2
1 Pentekot mhnüüp üng Jeishüh jum ei kti naküt veyüm ktie.
2 Kkhaan khoa kkhyüh lü ahunata kho khi kshe nua mäi kthai ah nih ngjaak u. Asuna kthai sun ah nih ve naak im k'um abäng üng nglaüh lok kti.
3 Mei kdääi sa-a mäi ah nih hmuh u. Asun sun jum ei naküt ktiea kkhaana lüüi hü hü kti.
4 Asun üng Mkhyangsiim üng be ulü Mkhyangsiima jah pyen shaka kba aksea läk pyen ktie.
5 Asun k'um üng kho mdek teng pe naküta kkhyüh Jüdah kkhyaange lo-ulü Jeirüh Shalem mlüh-a vek ktie. Asuna kkhyaange sun noh Pangsiim hjok khah ksang ktie ni.
6 Asuna kthai ngja-ulü kkhyaang pä nu ngkhääm lok ktie. Jum ei ktie sun noh ngkhääm lok ktiea läk sun mat noh läk mat siim pyen ulüta mün sam tong pi pi ktie.
7 “Tuh-a ngsi ngjaang naküt ktie hin Kalile üng ka kkhyaange ni.
8 Nih nih-ea läk i hok kba pyen ulü nih ngjaak kya päih u ni.
9-10 Nih nih-e ta Pa Thang üng ka, Mete üng ka, Elam üng ka, Meso Potamih üng ka, Jüdah hne üng ka, Khapa Toki üng ka, Pon Tüh üng ka, Asha üng ka, Phyüki üng ka, Pan Philih üng ka, Ekip pe üng ka, Shüreneh peia Lipya hne üng ka, Romah mlüh üng ka akhäk nih vek ktie ni.
11 Nih nih-e üng Jüdah mjü phi ngpüi ktie. Jüdah-ea Pangsiim hjok khah lok ktie üng kkhyaang mjü kse-e phi ngpüi ktie. Akhäk ta Karite üng kae ni. Akhäk ta Arap hne üng kae ni. Nikyo lüphi Pangsiima poh mshah pyan kyü sun nih ngthuh ngmin ei u üng nih ngjaak kya u ta” tilü mün sam tong pi pi lü ngsi ngjaang ktie.
12 Asun üng mün sam tong ulü ah nih lu sing lo hmaih hmaih ktie. “Ahin ta i a ngkho ni” tilü kking ngthäh ngkhyah ei shet ktie.
13 Akhäk noh ta jum ei ktie sun “Ju mpyüi ktie ni” tilü ah nih jah yaih ei u.
14 Asun üng ta Peta noh ngshä xalei mat jah ngdüih püi lü kkhyaang pä nu üng akthai kdäma “Kah püi Jüdah-eo, Jeirüh Shalem mlüh üng vek kti naküt kah püieo, nah ngngaai u bä, ahin i a ngkho ati sun kah nih ning mtheh kkhaie ni.
15 Nah nih ngngaih ua kba ahina kkhyaange hin noh ju mpyüi ktie am ni. Tuh-a ni kho ah pyaang lo ham.
16 Ahin ta shahma ngsiim Jolah noh ah napyen pän ni.
17 Pangsiima pyen ta ‘Akpäih naaka ksüün üng ta ahin kba kah poh kkhai ni. Kkhyaang nakütea kkhaana kah Mkhyangsiim buui lü kah jah pek kkhai ni. Nah nih sa ngpyange jah nah nih sa nghnue noh Pangsiima kkhyü kpyaü hü kkhaie ni. Athoi kpa mi sae noh Pangsiima mhnüh mdan hmuk kkhaie ni. Kpa mi paea lu ngmang she xu kkhai ni.
18 Kah khuut poh kti kpa mie jah nghnu miea kkhaana asuna ksüün sun üng kah Mkhyangsiim buui lü kah jah pek kkhai ni. Asun üng shahma kkhaie ni.
19 Kkhaan khoa mün sam kshe kah poh kkhai ni. Kho mdeka phi kah hiita ngshing ngte naak kah poh kkhai ni. Thi loong kkhai ni. Mei phi dääi lü mei kkhu ngmüüp-in kkhai ni.
20 Kho mik nghmüp lok kkhai ni. Khya kvaai thia kba shen lok kkhai ni. Asun kona kho mdek üng xüng shei naküt kti noh Booi Pa ah nih kyüh naak tonga mhnüüp phalok kkhai ni.
21 Asun üng Booi Pa khü kti naküt Booi Pa noh jah kuum kyan kkhai.’
22 Isare-eo, nah ngngaai ua. Nasaret mlüh-a ka Jeishüh hin Pangsiim noh nang nih-ea phäh-a ah tüih lo ni. Angshing ngte naak vaia nah nih kshuunga nah nih hmuh-a Jeishüh üng Pangsiim noh mün sam kshe jah ngshing ngte naak ni, däm duh ktie jah poh mshah shak ve.
23 Booi Jeishüh ah nih ning mhjuum vai sun Pangsiim noh ah nah mkhyah pääng kuung ni. Asun kba Pangsiim noh nüt yaan lü ah nakshing ei kuung ni. Nang nih mkhye ktie hin noh Booi Jeishüh baan lam ktunga jah hneen shak lü nah nih jah hnim shak u ni.
24 Lüphi Booi Jeishüh sun thih naaka kkhyüh Pangsiim noh ta ah thoh shak be. Khui kha naak jah thih naaka kkhyüh Pangsiim noh ah mhlät ni. I a thoon lüni ti ta Mo Pia khup kkyuma kba talü am ng'yah kuung.
