1 Polüh noh kong sie sun angtea jah bük lü “Kah be naeo, kah ngnei shak ve soh hin tuh ngooi vei säpa Pangsiima ma-a kah mlung kkyoong am nah kbäü ei” ah ti. 2 Ananih-a ah nih shui khotu ngsiim kdäm bok noh Polüh-a hlonga ngdüüi kti üng “Ah mpyong kbeia” tilü ah pyen. 3 Asun üng ta Polüh noh “Nang hin akpunga thun book üng ah nih hlu ngvoong ktung mdoh nu üng nah täng kti ni. Pangsiim noh mtaam ning pek kkhai ni. Nang hin noh thuuma kba nah si jaang kkhai üng nah vek kti. Tuh-a ta thuum lüüm kkaan lü ah nih kbeih-a tilü nah pyen ktoih kkhe hin ta” ah ti. 4 Polüh-a hlonga ngdüüi kti noh ta “Pangsiima khotu ngsiim kdäm bok nah kshe nak kkhe ve mä” tilü ah kthäh. 5 Polüh noh ta “Kah be naeo, ah nih hin khotu ngsiim kdäm bok atia am kshing ngü. Sangsiim üng ng'yuk kti ta ‘Nah mjü up ktia kong mang am kshe nah yah kti’ ati ni” tilü ah mshak be. 6 Ngkhääm ktie sun akhäk Pharishe, akhäk ta Satüke-e ati sun Polüh noh ah jah hmuh. Asun üng ta ah nih noh kong sia kae üng “Kah be naeo, kei hin Pharishe ni. Kah pa phi Pharishe kuung ni. Kkhyaang hin thi-ma lü xüng lobe kkhai ni atia kah jum eia phäh üng tuh hia kshü kset kah khaam ei kti ni” ah ti. 7 Asun kba ah pyen jah ta Pharishe-e jah Satüke-e sun nghai ngbak ei ulü ngkyaü ktie. 8 (I lüni ti ta Satüke-e noh ta xün naak be am ve. Kkhaan kho ngshä am ve, kho yam am ve, atia ngngaai ei ktie. Pharishe-e noh ta ah nih nghngih-a jum ei ulü jah mtheh hü ktie.) 9 Sheng sheng lü ngpyaang lok ktie. Pharishe üng ngpüi kti Sangsiim ktheeme akhäk ngdüüi lo-ulü “Ahina kkhyaang hin ah mkhye naak am hmu-u ngü. Kkhaan kho ngshä noh mä, kho yam noh mä ah pyen püia phi thoon khoh kti ni” ah nih ti u. 10 Ah nih nghai ngbak ei sun sheng lo däm däm lüta ngtuk kpoh up kti noh Polüh sun ah nih phyüt shek-in vai noh ah mpyü ei lo. Asun üng ta ngtuk kpoh-e jah tüüi lü ngkhääm ktiea veeia kkhyüh Polüh jah huh shak lü lung im ngkhääng nua ah jah tha vaai shak be. 11 Mthana ta Booi Pa noh Polüh-a hlonga ngdüüi lolü “Polüh-o, nah mlunga mseeta. Jeirüh Shalema kah kkhyü nah shak shia kba Romah mlüh-a phi nah shak shi be tü kkhai ni” tilü ah mtheh.

