1 Polüh noh “Kkhyaangeo, be naeo, kah paeo, kah mkhye am ve atia kah ng'yung ei naaka kkhyü kah pyen kkhai. Nah ngngaai ma ua” ah ti. 2 Hepye läk üng ah pyen ngja-ulüta sha lü ngim ktie. 3 Polüh noh ta “Kei hin Jüdah mjü ni. Shili Shia hne Tashüh mlüh-a kah hmi lok kti. Kei sun Jeirüh Shalem mlüh-a Kamaleih-a akläka thoon lü ah veeia kah ngthei kti. Nih pu paea thuum seen sun angshing ngtea kah ngsuuk ei kti ni. Nang nih tuh-a vek ktiea kba Pangsiima phäh-a kah mtun ei kti ni. 4 Booi Jeishüh jum ei ktie jah hnim täh lü ah nih nih-e sun kah jah mkhuh mhlih kti ni. Anghnu mi kpa mi jah man lü khupa k'uma kah jah phep kti ni. 5 Khotu ngsiim kdäm bok jah kong si üng ka abänge noh phi kah pyen hin aksang ni ti kkhaie ni. Ah nih nih-e noh ta Tama Kuh mlüh-a vek kti Jüdah be nae phäh-a sa nah yuk peet ktie ni. Asun üng Booi Jeishüh jum ei ktie jah man lü khun yai ma lü Jeirüh Shalem mlüh-a jah seh püi kkhaia kah sit kti ni.

6 Kah seh lama Tama Kuh mlüh kah pha hlü hnüh üng mhnüüp ngshunga kkhaan khoa kkhyüh akvaai nu ahunata kah ling lenga mlaih lok kti. 7 Asun üng ta kyuton ngüshe ‘Sholüh, Sholüh, ahin kba ta nah nah mkhuh mhlih kti ni’ tilü nah ngsi ngjaang püi ktia kthai kah ngjaak. 8 Kei noh ‘Booi Pao, nang u ni’ tilü kthäh ngüshe ta ‘Kei hin nah mkhuh mhlih-a Nasaret mlüh-a ka Jeishüh ni’ tilü ah nah mtheh be. 9 Keia hlonga lok ktie noh akvaai nu thak hmu-ulü kei nah ngsi ngjaang püi ktia kthai ta am ngja-kya u. 10 Kei noh ‘Booi Pao, i kah poh kkhai ni’ tilü kah kthäh. Booi Pa noh ta ‘Thou loa, Tama Kuh mlüh k'uma sita. Pangsiim noh nah poh vai ah ning mkhyah peet abäng sun asua nah ngjak kkhai ni’ tilü ah pyen. 11 Asuna akvaai nu noh nah da ei lü kah mik mü kti. Asuna thoon lü kah püie noh kah kut üng nah kaih lü Tama Kuh mlüh-a ah nih nah seh püi u. 12 Asua Ananih-a ah nih shui u mat vek kti. Ah nih sun Pangsiim hjok khah lei shong kti. Nih thuum phi ktha nak kti. Tama Kuh mlüh-a vek kti Jüdah-e abäng noh phi ah nih mküüi mkhyah ei u ni. 13 Ah nih kah veeia lolü kah hlonga ngdüüi kti. ‘Kah na Sholüh-o, nah mik vaai be she’ ah ti. Ahunata kah mik vaai lobe lü ah nih kah büh. 14 Ah nih noh ‘Nih pu paea Pangsiim noh ah nih-a mkhüh nah hmat kkhaia ning xü kti ni. Ah nih noh ngpyuun kti ah xüh shoh Khrito sun hmulü ah pyena kthai nah ngjaak vaia ning msoon kti ni. 15 Nah hmuh ngjaak naküt kkhyaang luum üng jah mtheh kkhaia nang hin Khritoa ning shak shi vai ni. 16 Asuna thoon lü i nah mtät kti ni. Ngdüüi loa, patiso khaam lü Booi Jeishüh-a ngming üng tä shama. Asun üng nah mkhye üng nah ngsiim kkhai’ tilü ah pyen.

