkhaia kah lobe tü kti ni. 18 Kei noh kah ngsiim ngsaih naaka aning sho kah poh kona hjok khah im nua k'uma Jüdah-e noh ah nih nah hmuh u. Keia hlonga kkhyaang pä phi am ve u. Üng-phou kti phi am ve u. 19 Lüphi Asha hnea Jüdah-e akhäk Jeirüh Shalema phalok ktie. Ah nih nih-e noh kah mkhye naak ah nih hmuh ta ah nih pät nah veeia lolü ah nih nah kbäü ei vaia ngkäih kyo kba. 20 Asun kba am nilüphi kong sia ma-a kah ngdüih k'um sän üng kah mkhye naak ah nih hmuh ta tuh-a vek ktie hin noh ah nih pyen kuung vai u ta. 21 Kei noh mat kah poh ta ah nih ma-a kah ngdüih üng ‘Thik ktie xüng be kkhaie ni tilü kah jum eia phäh nah nih nah mshuh ktie ni’ tilü ni kah ngpyaang ta” tilü Polüh noh ah pyen. 22 Feilik noh ta Booi Pa-a mong lam angshing ngtea kshing ktia thoon lü ah nih kshü kset sun ah nih taak ma. “Ngtuk kpoh up kti Lüsha ah pha lo üng aana be hin kah mkhyah kkhai ni” tilü ah pyen. 23 Feilik noh ngtuk kpoh khong manga veeia “Polüh hin mtät ktie mah mah jah ta-ua. Lüphi khup kyuma kba ta käh phep kom u kti. Ah looi püie noh phi bük lo-ulü tu mbei bäh hlah na-u she” ah ti.

24 Noong vei bang nghjook lolüta Feilik sun Tushi Lah ngming nak kti ah kkhyu mah mah lok kti xooi. Tushi Lah sun Jüdah mjü ni. Ah nih noh Polüh jah khü shak ma lü Polüh noh Booi Jeishüh Khrito jum eia mong ah pyen ngngaai ngjak kti ni. 25 Polüh noh ngpyuun naaka mong, mlung buh kyet naaka mong jah Booi Jeishüh noh kkhyaang naküt ah jah si jaang vaia mhnüüp phalok kkhaia mong pyen lüta Feilik kyüh ei lok kti. “Tuh sit be ma. Kah ngkyoong lo üng kah ning khü be tü kkhai ni” tilü ah pyen. 26 Polüh noh ah läh lang naak vai ngui nah pek kkhai mä tilü Feilik noh ääp ei kti. Asuna thoon lü Polüh sun anghläia khü lü ngthäh ngkhyah püi kti. 27 Kum nghngih kona Pokih Fetüh-a ah nih shui noh Feilika ve naaka aso-yah booia thoon lok kti. Feilik booi noh ta Jüdah-ea ma-a hmaai mah hlü lü Polüh sun käh hlät lü mtät kti mah mah ah taak hüt.