12 Akho ngooi üng ta Jüdah-e akhäk ngkhääm ulü ngseng ngkyam ktie. “Polüh am hnima kpi ta käh ei ook bing bing lü ve vai” tilü ah nih pät noh ah nih pät mküüm lü ngtaam ei ktie. 13 Asun kba ngtaam ei ktie sun kphyü kip am tan u. 14 Khotu ngsiim kdäme jah khong mangea veei sit ulü “Kei nih-e noh Polüh am kah nih hnima kpi ta kah nih bäng noh käh ei ook laang vaia kah nih pät noh se ei lü kah nih ngtaam ei ktie ni. 15 Asuna thoon lü nang nih-e jah kong si üng kae noh Romah ngtuk kpoh up ktia veeia kkhyaang tüüi lü Polüh sha lü ngshing ngte ktia kshü kset kkhaia hana ahia ah tüih lo vaia tong ua. Kei nih-e noh lama kham lü hnim kkhaia kah nih ngseei pääng ktie ni” tilü ah nih pyen u. 16 Asun kba ah nih seng kyam sun Polüh-a tu noh ah dang yah. Lüta lung im ngkhääng nua lut lü Polüh üng ah mtheh vaai. 17 Polüh noh ta ngtuk kpoh khong mang mat khü lü “Ahina song pyang noh ngtuk kpoh up ktia veeia ah pyen vai vek kti ni. Seh püi ma-a” tilü ah mtheh. 18 Ngtuk kpoh khong mang noh song pyang sun ngtuk kpoh up ktia veei seh püi ma lü “Khup üng kyum kti Polüh noh nah khü lü hina song pyang noh ah ning mtheh hlü ve mjoh lü nah veeia ah nah tha lo shak ni” ah ti. 19 Ngtuk kpoh up kti noh song pyang sun ah kut üng ah kaih. Anghi naaka seh püi ma lü “I nah nah mtheh hlü kti ja” tilü ah kthäh. 20 Song pyang noh ta “Jüdah khong mange noh kho ngooi Polüh kong sia nah tüih be tü vaia nah veeia ning tong lok kkhaia ngi ktie ni. Polüh sun sha lü ngshing ngte kkhaia kshü kset kkhaia hana ngsom kkhaie ni. 21 Asuna thoon lüphi käh ä laang bä. Kkhyaang kphyü kip am tan ktie noh lama ngkhääm lü mtät kkhaie ni. Polüh am hnima kpi ta käh ei käh ook laang vai tilü se ei lü ngtaam ei ktie ni. Ah nih nih-e sun nang noh nah mkhyah vai däk sa sun yüng ulü ngseei pääng ktie ni” tilü ah mtheh. 22 Ngtuk kpoh up noh ta “Ahina mong nah nah mtheh hin ua veei phi käh pyen bing bing bä” ti-ma lü ah tüih be.

23 Ngtuk kpoh up noh ngtuk kpoh khong mang nghngih jah khü lü “Ngtuk kpoh sho hlai phya nghngih, ngshe ngsum sho hlai kkhyüh kip, ksei kbi sho hlai phya nghngih jah khü lü tuh mü, pa song lu kyuk (naji kko) üng Kesha Reh mlüh-a sit kkhaia ngpyaih xat u bä. 24 Polüh-a ngsum naak vai ngshe-e phi jah mshääm u bä. Polüh käh leem shou ktia Feilik booia veeia tha vaai ua” tilü ah mkhyah. 25 Ngtuk kpoh k'up noh Feilik booia veeia ahin kba sa ah yuk ni. 26 “Kei Klaau Tiuh Lüsha noh jou taai mah kti Feilik booia veeia üm hlaam lü sa kah yuk lo ni. 27 Jüdah-e noh ahina kkhyaang hin man lü ah nih hnim khyäü u. Romah kkhyaanga ngshing ngte naak ta-ei ktia kshing lo ngüshe kah ngtuk kpoh-e mah mah sit lü kah nih yung u ni. 28 Jüdah-e noh i mshuh lü ah nih kbäü ei u atia kshing hlü ngüshe ta ah nih kong sia kah seh püi. 29 Ah nih hin hnim ngkäih vai ah bäü naak, khup üng pheh vai onga ah mkhye naak am hmulaang ngü. Ah nih kbäü ei naak ta ah nih päta Jüdah thuum seen üng ni alaang ta. 30 Jüdah akhäke noh ah nih seng sun kshing lo ngüshe ta nah veeia tüih lo vaia kah mkhyah ni. Ah nih kbäü ei ktie noh nah ma-a ah nih pyen lo vaia kah jah mtheh ni” tilü ah yuk. 31 Ngtuk kpoh up kti noh ah mkhyah-a kba ngtuk kpoh-e noh ah nih poh u. Polüh seh püi lü asuna mthan üng Anti Patih mlüh säpa sit ktie. 32 Angooi üng ah nih kho üng sit kti ngtuk kpoh-e Jeirüh Shalema nglat be ulü ngshe ngsum ngtuk kpoh-e noh Polüh ah nih seh püi u. 33 Kesha Reh mlüh pha-ulüta Feilik booi üng sa phi pelü Polüh phi ah nih ap u. 34-35 Feilik booi noh sa bük ma lü “Polüh hona hnea ka ni” tilü ah kthäh. Polüh sun Shili Shia hnea ka atia ah kshing lo üng “Nang ning kbäü ei ktie ah nih pha lo üng nah be kah ngngaai kkhai ni” tilü Polüh sun Herota sü ima ngtuk kpoh üng jah mtäh shak lü ah taak.