17 Kona Jeirüh Shalema sit be ngüshe hjok khah im nua kah tä sham k'um üng mhnüh mdan kah hmube tü kti. 18 Kei noh Booi Pa hmu-ngüshe ah nih noh ‘Jeirüh Shalema kkhyüh angshenga shota. Ahia kae hin noh keia mong nah shak shi am ning ksang na-hlü u’ tilü nah mtheh kti. 19 Kei noh ‘Booi Pao, kei hin Sangsiim ngthei naak kyongea sit hü ngüshe ning jum ei ktie jah man lü kah jah te kti ati sun kkhyaang naküt noh kshing ktie ni. 20 Ah nih-e noh nah shak shi Satei Phan ah nih hnim u üng kei velü tääng kuung ngüshe hnim ktiea shui shak kah jah mtäh peet kti ni’ kah ti. 21 Booi Pa noh ta ‘Sita, kei noh nang hin kkhyaang mjü kse-ea veeia akthuuk nua kah ning tüüi kkhai ni’” ahin ah pyen vei säpa kkhyaang päe noh Polüh-a pyen hin ah nih ngngaih u. 22 Asun üng ta “Ahina kkhyaang hin mkhyüh mhleih ua, kho mdeka xüng kkhaia am looi ngkäih” tilü ah nih ktha lou lou lü ngpyaang ktie. 23 Ngpyaang ulü ah nih shui shak jah shuut phyam ulü kkhaan da ah nih jah toop tik-in u. Mput phi kkhaan da ah nih phuh phyang-in u. 24 Romah ngtuk kpoh k'up noh ngtuk kpoh-e üng Polüh sun lung im ngkhääng nua ah jah mhluh shak. Jüdah kkhyaange noh i mshuh lü ah nih mlung shou lü ngpyaang ktie atia ngshing ngte lok kkhaia yüüi ngkhep üng ah nih kpaai vaia ah mkhyah. 25 Ah nih kpaai vaia ah nih khun kona Polüh noh “Nang nih-e hin noh Romah kkhyaanga ngshing ngte naak tak kti, thuuma kba kshü kset lü ah mkhye käh hmuh ham üng te vai ngkäih kti mä” tilü ngtuk kpoh khong mang üng ah kthäh. 26 Ngtuk kpoh khong mang noh ngja-lüta ngtuk kpoh k'upa veei sit lü “Nah poh mshah hin ngngaai ei a. Aana kkhyaang hin noh Romah kkhyaanga ngshing ngte naak ta-ei kti ni” tilü ah pyen. 27 Ngtuk kpoh up kti noh Polüh-a veei sit lü “Nang hin Romah kkhyaang ngshaai mä. Angshing ngtea nah mtheh-a” tilü ah kthäh. “Ääi tü. Kei Romah kkhyaang ni” tilü ah mshak be. 28 Ngtuk kpoh k'up noh ta “Kei ta ngui kho hah pengüshe Romah kkhyaanga ngshing ngte naak kah yah ei kti ni” tilü ah pyen. Polüh noh “Kei noh ta kah hmi lo püi kuung ni” tilü ah pyen be. 29 Asun üng ta Polüh kshü kset hlü ktie ah nih hnu da ahunata ngshäih ktie. Romah kkhyaanga ngshing ngte naak ta-ei kti yüüi üng ah khun yota phäh üng ngtuk kpoh k'up sun sääi kti.

30 Jüdah-e noh Polüh i ah nih mshuh ati sun ngtuk kpoh up kti noh angtea kshing lohlü kti. Angooi üng Polüh sun ah kyah ma. Khotu ngsiim kdäme jah kong si ah jah ngkhääm shak. Kona lung im ngkhääng nua kkhyüh Polüh khü lü ah nih ma-a ah ngdüih shak.