25 Shang phuhlang Davit üng Pangsiim noh Jeishüh üng shääng ei kti ah napyen shak ta ‘Kah hmaai ma-a anghläia Booi Pa kah hmuh ni. Kah hlonga ah nih ve-lüta kkhyaange noh am nah mkhui mkha u.
26 Asuna thoon lü kah je kyai kti. Kah ngsi ngjaang üng phi kah je pi pi kti ni. Pangsiima nah ku ei ääp ei lü kah puum sha phi diim deih ve.
27 Nang Pangsiim noh kah ngmüi mkhya Mo Pia anghläia vek kkhaia am tha kti. Nah ngsiim ngsaih kti xüh shoh-a puum sha sun am thu mnam shak kti.
28 Anghläia xün naak lam nah nah mhnüh ni. Nah hmaai kah ning hmuh üng kah je pi pi kkhai ni’ tilü ah napyen hüt.
29 Kah püieo, nih mah pook Davita mong angshing ngtea kah pyen kkhai. Davit noh ah pät noh ah pät am pyen. Davit thilü ah nih mkhyüh u ni. Ah msüm hnün lung khuui phi ahia nih hlong ua vek kti.
30 Davit hin shahma ngsiim ni. Ah nih üng Pangsiim noh be khüt poh püi kti ati sun kshing ei kti. ‘Shang phuhlang Davita kba Davita mshuui üng shang phuhlang mat pou lok kkhai ni’ tilü Pangsiim noh ah ng'aan ei.
31 Pangsiim noh asun kba ah poh lo vai sun Davit noh ah nakshin. ‘Ah ngmüi mkhya Mo Pia anghläia ve-ei kkhaia am tha-ngü. Ah puum sha phi am thu mnam shak ngü’ tilü Davit noh ah pyen üng Jeishüh Khritoa thoh naak bea mong ah napyen ni.
32 Pangsiim noh ahina Booi Jeishüh ni thih naak üng ah thoh shak be. Asuna mong ni kei nih-e noh kah nih shak shi naak u.
33 Pangsiim noh Booi Jeishüh ah kkheet lama ah ngshut shak vaia khü lü ah ng'aan eia kba Mkhyangsiim Booi Jeishüh üng ah peet. Tuh nah nih hmuh nah nih ngjaak u hin kei nih-e üng Booi Jeishüh noh buui lü ah jah peeta Mkhyangsiim ni.
34-35 Davit ah puum sha üng ta kkhaan khoa am kaai. Nikyo lüphi ahin kba ah pyen. ‘Booi Pa noh kah Booi Pa üng nah ye-e nah kuta k'uma kah jah taak vei säpa kah kkheet lama ngshut eia’ tilü ah mtheh.
36 Nang nih Isare-e abäng noh kah pyen hin Jeishüh ni atia kshing ksang ua. Nang nih-e noh ta Booi Jeishüh baan lam ktunga nah nih jah hneen shak u. Pangsiim noh ta Booi Pa jah Khritoa ah thoon shak ni” tilü Peta noh ah jah mtheh.
37 Asun üng ta kkhyaange noh ah nih ngjaak u üng puk she lopyei ulü Peta jah ngshäe üng “E! Kah püieo, i a nih thoon hlü ktie ni” tilü kthäh ktie.
38 Peta noh ta “Mat siim mat siim vuuk be deih deih u kti lü Jeishüh Khritoa ngming üng patiso khaam ei ua. Asun üng ni Pangsiim noh nah nih mkhye ning jah mhlät lü Mkhyangsiim ning jah pek kkhai.
39 Pangsiima ng'aan ei hin nang nih-e jah nah nih mshuuiea phäh-a thoon kti ni. Pangsiima ng'aan ei sun akthuuk üng kae jah Pangsiim noh ah veeia ah jah khü nakütea phäh-a phi thoon kti ni” tilü ah jah mtheh.
40 Kkhyü nglung kse kho hah pa jah shum ei lü shak shi lü Peta noh ah jah tot hloh. “Am do kti kkhyaange üng Pangsiim noh ah jah peet vai mtaam üng käh nah nih ngpüi vaia mtun ei ua” tilü Peta noh ah jah mtheh.
41 Peta-a pyen sun jum ei kti noh patiso khaam ei ktie. Asuna mhnüüp sun üng kkhyaang thoong kthum shaang üng ngpüi lok ktie.
42 Ngshäea jah msuh mtheh sun anghläia su ngngaai kyet lü nglooi ei ktie. Anghläia pooi ngsiim ei lü tä sham ktie.
43 Ngshäe noh mün sam kshe jah ngshing ngte naak kho hah pa poh ulü asun hmuk ktie naküt mün lü kyüh ei lok ktie.
44 Jum ei ktie sun anghläia nghmuh ei lü nglooi ei ktie. Ah nih khoh hat phi ah nih jah shum ei yüm u.
45 Jum ei ktie sun noh ah nih külak jah ah nih kho mdek jah jooi tu-ulü hlü ko ktie üng ah nih jah yet u.
46 Amhnüüp tä lü hjok khah im nua ngkhääm lolü hjok khah ktie. Ngkhü ei ulü buh phi ima ei hü ktie. The phya lü je je kyai kyaia buh ei hü yüm ktie.
47 Jum ei ktie noh Pangsiim ah nih mküüi mtou u. Jum ei ktie sun kkhyaang naküt noh ah nih jah hlü ei u. Kuum kyan naak yah ktie sun Booi Pa noh amhnüüp tä lü shaang üng ah jah ngpüi shak ni.